2013 جىلدىڭ 7 ماۋسىمىندا اۋىر ناۋقاستان سوڭ 82 جاسقا قاراعان شاعىندا بەلگىلى كەڭەس-پارتيا قىزمەتكەرى, قر دەربەس زەينەتكەرى ماعاۋيا سەيىلقىزى ەسماعامبەتوۆا ومىردەن وزدى.
م.س. ەسماعامبەتوۆا 1932 جىلدىڭ 15 ساۋىرىندە رەسەيدىڭ قورعان وبلىسىنىڭ قۇرتامىش اۋدانىنداعى بەلوە سەلوسىندا دۇنيەگە كەلدى. وسىدان از ۋاقىتتان كەيىن اتا-اناسى جانە باۋىرلارىمەن قازاقستاننىڭ قوستاناي وبلىسىنا قونىس اۋدارىپ, تۇراق تاپتى. وسى جەردە ورتا مەكتەپتى اياقتاپ, جاس كەزىنەن قوعامدىق جۇمىستارعا تارتىلدى. الدىمەن پيونەرۆوجاتىي بولدى, ال 1950 جىلدان باستاپ ۇزىنكول اۋداندىق كومسومول كوميتەتىنىڭ ءبىرىنشى حاتشىسى بولسا, كەيىننەن قازاقستان لكسم قوستاناي وبكومىنىڭ ءبىرىنشى حاتشىسى قىزمەتىن اتقاردى.
ودان كەيىنگى كوپ جىلعى قىزمەتى ەسىل بويىنداعى تىڭ ولكەسىمەن بايلانىستى بولىپ, وسى جەردە 1961 جىلدىڭ ناۋرىز ايىندا, بار بولعانى 28 جاسىندا تسەليننىي ولكەلىك اتقارۋ كوميتەتى توراعاسىنىڭ ورىنباسارى قىزمەتىنە سايلاندى. بۇل ولكە جويىلعاسىن تسەلينوگراد وبلىستىق اتقارۋ كوميتەتى توراعاسىنىڭ ورىنباسارى, ودان سوڭ قازاقستان كومپارتياسى تسەلينوگراد وبلىستىق پارتيا كوميتەتىنىڭ حاتشىسى بولدى.
سول جىلدارى جوعارى, جاۋاپتى باسشىلىق قىزمەتتەردە بولعان از ايەلدەردىڭ قاتارىنا ەنىپ, وزىنە جۇكتەلگەن مىندەتتەردى ابىرويمەن اتقاردى.
ماعاۋيا سەيىلقىزى 30 جىلعا جۋىق ۋاقىت الەۋمەتتىك سالانىڭ ءبىلىم بەرۋ, دەنساۋلىق ساقتاۋ, عىلىم مەن مادەنيەت سەكىلدى كۇردەلى ۋچاسكىلەرىنە جاۋاپتى بولىپ, وسى اسا ماڭىزدى سالالاردىڭ دامۋىنا بارلىق جانىن سالدى, ماتەريالدىق بازالارىنىڭ نىعايۋى, حالىققا قىزمەت كورسەتۋ جۇمىسىنىڭ جاقسارۋى, باسشىلىق كادرلار مەن مامانداردىڭ ىرىكتەلۋى ءۇشىن ايانباي اتسالىستى.
تسەلينوگراد قالاسىنىڭ ءتورت جوو-نىڭ, مەكتەپتەردىڭ, ورتا ارناۋلى وقۋ ورىندارى مەن كاسىپتىك ۋچيليششەلەرىنىڭ, كوپتەگەن مادەني وشاقتاردىڭ, ەمحانالار مەن اۋرۋحانا كەشەندەرىنىڭ, باسقا دا نىسانداردىڭ اشىلۋى مەن قالىپتاسۋى ونىڭ ەسىمىمەن تىعىز بايلانىستى.
ماعاۋيا سەيىلقىزىنىڭ باستاماسىمەن ءارى باسشىلىعىمەن وقۋشىلاردى ەڭبەككە باۋلۋ بويىنشا ەداۋىر جۇمىستار اتقارىلدى, وقۋشىلىق وندىرىستىك بريگادالارى, مەكتەپارالىق, وقۋ-وندىرىستىك كومبيناتتارى قۇرىلدى, جاستاردى ەڭبەككە باۋلۋ, تاربيەلەۋ جانە كاسىبي باعدار بەرۋ بويىنشا تۇتاس جۇيە قۇرىلدى. بۇل جۇيە رەسپۋبليكامىزدا عانا ەمەس, بۇكىل قسرو-دا سۇرانىسقا يە بولدى.
ونىڭ بويىنان ۇلكەن ۇيىمداستىرۋشىلىق قابىلەت, ىسكەرلىك, ادالدىق پەن تازالىق پەن تالاپشىلدىق قاسيەتتەر مولىنان تابىلاتىن. ول ادامداردى جاندىرا بىلەتىن, جوسپارلار مەن تاپسىرمالاردى ورىنداۋعا جىگەرلەندىرەتىن, ولاردىڭ ىسكە اسىرىلۋىن قامتاماسىز ەتەتىن.
زەينەتكەرلىككە شىققاسىن ماعاۋيا سەيىلقىزى ارداگەرلەر قوزعالىسى جۇمىسىنا بەلسەنە ارالاسىپ, اقمولا وبلىستىق ارداگەرلەر كەڭەسى ءتوراعاسىنىڭ ورىنباسارى, كەيىننەن كەڭەس ءتورايىمى, رەسپۋبليكالىق ارداگەرلەر ۇيىمى ورتالىق كەڭەسىنىڭ مۇشەسى بولىپ, ءوڭىردىڭ ارداگەرلەر ۇيىمدارى جۇمىسىنا كوپتەگەن يگى جاڭالىقتاردى ەنگىزەدى.
ونىڭ قىزمەتىن رەسپۋبليكا جوعارى باعالاپ, ءۇش ەڭبەك قىزىل تۋ وردەنىمەن, ءۇش «قۇرمەت بەلگىسى» وردەنىمەن, حالىقتار دوستىعى مەن «قۇرمەت» وردەندەرىمەن, كوپتەگەن مەدالدەرمەن ماراپاتتالدى. ول بىرنەشە مارتە كومسومولدىق, پارتيالىق باسشىلىق ورگانداردىڭ قۇرامىنا ەندى.
الدىنا جوعارى ماقسات قويا بىلگەن ادام, نىق مورالدىق پرينتسيپتەر مەن ازاماتتىق ۇستانىمنىڭ يەسى م.س.ەسماعامبەتوۆانىڭ جارقىن بەينەسى ونى بىلگەندەر مەن بىرگە جۇمىس ىستەگەندەردىڭ جۇرەكتەرىندە ماڭگىگە قالادى.
اقمولا وبلىسى اكىمشىلىگى
اقمولا وبلىستىق ءماسليحاتى
«ارداگەرلەر ۇيىمى» رقب وبلىستىق جانە ورتالىق كەڭەستەر
