الماتىداعى ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتىندە ماتەماتيكا مەن فيزيكا پاندەرىن اعىلشىن تىلىندە وقىتاتىن مۇعالىمدەر اراسىندا رەسپۋبليكالىق وليمپيادا ءوتتى.
يگىلىكتى شارا وسى سالادا ەڭبەك ەتىپ جۇرگەن ۇستازداردىڭ بەدەلىن كوتەرىپ, ولاردىڭ كاسىبي شەبەرلىگىن دامىتۋدى, ماتەماتيكا جانە فيزيكا مۇعالىمدەرىن اعىلشىن تىلىندە وقۋعا تارتۋدى كوزدەيدى. ءبىلىم باسەكەسىندە ەلوردادان بارعان ۇستازدار ۇجىمى, جالپى كوماندالىق ەسەپ بويىنشا, دارا شىعىپ, ءبىرىنشى ورىندى يەلەندى.
اسىرەسە, ەلىمىزدىڭ ءار تورابىنان بىلىمدىلەر جينالعان بايگەدەن ەلورداداعى «نۇروردا» مەكتەپ-ليتسەيىنىڭ ماتەماتيكا ءپانىنىڭ مۇعالىمى ايان ءسابيتوۆ ۇزدىكتەر قاتارىنان كورىنسە, №9 «زەردە» مەكتەبىنىڭ ۇستازى سامات ەسەنبەكوۆ پەن باس قالاداعى دارىندى ەر بالالارعا ارنالعان قازاق-تۇرىك ليتسەي-ينتەرناتىنىڭ وقىتۋشىسى بەك بازاتبەكوۆ ەكىنشى ورىنعا قول جەتكىزدى. باسقا دا كوماندا مۇشەلەرى ارنايى العىس حاتپەن ماراپاتتالدى. ءسويتىپ, ەلوردالىق ۇستازداردىڭ ءبىلىم سايىسىنان باعى جانىپ, ابىرويى اسقاقتاپ قايتتى.
ازامات قۇسايىن
