Астана қаласын EXPO 2017 халықаралық мамандандырылған көрмесіне дайындауда Астана Конвеншн Бюросы ауқымды жұмыстарды бастап кетті. Бұл мекеме өткен жылы Астана қаласының инвестициялар және даму басқармасы жанынан құрылған болатын. Елорданың туристік секторын жоспарлау, дамыту және жылжыту бойынша негізгі ұйым саналатын мекеме ішкі инвестициялар есебінен қала экономикасын нығайтуды көздейді.
Бүгінде іскерлік туризмді дамыту мақсатында халықаралық әуежайда, теміржол вокзалы мен «Хан шатыр» СОО-да ақпараттық киоскілер орнатылған. Осы уақытқа дейін оған 5000-ға
жуық өтініш түссе, оның тең жартысы шетелдік қонақтардан келген. Пайдалы ақпарат беретін тақталар қазақ, орыс және ағылшын тілінде қызмет көрсетеді.
Ал, Астана күні қарсаңында Hop-on/Hop-off жүйесімен жабдықталған экскурсиялық автобустар пайдалануға берілмек. Қала тұрғындары мен қонақтарына ыңғайлы туристік интернет-портал мен Astana Guide мобильдік қосымшасы іске асырылады.
– Сайт пен мобильдік қосымшаның ерекшелігі сол, қаланың көрікті жерлерін 3D арқылы виртуалды саяхаттауға мүмкіндік береді. Бұған қоса жыл сайын шығатын Astana Official Guide журналы маңызды деген ақпарат анықтамалығын ұсынады. Қызмет көрсетудің сапасын арттыру әрі кеңейту мақсатында «Recommended by EXPO» жобасы дүниеге келді. Мұнда қонақүйлер, хостелдер, қоғамдық тамақтану орындары, қызмет көрсету мекемелері және транспорттық компаниялар топтастырылған, – дейді «Астана Конвеншн Бюро» ЖШС директоры Санияр Айтекенов.
Ұйымның тағы бір қолға алған бағыты – халықаралық байланысты дамыту. Қазіргі уақытта Астана қаласы шетелдік 28 мемлекетпен, соның ішінде 26 астанамен ұзақмерзімді келісімге келу туралы меморандумға қол жеткізген. Осыған байланысты, туризмді дамыту мақсатында биыл Астана қаласында жетекші туроператорлардың, блогерлер мен шетелдік БАҚ өкілдерінің қатысуымен ақпараттық турлар ұйымдастырылмақ.
«Астана Конвеншн Бюро» ЖШС мәліметіне сүйенсек, EXPO 2017 халықаралық мамандандырылған көрмесі қарсаңында «ЭКСПО лагерь» құрылысы бой көтермек. 9 мың адамға лайықталған лагерь Қазақстанның әр өңірінен келген оқушылар мен студенттерге арналмақшы.
Гүлмира ШАРХАНҚЫЗЫ
