«Астана Опера» мемлекеттік опера және балет театрында тұңғыш қазақстандық «ЮНЕСКО клубтары шығармашылық Академиясы» қатысушыларының қорытынды гала-концерті өтті.
Тұңғыш «ЮНЕСКО клубтары шығармашылық Академиясының» студенті атануға 12-17 жас аралығындағы 500-ден аса үміткерлер бейнелеу, хореографиялық, аспапты және вокалды өнер номинациялары бойынша өнер көрсеткен. Ақтық сынға өткен 100 жеңімпаз өз жұмыстарының қорытындысын елорда тұрғындары мен қала қонақтарына ұсынды. Қорытынды кештегі толғандыратын және арбап алатын туындылар, әсерлі және жарқын ырғақтар, әсем билер, көркем суреттер мен мүсіндер – осының барлығы еліміздің үздік тәлімгерлері мен еңбек сіңірген қайраткерлерінің 80 сағаттан астам қажырлы еңбегінің нәтижесі екендігін атап өткен жөн.
– Байқау жөнінде ести сала қатысуға ниеттеніп, «ЮНЕСКО клубтары шығармашылық Академиясының» ұйымдастырушыларына «Ағайша» атты халық әнін орындап, жұмысымды видео арқылы жолдаған едім. Ұсынған әнім ұйымдастырушылардың көңілінен шығып, финалдық байқауға қатысуға жолдама алдым. Ақтық концертте халық әні «Ақеркені» орындадым. Финалға қатысқан 100 бала бәріміз бір үйдің баласындай болып кеттік. Бұл байқау маған үлкен бір мектеп болды. «Астана Опера» театрының сахнасында өнер көрсетуге мүмкіндік берді» дейді финалдық бәсекеге қатысқан астаналық өнерпаз Баян Жұбанова.
«ЮНЕСКО клубтары шығармашылық Академиясы» – бұл Қазақстан Республикасының Тұңғыш Президенті – Ұлт көшбасшысы қоры және Қазақ Ұлттық өнер университетімен бірлесіп атқарған бірегей жоба. Жобаның мақсаты – жастарды толеранттық рухта тәрбиелеу мен мемлекеттің болашақ шығармашылық әлеуетін қалыптастыру мақсатында Қазақстан Республикасының шығармашыл-дарынды өскелең жастарды қолдау мен дамытуға бағытталған.
Осы бастама ерекше әлеуметтік өзгешелікке ие екенін және ақысыз негізді ұйымдастырылғанын атап өтуге болады. Шығармашыл жастардың байқауға қатысу үшін бар болғаны – Қазақстандағы ЮНЕСКО клубтарының бірінің мүшесі, ілгері дамуға деген дарыны мен ынтасының болуы қажет.
Ұйымдастырушылардың айтуынша, жоба дәстүрлі түрде өткізілмек. Сонымен қатар, жыл сайын бұдан да көп өнерлі жастарды тартып, олардың шығармашылығын шыңдауға мүмкіндік берілмек.
Әли БИТӨРЕ
