دەنساۋلىق ساقتاۋ سالاسىندا 33 جىلدىق تاجىريبەسى بار دارىگەر بيبىگۇل كوجەكباەۆا استانا قالاسىنداعى №11 ەمحانادا ەڭبەك ەتەدى. ەمدەۋ مەكەمەسىندەگى جاتىر موينى كابينەتىنىڭ دارىگەرى ايەلدەرگە گينەكولوگيالىق سالادا كونسۋلتاتسيا بەرىپ, دياگنوستيكالىق تەكسەرۋ جۇرگىزەدى.
اق حالاتتى ابزال جان سولتۇستىك قازاقستان وبلىسىندا دۇنيەگە كەلگەن. 1985-1991 جىلدار ارالىعىندا قاراعاندى مەديتسينالىق ۋنيۆەرسيتەتىندە جوعارى ءبىلىم العان. جولدامامەن پەتروپاۆل قالاسىنىڭ پەريناتالدى ورتالىعىنا بارىپ, ەڭبەك جولىن باستاعان. ورتالىقتا 1995-2012 جىلدارى دارىگەر رەتىندە جۇمىس ىستەپ, 2004 جىلى اكۋشەرلىك-نەوناتالدىق بلوك مەڭگەرۋشىسى بولادى. 2012 جىلى قالالىق ايەلدەر كونسۋلتاتسياسى ورتالىعى باس دارىگەرىنىڭ ورىنباسارى, 2015 جىلى سول جاقتاعى №1 ەمحانادا اكۋشەرلىك, گينەكولوگيا, پەدياتريا بويىنشا ديرەكتوردىڭ ورىنباسارى بولىپ, باسشىلىق قىزمەتتە شىڭدالادى. 2022 جىلى ەلورداعا كوشىپ كەلىپ, قازىرگى №11 قالالىق ەمحاناعا دارىگەر بولىپ ورنالاسادى. بۇگىندە ول – وسىنداعى جاتىر موينى پاتولوگياسى كابينەتىندە جۇمىس ىستەپ, ەلوردالىق ايەلدەرگە گينەكولوگيالىق كومەك كورسەتەدى, ديسپانسەرلىك باقىلاۋ جۇرگىزەدى.
– وتىز ءۇش جىلدىق ەڭبەك جىلىمنىڭ 20 جىلى ستاتسيوناردا ءوتىپتى. پەرزەنتحانادا جۇرگەندە ءبىر قىزىق جاعداي بولدى. ءبىر سەنبىدە كەزەكشىلىككە شىقتىم, ۇشەم كوتەرگەن ايەلدى بوساندىرۋ كەرەك بولدى. تۋ بارىسىندا پاتولوگيا بولعاندىقتان كەسار تىلىگىمەن بوساندىرۋعا شەشىم قابىلدادىم. سونىمەن, اۋەلى ءبىرىنشى بالانى الدىق, سوسىن ەكىنشى, كەزەگىمەن ءۇشىنشى بالانى الىپ, ءبارىمىز بالالاردىڭ جاقسى تۋعانىنا قۋانىپ, ريزا بولىپ, وتانى جالعاستىرىپ جاتىرمىز. اناسى دا ءماز (وتا ەپيدۋرالدىق انەستەزيامەن جاسالىپ جاتاندىقتان ول كىسى ۇيىقتاتىلماعان). مەن جاتىرداعى تىلىكتىڭ قانىن توقتاتۋ, بالانىڭ جولداسىن الۋ جۇمىستارىن جالعاستىرىپ جاتقان ەدىم, ءبىر كەزدە جاتىردان تاعى ءبىر بالانىڭ اياعى شىقتى. سويتسەك ەكۇ ارقىلى بالا كوتەرگەن ايەل ۇشەم دەپ جۇرسە, تورتەم ەكەن. مۇنى باقىلاعان دارىگەرلەر دە, ايەل دە بىلمەگەن. وسىنداي قىزىق جاعداي بولعان. قازىر 4 بالانىڭ ءبارى امان-ەسەن ءوسىپ جاتىر, -دەپ دارىگەر ەستە قالعان وقيعاسىن باياندادى.
سالاعا سىڭىرگەن ەڭبەگى ءۇشىن كەيىپكەرىمىز «دەنساۋلىق ساقتاۋ سالاسىنىڭ ۇزدىگى» توسبەلگىسىمەن, تالاي رەت قۇرمەت گراموتالارى جانە العىس حاتتارمەن ماراپاتتالعان.
