«استانا» ەكىنشى اينالىمدى جەڭىسپەن باستادى
فۋتبولدان قازاقستان چەمپيوناتىنىڭ پرەمەر-ليگاسىندا ەكىنشى اينالىم ويىندارى باستالدى.
ءبىرىنشى اينالىمدا كوش باسىن ەشكىمگە بەرمەگەن «استانا» كومانداسى ەكىنشى اينالىمدى دا جەڭىسپەن باستاپ وتىر. قازاقستان چەمپيوندارى ەكىنشى اينالىمنىڭ العاشقى ويىنىندا «ورداباسى» كومانداسىمەن كەزدەستى. «استانا ارەنا» ستاديونىنا جينالعان جانكۇيەرلەر ءتورت گول سوعىلعان قىزىقتى ءارى تارتىستى ماتچتى تاماشالادى. بۇل ويىنداعى ەسەپ تەز اشىلدى. ويىننىڭ جەتىنشى مينۋتىندا پاتريك تۆۋماسي «ورداباسى» قاقپاسىنا قاراي ايىپ دوبىن ورىندادى. اۋەلەپ جەتكەن دوپ ءبىر-بىرىمەن يتەرىسكەن ويىنشىلاردىڭ ورتاسىنا ءتۇستى. ەشكىمنىڭ ىڭعايىنا كەلە قويماعان الا دوپ تاعى ءبىر كوتەرىلگەندە «استانا» قورعاۋشىسى مارين انيچيچ شيراق قيمىل كورسەتتى. ول بارىنەن بيىك سەكىرىپ دوپتى باسپەن ۇرىپ قاقپانىڭ بوس بۇرىشىنا ءدال باعىتتادى. وسىلايشا ەسەپ اشىلدى.
ارادا ەكى مينۋت وتپەي-اق ەلوردالىق قورعاۋشىلار شىمكەنتتىك قورعاۋشى سيمچەۆيچتىڭ قالاي العا شىعىپ كەتكەنىن نازاردان شىعارىپ الدى. وسىلايشا استانالىق قاقپاشى ەريچپەن بەتپە-بەت شىققان سيمچەۆيچ ەسەپتى تەڭىستىردى.
ال ويىننىڭ 21-ءىنشى مينۋتىندا شابۋىلشىلارعا ادەمى پاس شىعارىپ بەرە بىلەتىن سەرىكجان مۋجيكوۆ تاعى دا ەرلەدى. دەسپوتوۆيچتەن ادەمى پاس العان سەرىكجان دوپتى قاقپاعا ءوزى سوقسا دا بولاتىن ەدى, الايدا ول وزىنەن دە ءساتتى پوزيتسيادا تۇرعان كانياسقا پاس شىعاردى. ال كولۋمبيالىق لەگيونەرىمىز بولسا ءمۇلت كەتپەدى. وسىلايشا ەسەپ ەسەلەنىپ, 2:1 بولدى.
ەكىنشى تايمنىڭ ورتاسىنا دەيىن ەكى جاق الما-كەزەك شابۋىلدارمەن الماستى. الايدا, اسا قاۋىپتى ساتتەر تۋىنداي قويمادى. ويىننىڭ 72-ءىنشى مينۋتىندا عانا تابلوداعى ەسەپ وزگەردى. تاعى دا سول تۆۋماسي العا ۇمتىلىپ, المات بەكباەۆ قورعاعان قاقپاعا قاراي قاتتى سوققى جاسادى. قانشالىقتى قاۋىپتى بولسا دا بۇل دوپتى «ورداباسى» قاقپاشىسى قايتارعان ەدى. بىراق قايتارعان دوبىنا ءبىرىنشى جەتكەن تاڭات نوسەرباەۆتىڭ سوققىسىنا توسقاۋىل بولا المادى. «استانا» كاپيتانى سوققان وسى گول ايتۋلى ماتچتىڭ نۇكتەسىن قويدى. ەسەپ 3:1 بولىپ تىركەلدى.
كەلەسى ويىندى استانالىقتار پەتروپاۆل قالاسىندا وتكىزەدى. قازاقستان كۋبوگىنىڭ شيرەك فينالىندا «قىزىلجار سق» كومانداسى مەن «استانا» كەزدەسەدى.
عالىم قوجابەكوۆ