يندونەزيانىڭ جاكارتا جانە پالەمبانگ قالالارىندا ءوتىپ جاتقان ازيا ويىندارىندا ەل قورجىنىنا تۇسكەن جۇلدەلەر سانى 33-كە جەتتى. ازيادادا قازاقستان كومانداسىنىڭ ەنشىسىندە – 3 التىن, 7 كۇمىس جانە 23 قولا مەدال. جۇلدە سانى ايتارلىقتاي بولعانىمەن, كوماندالىق ەسەپتە ءالى دە وندىقتان ويىپ تۇرىپ ورىن الا الماي جاتىرمىز.
22 تامىز كۇنى ەل قورجىنىنا گرەك-ريم كۇرەسىنەن ءۇش بالۋان ولجا سالدى. اسا اۋىر سالماقتا نۇرماحان تىناليەۆ فينالدا وزبەك بالۋانىنان جەڭىلىپ, كۇمىس جۇلدەگەر اتاندى. 97 كگ سالماقتا ەرۇلان ىسقاقوۆ قولا جۇلدە ءۇشىن ايقاستا يراندىقتان باسىم ءتۇستى. ال 87 كگ تارتاتىن ازامات قۇستىباەۆ جۇبانىش بەلدەسۋدە قىرعىزدى جەڭدى.
23 تامىز, بەسىنشى كۇن
ادىلبەك مۋسين – قولا جۇلدەگەر. ول 50 مەترگە باتتەرفلياي ادىسىمەن جۇزۋدەن جۇلدەگەر اتاندى. كورسەتكىشى – 23,73. بۇل – وسى قاشىقتىقتاعى قازاقستاننىڭ رەكوردى.
ەراسىل قايىربەك – قولا جۇلدەگەر. تاەكۆوندودان 68 كگ سالماقتا كەزەكتى جۇلدە ءتۇستى. ەراسىل جارتىلاي فينالدا كورەيالىققا جول بەرىپ, قولانى قاناعات تۇتتى.
ماريا دميتريەنكو – قولا جۇلدەگەر. ول ستەند اتۋدان «دۋبل-تراپ» باعدارلاماسى بويىنشا 125 ۇپاي جيناپ, ۇزدىك ۇشتىككە ەندى.
الەكسەي لۋتسەنكو – التىن جۇلدەگەر. ەل قورجىنىنا كوپ كۇتتىرگەن ەكىنشى التىن ۆەلوسپورتتان ءتۇستى. الەكسەي توپتىق جارىستا 150 شاقىرىمدى 3:25:25 ۋاقىت كورسەتكىشىمەن باعىندىرىپ, چەمپيون اتاندى.
الەكساندر وپاچانوۆا – قولا جۇلدەگەر. ول پالەمبانگتا وتكەن اكادەميالىق ەسۋدەن قىتاي جانە تايپەي سپورتشىلارىنان كەيىن مارەگە ءۇشىنشى بولىپ كەلدى.
24 تامىز, التىنشى كۇن
اننا دانيلينا مەن گوزال اينيتدينوۆا جۇبى – قولا جۇلدەگەر. جۇپتاسىپ سىنعا تۇسكەن ولار جارتىلاي فينالدا تايپەي سپورتشىلارىنان 2:0 ەسەبىمەن ۇتىلىپ قالدى. ءسويتىپ قولا مەدال بۇيىردى. بۇل – قازاقستاندىق تەننيسشىلەردىڭ ازيا ويىندارىنداعى العاشقى جۇلدەسى.
دەنيس ەۆسەەۆ پەن الەكساندر بۋبليك جۇبى – كۇمىس جۇلدەگەر. جەتىنشى كۇمىستى جۇپتاسىپ ونەر كورسەتكەن تەننيسشىلەرىمىز الدى. ولار فينالدا ءۇندىستان كومانداسىنا ەسە جىبەردى.
الەكسەي لۋتسەنكو – ەكى دۇركىن التىن جۇلدەگەر. ءبىر كۇن بۇرىن التىننان القا تاققان بۇل وتانداسىمىز ۆەلوسپورتتىڭ جەكەلەي سىنىندا ءوز مىقتىلىعىن تاعى ءبىر دالەلدەدى. ول 40 شاقىرىمدى 55:37:13 ۋاقىت كورسەتكىشىمەن ءبىرىنشى بولىپ باعىندىرىپ, بۇل ازيادادا ەكىنشى رەت چەمپيون اتاندى.
دميتري بالاندين – قولا جۇلدەگەر. ريو وليمپياداسىنىڭ چەمپيونى بۇل باسەكەدە ەكىنشى قولاسىن 50 مەترگە براسس ادىسىمەن ءجۇزىپ الدى. ال ونىڭ وڭ جامباسىنا كەلەتىن 200 مەترگە جۇزۋگە جاراقاتىنا بايلانىستى قاتىسپايدى.
اننا دانيلينا مەن الەكساندر نەدوۆەسوۆ جۇبى – قولا جۇلدەگەر. بۇل جۇپ جارتىلاي فينالدا تايلاند قۇراماسىنان جەڭىلدى. ءسويتىپ قازاقستان تەننيسشىلەرى ازيادانى ءبىر كۇمىس, ەكى قولا جۇلدەمەن اياقتادى.
نۇرجان سەيدۋالي – قولا جۇلدەگەر. دجيۋ-دجيتسۋدان 56 كگ سالماقتا سىنعا تۇسكەن سپورتشىمىز وزبەك اكمال ءاميروۆتى جەڭىپ, قولاعا قول جەتكىزدى.
نارتاي قاجەكوۆ – قولا جۇلدەگەر. دجيۋ-دجيتسۋدان كەلەسى قولانى يەلەنگەن وتانداسىمىز 69 كگ سالماقتا باق سىناپ, سوڭعى كەزدەسۋىندە تۇركىمەنستان وكىلىن ۇتتى.
دايىنداعان ورىنبەك وتەمۇرات
دەرەككوزى – olimpic.kz
