Түркістаннан жеткен тарих
Астанадағы Ұлттық музейде Тәуелсіздіктің 25 жылдығына арналған Қожа Аxмет Ясауи атындағы Халықаралық қазақ-түрік университеті ұйымдастырған «Ұлы Дала тарихы» атты сурет көрмесі ашылды.
Игі шараның мақсаты – Ұлы Даланың тарихи оқиғалары мен ел тағдырындағы орны бар тұлғаларды көркемдеп, жастарды отансүйгіштікке баулып, олардың жаңа тарихи көзқарастарын қалыптастыруды көздеген.
Көрмеге Қ.А.Ясауи атындағы Халықаралық қазақ-түрік университетінің оқытушылары мен магистранттары жасаған 40 туынды қойылды. Ол «Ұлы Даланың ұлы тұлғалары» және «Ұлы Даланың ұлы оқиғалары мен құбылыстары» деген екі бөлімнен құралған. Картиналардың тақырыптары да мұқият таңдалған.
Әсіресе, «Ботай елді мекені», «Қазақ даласындағы аң аулау өнерінен көрініс», «Сақ басшысы – Алтын адамды жерлеу рәсімі», «Отырар моншасы», «Тайқазан», «Отырар кітапханасы», «Қожа Ахмет Ясауи кесенесінің құрылысы» секілді туындылардан бір замандардағы асыл бабаларымыздың қолдарынан шыққан мәдени ескерткіштерден өркениетті елдің үлгісін көргендей болдық. Сондай-ақ, елі мен жері үшін алтын басын бәйгеге тігіп, туған елдің іргесін бекемдеген тұғыры биік тұлғалардың портреттері де көрген жанды қызықтырмай қоймайды. Қысқасы, аталған шарадан Ұлы Даланың тарихын терең тани аласыз.
Көрме 25 қыркүйекке дейін жалғасады.
Азамат ЕСЕНЖОЛ