باعىتىمىزدى بەلگىلەپ بەردى
پرەزيدەنت ۇسىنعان «قازاقستان – 2050» ستراتەگياسى – ەلىمىزدىڭ بولاشاق تابىستارىنىڭ باعدارى. باستى قۇجاتتا قۇقىق قورعاۋ ورگاندارىنا قاتىستى اۋقىمدى ماسەلەلەر از ايتىلمادى. ەكونوميكالىق سىبايلاس جەمقورلىققا قارسى كۇرەس اگەنتتىگى ەلباسى جولداۋىندا كورسەتىلگەن مىندەتتەردى جۇزەگە اسىرۋدا كەشەندى شارالاردى قولعا الۋدا.
مەملەكەت باسشىسى سىبايلاس جەمقورلىققا قارسى كۇرەس بويىنشا قازاقستاننىڭ ءتاجىريبەسىندە جيناقتالعان ءۇش نەگىزگى شارتتى اتاپ ايتتى: «بىرىنشىدەن, قاتال ءارى ءادىل زاڭدار قاجەت. ەكىنشىدەن, كۇشتى ساياسي جىگەر قاجەت. ۇشىنشىدەن, بارشا قوعام سىبايلاس جەمقورلىققا قارسى تۇرۋ قاجەت». تەك وسى جاعدايدا عانا بۇل دەرتتى اۋىزدىقتاۋ مۇمكىندىگى تۋماق.
قر ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگىنىڭ توراعاسى راشيد تۇسىپبەكوۆ «كازاحستانسكايا پراۆدا» گازەتىنە بەرگەن سۇحباتىندا ەلباسىنىڭ تاپسىرماسىنا ءسايكەس الداعى ۋاقىتتا اتقارىلاتىن شارالاردىڭ نەگىزگى باعىتتارىن اتاپ ءوتتى. ءتوراعانىڭ ايتۋىنشا, وتكەن جىلى قارجى پوليتسياسى ورگاندارىنىڭ ارالاسۋىمەن 1 800-دەن استام سىبايلاس جەمقورلىق قىلمىستارى انىقتالعان. بۇل كورسەتكىش 2011 جىلعا قاراعاندا 2,2 پايىزعا ارتىق. ال بىلتىرعى جىلى 1 650 لاۋازىمدى تۇلعا قىلمىستىق جاۋاپكەرشىلىككە تارتىلسا, ولاردىڭ ىشىندە 450-ءى رەسپۋبليكالىق جانە وبلىستىق دەڭگەيدە, ال 1 200-ءى قالالىق جانە اۋداندىق دەڭگەيدە بولىپ وتىر. «ءبىز ساندىق كورسەتكىشتەردى ايتىپ, دابىرا قىلىپ, بويامالاتۋ ءۇشىن جۇمىس ىستەۋگە ءتيىس ەمەسپىز, كەرىسىنشە تەرەڭ ساراپتاما جاساپ, مەملەكەتكە ميللياردتاعان زالال كەلتىرىپ وتىرعان سىبايلاس جەمقورلىقتىڭ ۇيىمداسقان ءارى جۇيەلى سحەماسىن ايقىنداۋعا كوپ ءمان بەرۋىمىز كەرەك», دەگەن توراعا, بۇدان بولەك, بىلتىرعى جىلى رەسپۋبليكانىڭ 10 ءوڭىرىندە الەۋمەتتىك كاسىپكەرلىك كورپوراتسيالارعا تۇراقتاندىرۋشى ازىق-تۇلىك قورلارىن قالىپتاستىرۋ ءۇشىن بولىنگەن بيۋدجەت قاراجاتىن جىمقىرۋ فاكتىلەرى انىقتالعانىن اتاپ ءوتتى. بىرنەشە قالالاردا تۇراقتاندىرۋ قورىن قالىپتاستىرۋ ءۇشىن بيۋدجەتتەن ءبولىنگەن 2 ملرد. 187 ميلليون تەڭگەنى جىمقىرۋ فاكتىلەرى بويىنشا 15 قىلمىستىق ءىس قوزعالعان ەكەن. اتالعان فاكتىلەر بويىنشا تەرگەۋ جۇمىستارى اياقتالعان سوڭ 1 ميلليارد تەڭگەدەن استام قاراجات مەملەكەت قازىناسىنا قايتارىلعان. مىنە, وسىنداي ولقىلىقتاردىڭ الدىن الۋ ءۇشىن ءتيىمدى شارالاردىڭ ناتيجەسى بولۋ كەرەك. بۇل رەتتە ەلباسىنىڭ جولداۋى الداعى ۋاقىتتا اتقارىلۋعا ءتيىس شارالاردىڭ ايقىن باعىتى بولاتىنى داۋسىز.
بيجان قانىبەك,
قارجى پوليتسياسى اكادەمياسىنىڭ وقىتۋشىسى