Кеше балаларды қорғау күніне орай Астанада балалар мен жастар музыкалық оркестрлерінің және ансамбльдерінің шеруі болды.
Мерекелік шараға мектеп оқушылары мен колледж студенттері, музыкалық мектеп, өнер мектебі, Оқушылар сарайы тәрбиеленушілері және ҚазҰӨУ студенттері қатысты. Шара барысында 7 мыңға жуық жасөспірім Абай, Республика даңғылдары мен Кенесары көшесінің бойымен сап түзеп жүріп өтті. Балалар мен жастардың музыкалық мәдениетін дамытып қана қоймай, олардың өз білім мекемесіне деген мақтаныш сезімін ояту, республикалық білім мекемелерінің абыройын көтеру мақсатында өткен шараның ерекшелігі әр колонна түрлі музыкалық жанр түрінде қаланың төрт ауданын бейнеледі. Мысалы, Байқоңыр ауданы жаңашылдық пен даму энергиясын көрсетсе, Сарыарқа ауданы фольклорлық әуенді шырқады. Ал Алматы ауданы ұлы музыканттардың өшпес туындыларын орындап, классикалық әуенді әуелетсе, Есіл ауданы эстрадалық музыкаға кезек берді. Қызықты репертуарлар мен әртүрлі музыкалық аспаптар, қатысушылардың киім үлгілері – барлығы балалар мерекесін ұмытылмастай етіп, ерекшелей түсті.
