اسا قامقور, ەرەكشە مەيىرىمدى اللانىڭ اتىمەن باستايمىن!
ادامزات بالاسى قاۋىمداسىپ, ءبىر مەكەنگە توپتاسىپ ءومىر سۇرۋگە بەيىم جاراتىلعان. بۇلاي ءومىر ءسۇرۋدىڭ دە وزىندىك حيكمەتى بار. ەگەر قايسىبىر قاۋىمنىڭ ءومىر تىرشىلىگىندە بىرلىك, ىنتىماق, يماندىلىق, ءوزارا كەلىسىم, ورتاق تۇسىنىك, تاعى باسقا قۇندىلىقتار باستى ورىنعا قويىلسا, سول حالىقتىڭ بەرەكەسى ارتىپ, عيبراتتى عۇمىر كەشەدى.
تۇراقتىلىق بار جەردە تاتۋلىق ورنايدى. تاتۋلىق بار جەرگە اللا بەرەكە ءناسىپ ەتەدى. ىنتىماعى ىدىراعان ەلدەن ىرىس تا كەتەدى. ءبىز مۇنداي جاعدايدى الىستاعى ەلدەن ەمەس, جاقىنداعى كورشىلەرىمىزدەن-اق كورىپ وتىرمىز.
ەلىمىزدەگى مەشىتتەر مەن مەدرەسەلەردىڭ, ءدىني وقۋ ورىندارىنىڭ جۇمىسىن قاداعالاپ, باقىلاپ-باسقارىپ وتىرۋ مىندەتى ماعان جۇكتەلگەننەن كەيىن جاماعاتتى ءدىني سالاداعى كەيبىر نازىك ماسەلەلەرگە ءاردايىم بايىپپەن, سابىرمەن قاراۋعا شاقىرامىن.
ءدىن تەك بىرلىك پەن بەيبىتشىلىك ورناعان ەلدە قانات جايادى. مۇنى استە ۇمىتپاۋىمىز قاجەت. بۇلىك بار جەردە بەرەكە كەتەدى. ونداي ورتادا ءدىندى ۇستانۋ بىلاي تۇرسىن, ادامنىڭ كۇندەلىكتى ومىرىنە قاۋىپ تونبەي مە؟
ءححى عاسىر وسىنداي كۇيگە دۋشار بولعان ميلليونداعان حالىقتىڭ بۇگىنگى مازاسىز ءومىر تىرشىلىگىنە كۋا. اللا ەلشىسىنىڭ «كوپشىلىكپەن بىرگە بولىڭدار, بولىنۋدەن ساقتانىڭدار» دەپ بۇيىرۋىندا ۇلكەن عيبرات بار. مۇندايدا حالقىمىز «ءبولىنگەندى ءبورى جەيدى» دەمەي مە؟!
ءدىن – ادامدى اللانىڭ دانالىققا قۇرىلعان تاڭعاجايىپ جاراتىلىسىنان عيبرات الۋعا, ىزگىلىككە باستايتىن ۇلى جول. يماندىلىق –ادامعا ەكى دۇنيەنىڭ قۋانىشى مەن سىيىنا, باقىتى مەن بەرەكەتىنە جەتەلەپ, جاقسىلىققا ۇندەيدى, ادامنىڭ بۇكىل ءومىرىن, امالىن ىزگىلىككە, قايىرىمدىلىققا باعىتتايدى.
ءدىن – بۇكىل الەمدە ادامداردىڭ رۋحاني دۇنيەتانىمىن بايىتىپ, جەر بەتىندەگى ادامزات قاۋىمىنىڭ يگىلىكتە ءومىر سۇرۋىنە ىقپال ەتەتىن قۋاتتى كۇش.
سوندىقتان سول كۇشتى ادامدار اراسىنداعى دوستىق پەن ىنتىماققا جانە مەملەكەتىمىزدىڭ دامۋىنا جۇمساۋىمىز قاجەت. ال ءوزارا كەلىسىم مەن جاراسىمدىلىققا يسلام ءدىنىنىڭ قوسار ۇلەسى ولشەۋسىز.
اللا تاعالا قاسيەتتى قۇراندا «مايدا» سۇرەسىنىڭ 2-اياتىندا ادامزات بالاسىنا «ىزگى ىستەرگە, تاقۋالىققا كومەكتەسىڭدەر. كۇنا جاساۋعا, دۇشپاندىققا جاردەمشى بولماڭدار…» دەپ بۇيىرعان.
ءبىز حالىقتاردى بىرلىككە, ىزگىلىككە, قايىرىمدىلىققا شاقىرۋدا ءدىني تۇلعالاردىڭ ايرىقشا ءرولىن ەسكەرىپ, يمامداردىڭ الەۋەتىن, قابىلەتى مەن تاجىريبەسىن ارتتىرۋعا باسا نازار اۋدارىپ كەلەمىز.
ەلباسى جىل سايىنعى جولداۋلارىندا حالقىمىزدىڭ رۋحاني ومىرىنە, ماسەلەن, وتباسى قۇندىلىعىن ارتتىرۋ, جات اعىمنان الىس بولۋ, بىرلىكتى ساقتاۋ, قايىرىمدىلىق جاساۋ, مەيىرىمدى بولىپ, كەشىرىم جولىن ۇستانۋ سەكىلدى ساۋاپتى امالدارعا دا ءمان بەرەدى.
پرەزيدەنتىمىز جاھاندىق جانە ىشكى سىن-قاتەرلەرگە جاۋاپ بەرەتىن, سونىمەن قاتار جاڭا تاريحي جاعدايلاردا ۇلتىمىزدىڭ دامىعان مەملەكەتتەردىڭ وتىزدىعىنا كىرۋ جونىندەگى «100 ناقتى قادام» جوسپارىن جاريالادى. بۇل باعدارلاما كۇردەلى كەزەڭنەن سەنىمدى وتۋگە جاعداي تۋعىزاتىن بولادى. وسى قۇجاتتا الەۋمەتتىك كومەك, ساپالى ءبىلىم بەرۋ, ساپالى مەديتسينالىق كومەك سىندى حالىققا قاجەتتى مەملەكەتتىك قولداۋلار ايتىلدى. ساپالى ءبىلىم العان, دەنى ساۋ ادام ەلدىڭ يگىلىگى مەن وركەندەۋىنە كوبىرەك ۇلەس قوساتىنى داۋسىز.
وسى تۇرعىدا ەلباسىمىزدىڭ باستاماسىن قولداۋ ماقساتىندا ءمۇفتيات تاراپىنان يمامداردىڭ ءدىني جانە زايىرلىلىق ساۋاتتىلىعىن ارتتىرۋعا باسا ءمان بەرىلۋدە. قازىرگى تاڭدا كوپتەگەن يمامدارىمىز ءدىني بىلىمدەرىمەن قوسا زايىرلىلىق ءبىلىم الۋعا كوپتەپ تالپىنىس بىلدىرۋدە. حالقىمىزعا ساپالى قىزمەت كورسەتۋ – يمامدارىمىزدىڭ باستى مىندەتى.
مەملەكەت باسشىلىعى ەشقاشان جەتى رەت ولشەپ, ءبىر رەت كەسپەي شەشىم قابىلدامايدى. باسشىعا باعىنۋ – كامىل مۇسىلماننىڭ ءبىر پارىزى, ال باسشىلىق قاشاندا حالىقتىڭ يگىلىگىنە جارايتىن شەشىمدەر قابىلدايدى. سوندىقتان قازىرگى تاڭداعى قوعام ىشىندە تۋىنداپ جاتقان ءتۇرلى ماسەلەلەرگە كەڭ تۇسىنىستىكپەن قاراپ, ەل ىشىندە تىنىشتىقتى, اۋىزبىرلىكتى ساقتاپ ۇيىمشىلدىققا ۇيىتقى بولۋعا ۇلەس قوسۋ, ءاربىر مۇسىلماننىڭ مىندەتى بولىپ تابىلادى.
قازىرگى كۇنى ءبىزدىڭ قوعامىمىزدا جەر ماسەلەسىنە قاتىستى جۇرتشىلىق تاراپىنان تۋىنداعان الاڭداۋشىلىقتارعا بايلانىستى جەر كودەكسىنىڭ جەكەلەگەن باپتارىنا ەلباسىمىز موراتوري جاريالاعاندىعى ءدۇيىم جۇرتقا ءمالىم. سوندىقتان جەر ماسەلەسىن پرەزيدەنت ايتقانداي اقىلعا سالىپ, قوعامدىق تالقىدان وتكىزىپ وڭتايلى شەشىم جولىن ۇسىنۋىمىز قاجەت.
ءاربىر ادامنىڭ جانى, ءومىرى وزىنە امانات بولسا, بۇگىنگى ادامزات قوعامىن تۇتاس قالىپتا, دۇرىس باعىتتا ۇستاپ تۇرۋ دا – بارشاعا امانات ەكەندىگىن ۇمىتپايىق. قازاق ەلىنىڭ ىشكى تۇتاستىعى مەن قاۋىپسىزدىگىن, تىنىشتىعىن ساقتاۋدا قۇلداي ەڭبەك ەتىپ, كوزىمىزدىڭ قاراشىعىنداي قورعاۋىمىز – ازاماتتىق پارىزىمىز ءھام مۇسىلماندىق مىندەتىمىز.
ءبىزدىڭ نەگىزگى باعىتىمىز – ءدىني, رۋحاني سالا بولعاندىقتان, ەلىمىزدىڭ رۋحاني دامۋى جولىندا ەڭبەك ەتىپ كەلەمىز. ويتكەنى, حالىقتىڭ يمانى مەن رۋحانياتى ارتسا, ەلىمىز دە وركەندەيدى.
بەيبىت زاماندى باستى بايلىعى ساناعان حالقىمىز قاشاندا تاتۋلىقتى تۇعىرىنا اينالدىرعان.
تاريحتان بەلگىلى, حالىقتىڭ بولاشاعىن ويلاعان ءدىن قايراتكەرلەرى دە تاتۋلىق پەن بىرلىكتى باستى باعدار ەتكەن. حالىقتار بىرلىگى – بارىنەن قىمبات قازىنا دەپ ساناعان.
ارداقتى پايعامبارىمىز مۇحاممەد (اللانىڭ وعان سالاۋاتى مەن سالەمى بولسىن) مۇسىلماندىقتىڭ ىرگەتاسىن بىرلىكپەن بەكىتكەن. اللا ەلشىسىنىڭ تايپالار مەن رۋلاردى ءبىر ماقساتقا بىرىكتىرۋى – كەز كەلگەن باسشىعا باسقارۋ ىسىندە ۇلكەن باعدار بولارى حاق.
حالقىمىزدا «بايلىق – بايلىق ەمەس, بىرلىك – بايلىق» دەگەن قاناتتى ءسوز بار. اللا تاعالا بارشا ادامعا قۇران كارىمدە حۋجۋرات سۇرەسىنىڭ 10-اياتىندا «شىن مانىندە, مۇمكىندە اعايىندار. سوندىقتان دا اعايىن اراسىن تۇزەتىڭدەر…» دەپ بۇيىرعان.
ءاربىر پاراساتتى پەندە الەمدەگى قارجىلىق داعدارىس پەن ادامدار اراسىنداعى ادىلەتسىزدىك, وتباسىلىق كۇيرەۋ, الەۋمەتتىك كەلەڭسىزدىكتەر سەكىلدى ماسەلەدەن قۇتىلۋدىڭ ءبىر عانا جولىن ءتۇسىندى. ول – رۋحاني قۇندىلىقتاردى ءبىرىنشى ورىنعا شىعارۋ.
بۇگىندە قوعام ءدىننىڭ ادامگەرشىلىك قۇندىلىقتارىنا مۇقتاج. ال وسىنداي رۋحاني كۇيزەلىس ساتتەرىندە ءدىن, زيالى قاۋىم وكىلدەرىنىڭ بەلسەندى جۇمىستارىنا ءۇمىت ارتىلادى. قامىققانعا قامقور بولۋ – ول دا پاراساتتى ادامنىڭ اسىل پارىزى ەمەس پە؟ ەندەشە, ىزگى ىستەردە ءبىر-بىرىمىزگە كومەكشى بولايىق, باۋىرلار!
اللا ەلشىسىنىڭ: «بەرگەن قول العان قولدان جوعارى» دەگەن وسيەتىن نەگىزگە الا وتىرىپ, ءاردايىم مەملەكەتىمىزدەن قول جايىپ سۇراي بەرمەي, ءبىز مەملەكەتىمىزگە نە بەرە الدىق, وتان ءۇشىن نە ىستەدىك دەگەن سۇراقتار ءاربىر مۇسىلماندى مازالاۋى قاجەت.
ەلىمىزدەگى ءاربىر كاسىپ نەمەسە ماماندىق يەسى ءوز سالاسى بويىنشا ەڭ ساپالى تۇردە قىزمەت ەتەر بولسا ەلباسىمىز مەجە ەتىپ كورسەتكەن دامىعان وتىز ەلدىڭ قاتارىنا ەنۋىمىزدىڭ اۋىلى الىس ەمەس ەكەندىگى – بارشامىزعا بەلگىلى جايت.
اللا تاعالا حالقىمىزعا باق-بەرەكە بەرگەي. جەر بەتىندە تىنىشتىق ورناپ, قاشاندا تاتۋ عۇمىر كەشۋدى ءناسىپ ەتكەي. تاۋەلسىزدىگىمىزدىڭ تۇعىرى بيىك, مۇسىلماندىق مۇراتىمىز اسىل, دۇعامىز قابىل بولعاي! ءامين!
ەرجان قاجى مالعاجىۇلى,
قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي
