س.سەيفۋللين اتىنداعى قازاق اگروتەحنيكالىق ۋنيۆەرسيتەتىندە «ءبىلىم كۇنىنە» ارنالعان «قازاتۋ – بولاشاق باستاۋى» اتتى سالتاناتتى شارا ءوتتى. جيىنعا ۋنيۆەرسيتەت رەكتورى ا. كۇرىشباەۆ, پارلامەنت ءماجىلىسىنىڭ دەپۋتاتتارى ج. احمەتبەكوۆ, ب. سماعۇلوۆ, اكادەميك ز.دۇيسەنبەكوۆ جانە تاعى باسقا مارتەبەلى مەيماندار قاتىستى.
ءوز سوزىندە ۋنيۆەرسيتەت رەكتورى, پروفەسسور اقىلبەك كۇرىشباەۆ «بيىلعى جىلى ءبىزدىڭ ۋنيۆەرسيتەتىمىز اگرارلىق سالاداعى بارلىق وقۋ ورىندارىنىڭ الدىڭعى قاتارىنان ورىن الدى. 2013-2014 وقۋ جىلى ۋنيۆەرسيتەتتىڭ ءبىرىنشى كۋرسىنا 2804 ستۋدەنت قابىلدانسا, ولاردىڭ 1343-ءى – مەملەكەتتىك گرانتقا يە بولعاندار. ياعني, ستۋدەنتتەردىڭ 47,9 پايىزى مەملەكەتتىك گرانتپەن وقيدى دەگەن ءسوز. بۇل كورسەتكىش وقۋ ورداسىنىڭ جاستار قالاۋىنا يە بەدەلدى وقۋ ورنى ەكەنىن دالەلدەيدى» دەپ اتاپ ءوتتى.
سالتاناتتى جيىن بارىسىندا ستۋدەنتتەردىڭ www.univerlife.kz الەۋمەتتىك جەلىسىندە جۇرگىزىلگەن جوو اراسىنداعى رەسپۋبليكالىق ساۋالنامانىڭ قورىتىندىسى جاريالاندى. ستۋدەنتتەر اراسىندا جۇرگىزىلگەن ساۋالناماعا جالپى سانى 105 جوعارى وقۋ ورنى قاتىسقان. ناتيجەسىندە, اتالمىش ۋنيۆەرسيتەت «ەڭ ۇزدىك ۋنيۆەرسيتەت» اتاعىن جەڭىپ الدى. اقجولتاي حابار تۋرالى سەرتيفيكاتتى ۋنيۆەرسيتەت رەكتورىنا پارلامەنت ءماجىلىسىنىڭ دەپۋتاتى ج.احمەتبەكوۆ تابىستادى.
56 جىلدىق تاريحى بار قازاتۋ ەلىمىزدىڭ باس قالاسىندا وتەتىن مەرەكەلىك شارالارعا بەلسەنە قاتىسۋدا. جيىندا ساحنا ساڭلاعى باۋىرجان يبراگيموۆ «قىزعالداق» بي ءانسامبلى مەن «شابىت» ۇلت-اسپاپتار وركەسترىن استانا قالالىق مادەنيەت باسقارماسىنىڭ ماقتاۋ قاعازىمەن ماراپاتتادى. لوندون وليمپياداسىنىڭ قولا جۇلدە يەگەرى مارينا ۆولنوۆا ۋنيۆەرسيتەت سپورتشىلارى دانيار ەلەۋسىنوۆ, مەرەي اقشالوۆ, ءىلياس سۇلەيمەنوۆ جانە ەسكارحان وسكانوۆقا استانا قالالىق سپورت جانە دەنە تاربيەسى باسقارماسىنىڭ ارنايى سىيلىعىن تابىس ەتتى. شارا سوڭىندا قوعامدىق كاسىپتەر فاكۋلتەتى ۇجىمى دايىنداعان كونتسەرت ۇيىمداستىرىلىپ, سوڭى «اگراركا ساربازدارى» كتك كوماناداسىنىڭ ازىلىنە ۇلاستى.
گۇلميرا شارحانقىزى
