باحىتجان مالىباەۆ, استانا قالاسى ىشكى ىستەر دەپارتامەنتى جول پوليتسياسى باسقارماسى باستىعىنىڭ ورىنباسارى: تۇرعىنداردىڭ تۇسىنىستىك تانىتقانى ءجون

–جولداردىڭ جابىلۋى – جول پوليتسياسىنىڭ ساقشىلارىنا سالماق سالادى. وسى رەتتە اۆتوبۋستاردىڭ باعىتى مەن جۇرگىزۋشىلەردىڭ قوزعالىسىن قالاي رەتتەيسىزدەر؟

–قالانىڭ اۆتوكولىك يەلەرىنە الدىن الا مارشرۋتتاردى جوسپارلاپ جانە ازىرلەنگەن جول كەستەسىن ۋاقىتشا پايدالانۋدى ۇسىنباقپىز.

–بەيبىتشىلىك كوشەسى جابىلسا, وسى جولمەن جۇرەتىن توعىز مارشرۋتتىڭ كەستەسى قالاي بولماق؟

–قالالىق قوعامدىق كولىكتەردىڭ ءجۇرۋ ءتارتىبى وزگەرتىلەدى. ماسەلەن, №9, 10, 23 مارشرۋت ءبىرجان سال كوشەسى – جەڭىس داڭعىلى – بوگەنباي باتىر داڭعىلى – بەيبىتشىلىك كوشەسى بويىنشا جۇرەدى. №13 مارشرۋت: كونستيتۋتسيا كوشەسى – جەڭىس داڭعىلى – بوگەنباي باتىر داڭعىلى; №14, 27 مارشرۋت: ءبىرجان سال كوشەسى – ەسەنبەرلين كوشەسى – رەسپۋبليكا داڭعىلى; №19 مارشرۋت: ءبىرجان سال كوشەسى – جەڭىس داڭعىلى – بوگەنباي باتىر داڭعىلى – رەسپۋبليكا داڭعىلى; №22 مارشرۋت: ءبىرجان سال كوشەسى – ەسەنبەرلين كوشەسى – رەسپۋبليكا داڭعىلى; №33 مارشرۋت: كونستيتۋتسيا كوشەسى – جەڭىس داڭعىلى – بوگەنباي باتىر داڭعىلى. كەرى باعىتتا دا وسى قوزعالىس ساقتالادى. ءدال وسى سياقتى ميرزويان كوشەسىمەن جۇرەتىن №14 جانە №26 مارشرۋت باعىتى ءسال وزگەرەدى. №12 مارشرۋت تۇران داڭعىلى – سارايشىق كوشەسى – قابانباي باتىر داڭعىلى ارقىلى د.قوناەۆ كوشەسىنە شىعا الادى. №35 مارشرۋت قابانباي باتىر داڭعىلى بويىمەن سارايشىق كوشەسىنە ءتۇسىپ, سىعاناق كوشەسىنە جەتە الادى.

–بۇل كوشەلەردىڭ بويىندا كوپتەگەن مەكەمەلەر مەن تۇرعىن ۇيلەر ورنالاسقان. جولداردىڭ جابىلۋىنا بايلانىستى اقپارات جەتكىزىلدى مە؟

–جول جوندەلەتىن جانە ۋاقىتشا قوزعالىس شەكتەلگەن اۋداندا ورنالاسقان مەكەمەلەر مەن تۇرعىندارعا اينالىپ ءوتۋ كەستەسىمەن قوسا اقپاراتتىق پاراقتار تاراتىلادى. وسى رەتتە ۋاقىتشا قولايسىزدىقتار ءۇشىن تۇرعىنداردىڭ تۇسىنىستىك تانىتقانى ابزال.

–اڭگىمەڭىزگە راحمەت!

گۇلميرا ايماعانبەت