برازيليا جاڭا پرەزيدەنتىن سايلادى
برازيليا ەلىنىڭ جاڭا باسشىسى بولىپ جاير بولسونارۋ سايلاندى. BBC مالىمەتى بويىنشا ول سايلاۋدا 55,2 پايىز داۋىس جيناپ, جەڭىسكە جەتتى.
سايلاۋ بارىسىندا ونىڭ باستى قارسىلاسى فەرناندۋ ادداد 44,8 داۋىس جيناعان. ول الدىن الا داۋىس بەرۋ ناتيجەسى انىقتالعان سوڭ وپپوزيتسياعا كەتەتىنىن مالىمدەدى. ال جاير بولسونارۋ بولسا العاشقى كەزەڭدە دە كوش باستاعان بولاتىن. جەڭىسكە جەتكەن سوڭ مەملەكەتتى ءىنجىل كىتابى مەن كونستيتۋتسيا زاڭىنىڭ تالاپتارى بويىنشا باسقاراتىنىن جەتكىزدى. جاڭا پرەزيدەنتتى ۇلىقتاۋ سالتاناتى 2019 جىلدىڭ 1 قاڭتارىندا وتەدى. برازيليادا مەملەكەت باسشىسى ءتورت جىلدا ءبىر رەت سايلانادى. قازىرگى ۋاقىتتا بۇل قىزمەتتى 2016 جىلعى يمپيچمەنتتەن كەيىن ميشەل تەلمەر اتقارىپ كەلەدى.
ۇشاق اپاتقا ۇشىرادى
يندونەزيادا دجاكارتادان پانكالپينانگ قالاسىنا باعىت العان Lion Air اۋە كومپانياسىنىڭ Boeing 737 MAX 8 جولاۋشىلار ۇشاعى اپاتقا ۇشىرادى.
ۇشاق اۋەگە كوتەرىلگەن سوڭ 13 مينۋتتان كەيىن رادار بەتىنەن جوعالىپ كەتكەن. كوپ ۇزاماي, ياۆا ارالىنىڭ باتىس جاعالاۋىنداعى تەڭىزگە قۇلاپ كەتكەنى بەلگىلى بولدى. RT مالىمەتى بويىنشا, ونىڭ بورتىندا 181 جولاۋشى, 2 ۇشقىش پەن 6 ەكيپاج مۇشەسى بولعان. يندونەزيا بيلىگى ەشكىمنىڭ امان قالماعانىن مالىمدەدى. قازىرگى ۋاقىتتا قۇتقارۋشىلار توبى 6 ادامنىڭ ءمايىتىن تاپتى. اۋە كولىگى سۋ استىندا شامامەن 30-35 مەتر تەرەڭدىكتە جاتىر. اپاتتىڭ سەبەبى ازىرگە بەلگىسىز. قازاقستان رەسپۋبليكاسىنىڭ سىرتقى ىستەر مينيسترلىگى ونىڭ ىشىندە قازاقستاندىقتاردىڭ جوق ەكەندىگىن حابارلادى.
سولتۇستىك كوريا قىسپاقتان شىعا ما؟
سولتۇستىك كورەيا باسشىسى كيم چەن ىن 2019 جىلى ءوز ەلىنە سالىنعان حالىقارالىق سانكتسيالار كۇشىن جوياتىنىن ءمالىم ەتتى.
Lenta اگەنتتىگىنىڭ حابارلاۋىنشا, سولتۇستىككورەيالىق شەنەۋنىكتەر مەن مەملەكەتتىك كاسىپورىندار قىتايلىق ءارىپتەستەرىمەن سەرىكتەستىك بايلانىس ورناتۋعا قىزىعۋشىلىق تانىتىپ وتىر. قىتاي بيلىگى سولتۇستىك كورەيامەن اراداعى شەكارا باقىلاۋىن ايتارلىقتاي السىرەتكەن. ناقتىراق ايتقاندا, كحدر-عا جىبەرىلەتىن جۇك بۇرىنعىداي تەكسەرىستەن وتپەيدى. سول سياقتى بۇل ەل قىتايلىق مامانداردى ەلەكتروەنەرگەتيكا, جەڭىل ونەركاسىپ سەكىلدى سالالاردى دامىتۋعا شاقىرماق.
كحدر-عا حالىقارالىق سانكتسيا العاش رەت 2006 جىلى بۇۇ كولەمىندە سالىنعان. ال 2016 جىلى اقش بۇل شەكتەۋدى كۇشەيتە تۇسكەن.
