Өткен сенбi елорда үшiн мерекелi һәм берекелi күн болды. Мерекелi дейтiнiмiз – жылдағы әдет бойынша бұқара бiр кiсiдей сенбiлiкке жұмылды. Ал берекелi болатыны шаһардың жер-жерi қыстан қалған 2 мың тоннаға жуы ққоқыстан тазарып, бiр жасарып қалды.
Нақты мәлiмет бойынша жалпықалалық сенбiлiкке 80 мыңнан астам адам қатысты. Бұл күнi Астананы абаттандыру жұмысына елордалықтармен бiрге Елбасы Нұрсұлтан Назарбаев атсалысты. Президент елорданың ендi ашылатын ботаникалық бағының қақ ортасына жөке ағашын отырғызып, оған «Жетiсу» деген атау бердi.
«Астана-Арена» стадионына қарама-қарсы орналасқан жаңа ботаникалық бақтың алғашқы ағаштарын отырғызуға сол жағалаудағы әкiмшiлiк мекемелердегi қызметкерлер белсене қатысты. Парламент депутаттарынан бастап, кеңсе қызметкерлерiне дейiн қолдарына әдеттегi қаламның орнына күрек пен кетпен алды. Сөйтiп, жаңа бақты жасыл желекке толтыру iсiне үлес қосты. Түске таман бүршiгiн ендi жара бастаған жас өскiндi отырғызып жатқан көптiң қатарына Елбасы Нұрсұлтан Назарбаев келiп қосылды. Алдымен баққа жөке ағашын отырғызып, мұндағы көк желектiң қатарын толықтырды. Одан соң аталған бақтың аймағын одан әрi дамыту жөнiндегi жобалармен танысты.
Жалпы, көктем келiсiмен елордада ел болып қолға алатын игiлiктi iстiң бiрi – жалпықалалық сенбiлiк. Әрине, сенбiлiкке ескiнiң сарқыншағы, тегiн жұмыс күшiн пайдалану деп қарау – әбестiк. Дiттегенi – қаланың қоқысын жинап, аула сыпырушылардың жұмысын жеңiлдету емес. Тазалықты насихаттап, халықты айналасына жауапкершiлiкпен қарауға тәрбиелеу деген дұрыс болар. Көгалдандыру да солай. Сенбiлiкте отырғызылған әр талдың қала мен оның тазалығы, тұрғындары үшiн маңызы қаншалықты зор екенiн қазбаламай-ақ қоялық. Бiр ғана қазақтың «Атадан мал қалғанша, тал қалсын» деген нақылын еске алсақ жеткiлiктi. Бүгiн отырғызылған әр талдың қызығын ертеңгi ұрпақ көрерi анық. Елбасының серпiнмен өткен сенбiлiкте айтқан сөзi осыған саяды.
– Көктем келген сайын бүкiл елiмiзде жасылдандыру жұмысы жүретiн болады. «Жасыл ел» бағдарламасы бойынша менiң тапсырмаммен елiмiздiң барлық өңiрлерiнде, Қазақстанның барлық ауылдарында, қалаларында осындай жасылдандыру шараларын жүргiзу керек. Бұл өзiмiздiң жақсы өмiр сүруiмiз үшiн, қуанышты, бақытты болуымыз үшiн, бiздiң ұрпақтардың өмiрi жақсы болу үшiн, отанымыз әдемi болуы үшiн қажет. Сондықтан барлық қазақстандықтарға, барлық облыс, өңiрлерге көктемдi пайдаланып, жасыл желек отырғызуды талап етемiн. Және оның орындалып жатқанын бiлемiн, – дедi Президент.
Елбасы сөзiн тарқатсақ, Астана төңiрегiнде 60 мың гектар жерге ағаш отырғызылды. Ал қаланың iшiндегi орманды алқап 16 мың гектарға жеттi. Астана болғанға дейiн бұл қаладағы жасыл желек мардымсыз едi. Ал қазiр ше? Қазiр жасыл қала болды. Бiрақ, оның әрдайым көгерiп, жасарып, мұнтаздай болып тұруы осы қаланың әр адамына қатысты. Кез келген адамның өз қолымен отырғызып, суарып, баптаған ағашы өзiне ыстық болмақ. Сондықтан, жауапты әрi сауапты iс – көгалдандыруға әркiм «парызым» деп қарағаны жөн болмақ.
– Бiз ұрпақтарымыз әдемi әрi таза қалада тұрулары үшiн елiмiздi жасыл желекке айналдыруымыз керек. Бүгiн бұл жерде аумағы 100 гектарды алып жатқан Қазақстандағы ең үлкен Ботаникалық бақ болады. Мен оны «Жетiсу» деп атауды ұсындым. Бұл баққа әлемнiң әр елiнен әкелiнген ағаштар мен өсiмдiктер отырғызылады. Бұл қала тұрғындары үшiн жаңа демалыс орны болады, – деп жалғады сөзiн Мемлекет басшысы. «Егер бiр адам қоқысты арнайы орынға салмайтын болса, басқалары да соны қайталайды. Шашылып жатқан темекi тұқылымен қатар, бос бөтелкелер пайда болады, одан барып күл-қоқысқа айналады. Тазаланған жердi таза деуге болмайды, қоқыс жоқ жердi таза деуге болады. Сондықтан барлығымыз қыс өтiп, көктем келiсiмен айналамызды ретке келтiрiп, таза ұстауымыз керек».
«Жетiсу» бағының аумағында осы сенбiлiк кезiнде25 гектаржерге 1040 түп ағаш егiлдi. Ал, жалпы қалада топырағымен қоса отырғызу технологиясы бойынша 2,5 мыңнан астам ағаш пен дәстүрлi әдiспен 2600 бұта отырғызылды. Отырғызылған желектердiң сұрпы – әр алуан. Денi – Арқа топырағына сiңiсе алатын үйеңкi, қайың, сiбiр шыршасы, қарағай, ұсақ жапырақты жөке ағашы, сiбiр алма ағашы сынды өсiмдiктер.
Айта кетерлiгi, мемлекеттiк қызметтегi шендi-шекпендiден бастап жастарға дейiн жұмысқа жұмылған осы күнi қала бойынша700 гектарсаябақ пен гүлзарлар күл-қоқыстан тазарып, 116 мың ағаштың түбi әкпен ақталды.
Астананы абаттандыруға елордалықтармен бiрге қалада тiркелген дипломатиялық корпус өкiлдерi де бiр кiсiдей жұмылды. Атап айтсақ, Венгрия, Түркия, Ресей, Беларусь, Украина, Түркiменстан елшiлiктерiнiң 100-ге тарта дипломаттары өз елшiлiктерi орналасқан аумақты тазартты.
Айнұр ШОШАЕВА
