تاۋەلسىزدىك كۇنى قارساڭىندا ەلدىڭ الەۋمەتتىك-ەكونوميكالىق جانە مادەني دامۋىنا, حالىقتار اراسىنداعى دوستىق پەن ىنتىماقتاستىقتى نىعايتۋعا ۇلەسىن قوسىپ جۇرگەن ازاماتتار مەملەكەتتىك ناگرادالارمەن ماراپاتتالدى. ولاردىڭ قاتارىندا مادەنيەت, عىلىم, ءبىلىم, دەنساۋلىق ساقتاۋ قايراتكەرلەرى, وندىرىستىك سالا, بيزنەس وكىلدەرى, قۇقىق قورعاۋ ورگاندارىنىڭ قىزمەتكەرلەرى, اسكەري قىزمەتشىلەر, سپورتشىلار, سوعىس جانە ەڭبەك ارداگەرلەرى بار.
ماراپات يەلەرىنىڭ ءبىر توبىن مەملەكەت باسشىسى نۇرسۇلتان نازارباەۆ اقوردادا قابىلداپ, ناگرادالاردى ءوز قولىمەن تابىس ەتتى.
ەلباسى قۇتتىقتاۋ سوزىندە: «بيىل ءبىز تاۋەلسىزدىگىمىزدىڭ 21 جىلدىعىن اتاپ وتەمىز. وسى 21 جىل ىشىندە تورتكۇل دۇنيە قازاقتى تانىپ ءبىلدى, مويىندادى. بۇل بۇگىنگە دەيىنگى تاريحتا بولماعان نارسە. مۇنداي جەتىستىككە تاۋەلسىزدىكتىڭ ارقاسىندا جانە بارشا قازاقستاندىقتاردىڭ ەڭبەگىنىڭ ارقاسىندا قول جەتكىزىپ وتىرمىز» دەدى. كورسەتىلىپ جاتقان سىي-قۇرمەت پەن ماراپاتتى بۇكىل حالىققا كورسەتىلگەن ءىلتيپات دەپ قابىلداۋ قاجەتتىگىن ايتتى.
سالتاناتتى جيىندا «وتان» وردەنىمەن «سوكولوۆ-سارىباي كەن-بايىتۋ وندىرىستىك بىرلەستىگى» اق پرەزيدەنتى مۇحامەدجان تۋرداحۋنوۆ ماراپاتتالدى. «قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆ» وردەنى ەۋرازيالىق ەكونوميكالىق كوميسسيانىڭ ەنەرگەتيكا جانە ينفراقۇرىلىم بويىنشا القا مۇشەسى دانيال احمەتوۆ پەن الماتى قالاسىنىڭ اكىمى احمەتجان ەسىموۆكە بەرىلدى.
ءى دارەجەلى «بارىس» وردەنىمەن «قازاقستان ەلەكتروليز زاۋىتى» اق پرەزيدەنتى الماز يبراگيموۆ, شىعىس قازاقستان وبلىسىنىڭ اكىمى بەردىبەك ساپارباەۆ, ءىى دارەجەلى «بارىس» وردەنىمەن ق.ي.ساتباەۆ اتىنداعى قازۇتۋ-دىڭ پروفەسسورى ابدىعاپپار ءاشىموۆ, قر مۇناي جانە گاز ءمينيسترى ساۋات مىڭباەۆ, ءىىى دارەجەلى «بارىس» وردەنىمەن «قازاقستان» رترك» اق ديرەكتورلار كەڭەسىنىڭ مۇشەسى – تاۋەلسىز ديرەكتورى سۇلتان ورازالى, ەڭبەك ارداگەرى كاكىمبەك سالىقوۆ ماراپاتتالدى.
سونداي-اق, «پاراسات» وردەنىن ەلباسى جامبىل وبلىسىنىڭ اكىمى قانات بوزىمباەۆقا, قر پرەمەر-ءمينيسترىنىڭ ورىنباسارى ەربول ورىنباەۆقا, «كارديوحيرۋرگيا ۇلتتىق عىلىمي ورتالىعى» اق باسقارما توراعاسى يۋري پياگە, قر وسك توراعاسى قۋاندىق تۇرعانقۇلوۆقا تاپسىردى.
ال, «قازاقستاننىڭ ەڭبەك سىڭىرگەن قايراتكەرى» قۇرمەتتى اتاعى ءانشى ديلناز احماديەۆاعا, قازاقستان جازۋشىلار وداعى باتىس قازاقستان وبلىسى بويىنشا فيليالىنىڭ ءتورايىمى اقۇشتاپ باقتىگەرەەۆاعا بەرىلدى.
سونىمەن قاتار ءىى دارەجەلى «داڭق» وردەنى قر قورعانىس ءمينيسترىنىڭ ورىنباسارى تالعات جانجۇمەنوۆكە, قر باس پروكۋرورىنىڭ ورىنباسارى نۇرماحانبەت يساەۆقا, قر باس پروكۋرورىنىڭ ورىنباسارى اندرەي كراۆچەنكوعا جانە قر رەسپۋبليكالىق ۇلان قولباسشىسىنىڭ ءبىرىنشى ورىنباسارى ەرمەك ۇكىباەۆقا تاپسىرىلدى.
ال, ادەبيەت پەن ونەر سالاسىنداعى مەملەكەتتىك سىيلىق بۇعان دەيىن بەلگىلى بولعانداي جازۋشى ءسابيت دوسانوۆقا, اقىن نەسىپبەك ايتۇلىنا, ءانشى الىبەك دىنىشەۆكە جانە سكريپكاشى گاۋھار مىرزابەكوۆالارعا تابىستالدى.
قازاق مۋزىكا ونەرىن دامىتۋعا جانە ونى كوپشىلىككە تاراتۋعا قوسقان ەرەكشە ۇلەسى, بەلسەندى شىعارماشىلىق, سونداي-اق پەداگوگيكالىق قىزمەتى ءۇشىن «قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ مەملەكەتتىك بەيبىتشىلىك جانە پروگرەسس» سىيلىعى قازاقستاننىڭ حالىق ءارتىسى ءجانيا اۋباكىروۆاعا بەرىلدى.
سۇلتان ورازالى, «قازاقستان» رترك» اق ديرەكتورلار كەڭەسىنىڭ مۇشەسى, ءىىى دارەجەلى «داڭق» وردەنىنىڭ يەگەرى:
– ءاربىر سانالى ازامات ءۇشىن حالقىنا قىزمەت ەتۋدەن ۇلكەن باقىت جوق. ال, سول ازىن-اۋلاق ەڭبەگىڭدى ەلىڭ, مەملەكەتىڭ قۇرمەتتەپ, ەلباسىڭ ماراپاتتاپ جاتسا, ناعىز باقىت سول دەپ بىلەمىن. ماراپاتقا يە بولعان ازاماتتار وسىنداي كۇيدى باسىمىزدان كەشىرىپ وتىرمىز. مۇنداي ماراپاتتاۋلار بار كەزدە «ەلىم» دەيتىن, «جەرىم» دەيتىن ازاماتتاردىڭ كوبەيە بەرەرى انىق.
نەسىپبەك ايتۇلى, اقىن, مەملەكەتتىك سىيلىق يەگەرى:
– تاۋەلسىز ەلىمىزدىڭ تاريحىنان بەرى قازاق ادەبيەتى, قازاق ونەرى ءۇشىن جاساپ كەلە جاتقان ۇشان-تەڭىز قامقورلىعى ءۇشىن ەلباسىعا مىڭ دا ءبىر راحمەتىمدى ايتقىم كەلەدى. ازات ەلدىڭ اقىنى ءۇشىن بايتاق ەلدىڭ باقىتىن جىرلاعاننان اسقان ابىروي جوق. قازاقستاننىڭ كەلەشەگىنە, ونىڭ ۇرپاقتارىنىڭ بولاشاعىنا قىزمەت ەتۋگە بىزدەر ارقاشان دايىنبىز.
يۋري پيا, «كارديوحيرۋرگيا ۇلتتىق عىلىمي ورتالىعى» اق باسقارما توراعاسى, «پاراسات» وردەنىنىڭ يەگەرى:
– ءبىز ادام ءومىرىن اجالدان اراشالايتىن جاۋاپتى وپەراتسيالاردى ءساتتى اتقارىپ ءجۇرمىز. ويتكەنى, مەملەكەت باسشىسىنىڭ تاپسىرماسىمەن وتاندىق مەديتسينا سالاسى زاماناۋي اپپاراتتارمەن تولىق جابدىقتالدى, قىزمەتكەرلەردىڭ دە بار جاعدايى جاسالدى. سوندىقتان, ءوزىمنىڭ كوماندامنىڭ اتىنان ەلباسى نۇرسۇلتان نازارباەۆقا شەكسىز العىسىمدى بىلدىرەمىن. ەندى الەم مەديتسيناسىنداعى بار جاڭالىق قازاقستاندا دا جۇزەگە اسىرىلاتىن بولادى.
شىنار دوسان
