استانا قالاسىنداعى №5 ەمحانانىڭ ەندوكرينولوگ دارىگەرى گۇلبايرا قاسىموۆا جۇمىستان قالت ەتكەندە قۇراق كورپە تىگىپ, توقىما توقىعاندى, قولونەرمەن شۇعىلدانعاندى جاقسى كورەدى.
25 جىلدىق تاجىريبەسى بار دارىگەر 2009 جىلدان بەرى ەلوردادا تۇرادى. ونىڭ مىندەتى – كۇن سايىن قانت ديابەتى, قالقانشا بەزى, جالپى ەندوكريندىك جۇيەنىڭ بۇزىلۋىنا بايلانىستى اۋرۋلاردى ەمدەۋ. تاڭەرتەڭنەن كەشكە دەيىن ەمحاناعا الدىن الا جازىلىپ كەلگەن 35-40 ادامدى قاراپ, تەكسەرىپ, ەمىن تاعايىندايدى, ديسپانسەرلىك ەسەپتە تۇراتىن ناۋقاستاردىڭ ەمىنە تۇزەتۋلەر ەنگىزەدى, اۋرۋلاردىڭ الدىن الۋ ءۇشىن قانداي ءىس-شارالار جۇرگىزۋ قاجەتتىگىن تۇسىندىرەدى. ودان بولەك, تىركەۋدە تۇرعان بارلىق جۇكتى ايەلدەردى ەندوكرينولوگيالىق تەكسەرۋدەن وتكىزەدى. وسى جۇمىستارىنان بولەك, دەمالىستا ۇيدە قولى بوساعاندا تىگىن ماشيناسىن قولىنا الىپ, سۇيىكتى ىسىمەن اينالىسۋعا ۋاقىت تابادى. بۇل ءحوببيىن تابىس ءۇشىن ەمەس, تەك ءوزىنىڭ جان تىنىشتىعى ءۇشىن جاقسى كورەدى. سوندا دا بولسا وعان تانىستارى تاپسىرىس بەرسە, ادەمىلەپ كورپە, جاستىقتار, شىمىلدىقتار, توي شاشۋعا ارنالعان جاستىقشالار تىگىپ بەرەدى. ونىڭ قولىنان شىققان سونداي دۇنيەلەر ستامبۋلعا, ەلىمىزدە پاۆلودار, كەنتاۋعا دا كەتكەن.
– قۇراق قۇراۋ – قانمەن, انامنىڭ سۇتىمەن بەرىلگەن ونەر. انام مەنى وسى ونەرگە بالا كەزدەن باۋلىدى. جالپى ونەر ناعاشىلارىمنان دا دارىعان بولار. ناعاشى اتام قايىستان, تەرىدەن اياق كيىمدەر تىگەتىن بولعان. مەكتەپتە جۇرگەندە وزىمە ءتۇرلى كويلەكتەر تىگىپ كيىپ الاتىنمىن. دەمالىس كۇندەرى قازاقشا اندەردى قوسىپ قويىپ, تىگىن تىكسەم تىنىعىپ قالامىن. ودان باسقا انام توقىما توقۋدى دا ۇيرەتتى. اۋىلدا جەر ءۇي بولعاسىن تەكەمەت, الاشا, تۇكتى كىلەم توقيتىن ەدىك. قازىر «حيت» بولىپ جاتقان, تويلاردا شاشۋ رەتىندە بەرىلەتىن ويۋلى جاستىقشالارعا تاپسىرىس كوپ بولادى. قولونەرىمە بايلانىستى بولەك كاسىبىم جوق, تەك ءۇي جاعدايىندا بولمەمنىڭ ءبىر بۇرىشىندا وتىرىپ تىگە بەرەمىن, – دەيدى ونەرلى دارىگەر.
گۇلبايرا اسەتقىزى – بەس بالانىڭ اناسى, ۇلكەن ۇلى مەن قىزى شاڭىراق كوتەرگەن, سولاردان نەمەرە ءسۇيىپ وتىرعان اجە. بالالارىنىڭ الدى جوعارى وقۋ ورنىن ءتامامداپ, ەلىنە قىزمەت ەتىپ ءجۇر. كەلىن الىپ, قولى ۇزارعان انا وسى ونەرىن ءوزىنىڭ ۇرپاقتارىنا دا ۇيرەتىپ, ۇلتتىق قولونەرىمىزدىڭ وزىنە ءتان ەرەكشەلىكتەرىن سولاردىڭ بويىنا ءسىڭىرىپ كەتۋدى قالايدى.
