Қаламызда 16 мың үлескердің 13 мыңының мәселесі шешілді. 2021 жылы Нұр-Сұлтанда тағы 57 тұрғын үй құрылысы аяқталады, осылайша 7 мыңнан астам 500 үлескер отбасының мәселесі шешіледі. 2022-2023 жылдары қалған көпқабатты үйлерді аяқтау жоспарлануда.
«Ел басшылығының тапсырмасы бойынша құрылысы ұзаққа созылған нысандардың құрылысын аяқтау бойынша ауқымды, жүйелі жұмыстар жүргізілуде. 2019 жылдың жазында 52 нысан ұзақ құрылыс ретінде есептелген еді, бұл дегеніміз – 150 көппәтерлі тұрғын үй кешені.
2019-2020 жылдары біз 33 көппәтерлі тұрғын үй кешенін салып, пайдалануға бердік. 5 мыңнан астам үлескер отбасы ұзақ жылдар бойы күткен пәтерін сатып алды. Биыл тағы 57 көппәтерлі тұрғын үй кешенін аяқтаймыз.
2022 жылы тағы 40 көппәтерлі тұрғын үйді, 2023 жылы 20 тұрғын үй салуды жоспарлап отырмыз. Осылайша 2023 жылы елордадағы үлескерлер мәселесін толық шешуді жоспарлап отырмыз» деді Алтай Көлгінов.
Елорда әкімі елордадағы кейбір үйлердің құрылысы 15-16 жылға созылғанын айтты. Үлестік құрылыстың барлық нысандарында әртүрлі көрініс болды: бір жерде тек шұңқыр, бір жерде қаңқасы (каркас) көтерілген, енді бір жерде құрылысшы бір пәтерді 4-5 адамға сатқан. Дегенмен әрбір ұзақ құрылыс бойынша қадамдық іс-шаралар жоспары бар. Сонымен қатар елордада тұрғын үй кешенін жөндеу, апатты және ескі үйлерді бұзу жұмыстары жүргізілуде.
