Астанадағы «Жастар» театрында Тәуелсіздіктің ширек ғасыр тойына арналған қалалық Тілдерді дамыту басқармасының ұйымдастыруымен «Тарих толқынында» атты әдеби-сазды кеш өтті.
Игілікті шараның мақсаты тәуелсіздік құндылықтарын ұлықтап, өскелең ұрпақты отансүйгіштікке, елжандылыққа баулып, ана тіліміздің мәртебесін көтеріп, мерейін асыруды көздеген.
Кеш барысында еліміз егемендік алған кездегі оқиғалар мен Елбасы жайында түсірілген бейнебаяндар көрсетіліп, белгілі қаламгерлер сол уақыттағы тарихи кезеңдер жайында салмақты сөз сабақтады. Әсіресе, жазушы Алдан Смайыл асқақ Астана туралы парасатты ой қорытса, Тіл комитетінің алғашқы төрағасы болған Сұлтан Оразалы азаттық алған шақтағы ана тіліміздің абыройы үшін атқарылған жұмыстар жайында салиқалы әңгіме өрбітті. Белгілі ғалым, академик Ғарифолла Есім де дербестік алған жылдардағы елеулі оқиғаларға тоқталып, жиналған қауымға тәуелсіздік деген ең асыл дүниені көздің қарашығындай сақтап, оны қастер тұтып, ардақтап жүріңіздер деген ізгі лебізін білдірді.
Әдеби кештің көрігін елордалық Қаллеки театрының әртістері қыздырды. Олар сахнада қазақ ақындарының азаттыққа арнаған айбынды жырларын оқып, рухымызды көтерді. Ана тіліміздің қадір-қасиетін түсінуге, бағалауға бүгінгі жастарға ой салатын қырғыз драматургі Мар Байджиевтің «Тіл табысқандар» қойылымынан үзінді қойды. Дарынды актер Қуандық Қыстықбаев Мемлекет басшысының «Тәуелсіздік толғауынан» үзінді оқыды. Ондағы: «Біз тәуелсіздікті ақылмен, ата-баба жолымен алдық. Тәуелсіздіктің қайта оралғаны – біздің ата-бабаларымыздың сан ғасырлық азаттық күресінің заңды өтеуі. Жаратқан Иенің жасаған әділдігі. Ата-бабаларымыздың осыншама байтақ жерді ақ найзаның ұшымен, ақ білектің күшімен қорғап қалғанының арқасы. Бүгінгі біздің тәуелсіздігіміздің қайнар көзі – қазақ халқының сан ғасырлар бойғы күресінде, азаттыққа ұмтылған қайсарлығында жатыр» деген ойлы сөздерден азаттықтың құны мен бәсін іштей ұғынасыз.
Көркем жырмен өрілген сазды кеште отансүйгіштік рухтағы әндердің байрағы желбіреді. Енді ғана көпшілікке танылып келе жатқан жас әнші Жасмина Тұрашева «Отаным үшін» деген ән шырқаса, талантты өнерпаз Алтынай Жорабаева «Қазақстаным, алға!» деп аталған патриоттық әнімен көрермендердің ыстық ықыласына бөленді. Кеш шымылдығын Жанат Шыбықбай арқалы ақын Қадыр Мырза Әлінің сөзіне жазылған Ескендір Хасанғалиевтің «Атамекен» әнімен қорытындылады.
Түйіндеп айтқанда, тәуелсіздіктің мерейлі белесіне арналған тамаша кештен тағылымға толы танымдық дүниелердің көп болғаны көңілімізді көтерді.
Азамат ЕСЕНЖОЛ
