«استانا» باسكەتبول كلۋبى ۆتب ليگاسى اياسىندا ءوز الاڭىندا كراسنويارسك قالاسىنان كەلگەن «ەنيسەي» كومانداسىن قابىلداپ, 92:75 ەسەبىمەن باسىم ءتۇستى.
استانالىقتار ءا دەگەننەن ابجىلدىك تانىتىپ, ويىن تىزگىنىن وزدەرى ۇستادى. اسىرەسە, كوماندا ساپىنان دجاستين كارتەر ەرەكشە كوزگە ءتۇستى. ول ءبىرىنشى كەزەڭنىڭ بەل ورتاسىنا جەتپەي جاتىپ 10 ۇپاي جيناپ ۇلگەردى. ودان سوڭ شابۋىل شەبىنە لەونيداس كاسەلاكيس دەم بەردى. ءسويتىپ, الاڭ يەلەرى قارسىلاسىنان 10 ۇپاي العا ۇزادى.
كەزدەسۋدىڭ ەكىنشى كەزەڭىندە وسى قارقىندارىنان قايتپادى. ءۇشىنشى كەزەڭدە دە 26:14 ەسەبى تىركەلدى. قوناقتار سوڭعى كەزەڭدە عانا 15:26 ەسەبىمەن ايتارلىقتاي الشاقتاعان اراقاشىقتىقتى قىسقارتىپ, «تۇياق سەرپىدى».
ال قورىتىندى ەسەپتە ەلوردالىقتار 17 ۇپاي ايىرماشىلىعىمەن جەڭىسكە جەتتى. ويىننىڭ ۇزدىگى بولىپ لەونيداس كاسەلاكيس تانىلدى. ول 25 ۇپاي جيناپ, ەڭ ناتيجەلى ويىن كورسەتكەن فورۆارد اتاندى. ودان كەيىن دجاستين كارتەر 20 ۇپايمەن ەرەكشەلەنسە, لارري گوردون 16 ۇپاي ەنشىلەدى.
بۇل جەڭىس – «استانانىڭ» بۇل ماۋسىمداعى ەكىنشى جانە ءوز الاڭىنداعى العاشقى جەڭىسى. ەندى كەلەسى كەزدەسۋىن 10 جەلتوقسان كۇنى «سارىارقا» ۆەلوترەگىندە «لوكوموتيۆ» كومانداسىنا قارسى وتكىزەدى.
ورىنبەك وتەمۇرات
