نايل نۋروۆ, «الاۋ» مۇزايدىنى سارايىنىڭ ديرەكتورى: ءالى تالاي رەكوردتار جاڭارتىلادى
– «الاۋ» مۇزايدىنى سارايى كونكي تەبۋدەن بارلىق قاشىقتىقتاعى ەڭ جوعارعى ناتيجە بويىنشا الەمدىك رەيتينگتە قاي ساتىدان كورىندى؟
– الەمدەگى 645 مۇز ايدىنى ءىشىنەن بارلىق قاشىقتىقتاعى ۋاقىت بويىنشا ەرلەر اراسىندا التىنشى ورىندى يەلەنسەك, ايەلدەر اراسىندا ون ءبىرىنشى تۇعىرعا جايعاستىق. بۇل – ۇلكەن كورسەتكىش. مۇنداي جەتىستىككە جەتۋدىڭ باستى سەبەبى – «الاۋ» جىلدام مۇز جاساۋعا ءمۇمكىندىك بەرەتىن زاماناۋي جوعارعى تەحنولوگيالىق قۇرال-جابدىقتارمەن جابدىقتالعان ءارى الەمدىك دەڭگەيدەگى ساراي. سوندىقتان, الداعى ۋاقىتتا ءبىزدىڭ ايدىندا ءالى تالاي رەكوردتار جاڭارتىلاتىنى ءسوزسىز.
– «الاۋ» العاش پايدالانۋعا بەرىلگەن ساتتەن باستاپ قانداي رەكوردتارعا قول جەتكىزدى؟
– الەمدىك تاجىريبەدە العاش اشىلعان مۇزايدىن سارايلارىنىڭ قادامى ءساتسىز بولىپ كەلەتىنى بەلگىلى. بۇل رەتتە ءبىزدىڭ «الاۋ» ءبىرىنشى كۇندەردىڭ وزىندە رەكوردتىق كورسەتكىشتەرگە قول جەتكىزدى. مەنىڭ ويىمشا, بۇل سارايدىڭ الەۋەتىنىڭ جوعارى ەكەنىن دالەلدەيدى. ويتكەنى, ءاربىر جارىس سوڭىندا جابدىقتار دالمە-ءدال كۇيگە كەلتىرىلىپ, ساپاسى ارتتىرىلادى, قۇرىلىس شاڭدارى تازارتىلىپ, سۋدىڭ ىڭعايلى پارامەترلەرى سۇرىپتالادى. سوندىقتان دا, ازيا ويىندارى كەزىندەگى 9 كونتينەنتتىك رەكورد, مامانداردىڭ ايتۋىنشا, اسار اسۋلاردىڭ شەگى ەمەس. مۇنى بۇگىنگى جەتىستىگىمىز دە ايقىنداپ بەردى.
– ايدىننىڭ جۇرت ءبىلە بەرمەيتىن قانداي ارتىقشىلىقتارى بار؟
– «الاۋ» – بۇل كاسىبي سپورتشىلارعا دا, اۋەسقويلارعا دا سپورتپەن اينالىسۋ ءۇشىن كەشەندى قىزمەتتەر ۇسىناتىن سپورتتىق ورتالىق. مۇندا ءىرى حالىقارالىق جارىستار, وقۋ-جاتتىعۋ جيىندارى وتكىزىلەدى. استانالىق وقۋشىلار كونكي تەبۋ, ءمانەرلەپ سىرعاناۋ جانە حوككەي سپورتى بويىنشا جاتتىعادى. الەم كۋبوگى وتكىزىلگەننەن كەيىن جەڭىمپازدار ايدىنى اۋەسقويلارعا دا قولجەتىمدى بولدى, ياعني, جاپپاي سىرعاناۋ كۇندەرى مۇندا سيمۆولدىق قۇنى ءۇشىن ءار قالاۋشى ءوز كونكيىمەن كىرە الادى. بۇل ءوز كەزەگىندە استانادا بۇقارالىق سپورت ءتۇرىن دامىتۋعا مۇمكىندىك دەپ ويلايمىن. سونىمەن قاتار, فيتنەس-ورتالىق, امبەباپ سپورت زال, سپا-ورتالىق, ءتورت جۇلدىزدى قوناق ءۇي, مەيرامحانا ەسىگى استانالىقتار مەن قالا قوناقتارىنا ءاردايىم اشىق.
