Темірдей тәртіпке еті үйренген ұлдан ертең осал адам шықпайды. Әсіресе, киімге белгі тігіп, түйме қадаудан басталатын әскери әңгімеге жастайынан қанық бала басқа құрдастарына қарағанда әлдеқайда пысықтау болып ер жететіні рас. Мұндай өрендердің бір тобымен Сағадат Нұрмағамбетов атындағы «Жас Ұлан» республикалық мектебіне барғанымызда таныстық. Президенттің бастамасымен 1999 жылы іргесі қаланған беделді оқу ордасында бұл күні 441 шәкірт білім алады.
Мекемеге кіргенімізде, Отан қорғаушылар күніне арналған мерекелік кештің үстінен дөп түсіппіз. Жыл сайын осынау мейрамды дүркіретіп тойлау жасұландықтардың игі дәстүріне айналған. Мұнтаздай форма киіп, салмақты мінез қалыптастырған жас сарбаздардың ортасында отырудың өзі әскердегі атмосфераны сезіндіреді екен. Концерт барысында даурығып, тәртіп бұзып жатқан бірі жоқ. Бәрі де ересек кісілерше салқынқанды, көзқарастары байыпты. Өйткені, мұнда түскендердің түгелі – сан түрлі сыннан сүрінбей өткен сайыпқырандар. Мектепте оқуға ниетті үміткерлерді психологиялық іріктеу, дене даярлығы нормативтері және медициналық тексеріс күтеді. Бұған дейін 7-сынып бітірген оқушылар қабылданса, ендігі уақытта 9-сыныпты аяқтаған бозбалалар ғана «Жас Ұлан» қатарына қосылуға тілек білдіре алады.
Жиыннан соң жанымдағы екі жігітті әңгімеге тарттым. Жасұлан Мұсаев Талдықорған өңірінің тумасы болса, Хафиз Атабай Шымкент қаласынан екен. Екеуі де алғашында үйлерін сағынып, «айналайынды» аңсағандарын жасырмады.
– Күнде таңертең командир бәрімізді сапқа тұрғызып, жағамызды тексереді, погондарымызды қарайды. Бастапқыда киім жуу мен үтіктеуден қиналдық. Ондайда жоғары сыныптағылар ақылдарын айтып, тәжірибелерімен бөлісіп, көп көмектесті. Жалпы, біздер бауыр секілдіміз. Ең алдымен, ұстаздарымыз татулыққа, ауызбіршілікке баулиды, – деп жымиды Жасұлан.
Кей білместік үшін ұмытылмастай сабақ алатын кездер де болатын көрінеді. Оны Хафиздің сөзінен аңғардық.
– Мектептегі ағаларымыз обал мен ысыраптың зиянын жиі айтып отырады. Бір күні байқаусызда нанның аузын ашық қалдырып кетіппіз. Бірнеше сағат бойы тұрып, қатып қалыпты. Ертесіне соны тамаққа туратып, жегізген. Есесіне өз ісіміздің бұрыстығын түсініп, мұндай салғырттыққа сақ қарайтын болдық, – деді жұқалтаң келген ақсары бозбала.
Шәкірттердің салауатты өмір салтына әбден дағдыланып кететіні сонша, қалаға шыққанда, достарымен кездескенде фастфуд, газды сусын секілді өнімдерге тәбеттері тартпай қалады екен.
– Үйге барғанда анамыз пісірген неше түрлі тағамдарды асқазанымыз «жатырқайды». Тіпті, қатал режимге көндігіп қалғандықтан, елден ерте оянып аламыз. Мектепте әр минутымыз есептеулі ғой. Осы тәрбиенің арқасында уақытты бағалай білеміз, – деп қайырды қос кейіпкеріміз.
Жасұландықтар негізгі пәндермен бірге алғашқы әскери дайындық курсын тереңдете оқиды. Автоматты 15 секундта шашып-жинау дегенің мұндағылар үшін бұйым емес. Оқушылар спорттық шараларға да белсене қатысады. Мекемеде бокс, күрес, футбол, таэквондо, жүзу, шаңғы тебу секілді үйірмелер жұмыс істейді. Одан бөлек, барабаншылар құрамы да бар. Олар салтанатты рәсім кезінде өнер көрсетеді.
Айтпақшы, «Жас Ұлан» балалары қоғамдық трендтерден де қалыс қалмауға тырысады. Биылғы 8 наурыз қарсаңында осы мектептің 200 шәкірті шафл стилінде би билеп, флешмоб ұйымдастырған. Құттықтау ретінде түсірілген бейнеролик әп-сәтте қазнетке тарап, көпшілік тарапынан қызу қолдауға ие болған еді. Биыл да өрендер 7 мамырға қарай тосын сый даярлауда. Жаңа флешмобтың видеосы көп ұзамай интернетке жүктеледі.
Ботагөз МАРАТҚЫЗЫ
