سامات قابدۋلين, استانا قالاسى تۋريزم, دەنە تاربيەسى جانە سپورت باسقارماسى باسشىسىنىڭ مىندەتىن اتقارۋشى
استانادا قالا حالقىن بۇقارالىق سپورت شارالارىنا تارتۋ, سالاۋاتتى ءومىر سالتىن ناسيحاتتاۋ, سونداي-اق ءتۋريزمدى دامىتۋ جولعا قويىلىپ كەلەدى. اسىرەسە, ەلوردالىقتاردىڭ بەلسەندى دەمالىسىن ۇيىمداستىرۋعا بارىنشا كوڭىل بولىنە باستادى. وتكەن بەيسەنبىدە ەلوردا تۇرعىندارىمەن بولعان تىكەلەي تىلدەسۋ بارىسىندا قالالىق تۋريزم, دەنە تاربيەسى جانە سپورت باسقارماسى باسشىسىنىڭ مىندەتىن اتقارۋشى سامات قابدۋلين وسى جانە وزگە دە ماسەلەلەر توڭىرەگىندە اڭگىمەلەدى.
ميراگۇل:
– باس قالاداعى سپورت نىساندارى تەك قانا ەلوردامىزدىڭ ءسانى مەن سالتاناتىن ايشىقتاپ قانا قويماي, حالىقارالىق سپورت ارەناسىنا اينالىپ وتىرعانى انىق. تاياۋ كەلەشەكتە قانداي جارىستار ۇيىمداستىرۋدى جوسپارلاپ وتىرسىزدار؟
– «استانا ارەنا» ستاديونىندا ەۋروپا چەمپيوناتىنىڭ ىرىكتەۋ ويىندارى وتكىزىلىپ تۇرادى. ماسەلەن, 13 قازاندا قازاقستان مەن چەحيا قۇرامالارى اراسىنداعى ماتچتى تاماشالاۋعا بولادى. ال «سارىارقا» ۆەلوترەگىندە 10-12 قازان ارالىعىندا دزيۋدودان «گران پري-2014» حالىقارالىق جارىسى وتكىزىلەدى.
نايليا:
– استانادا قازاق كۇرەسىنەن جاتتىعۋلار بولىپ تۇرا ما؟ بولسا, ول تۋرالى تولىققاندى اقپاراتتى كىمنەن جانە قايدان بىلە الامىن؟
– قازاق كۇرەسىنەن وقۋ-جاتتىعۋ باس قالاداعى گەتە كوشەسى, 10 مەكەنجايى بويىنشا ورنالاسقان قازاق كولىك جانە كوممۋنيكاتسيالار اكادەمياسى كوللەدجىنىڭ سپورت
زالىندا وتكىزىلەدى. جاتتىقتىرۋشى ەستەك ەرلانمەن
8-701-212- 53-46 تەلەفون ءنومىرى ارقىلى حابارلاسۋىڭىزعا بولادى. باسقا دا ماسەلەلەر بويىنشا ءبىزدىڭ باسقارمانىڭ www.sport.astana.kz سايتىنان قوسىمشا اقپاراتتار الا الاسىز.
كۇمىس:
– قىزىم التى جاستا, انە-مىنە مەكتەپكە بارادى. وعان قانداي سپورت تۇرىمەن اينالىسقان دۇرىس؟
– قىز بالاعا كوركەم گيمناستيكا, سپورتتىق بي, مانەرلەپ سىرعاناۋمەن اينالىسقان جاراسىمدى, ال ۇل بالالار كوبىنە سپورت ۇيىرمەلەرىنە سەگىز-توعىز جاستان باستاپ قابىلدانادى. جۇزۋگە, سپورتتىق گيمناستيكاعا ولاردى جەتى جاستان دا قابىلدايدى.
ديدار:
– ەلباسى تاپسىرماسى بويىنشا ەلىمىزدەگى بارلىق سپورت نىساندارى بوس تۇرماۋعا ءتيىس. استانادا وسى ءماسەلە قالاي شەشىلىپ جاتىر؟
– قازىرگى ۋاقىتتا ەلوردالىق سپورت نىساندارىندا ءبىزدىڭ باسقارماعا قاراستى سپورت مەكتەپتەرى مەن كلۋبتاردىڭ ءتاربيەلەنۋشىلەرى جاتتىعادى. وسى ورايدا, مەملەكەت باسشىسى بۇقارالىق سپورتتى دامىتۋ, ونىڭ ىشىندە سپورت نىساندارىن قاراپايىم حالىق ءۇشىن قولجەتىمدى ەتۋ جونىندە ناقتى تاپسىرمالار بەرگەنى انىق. بۇل باعىتتا استانادا جۇيەلى جۇمىستار جۇرگىزىلىپ جاتىر. ماسەلەن, «الاۋ» مۇز ايدىنى سارايى, «سارىارقا» ۆەلوترەگى جانە «استانا ارەنا» ستاديونى كاسىپقوي سپورتشىلارمەن قاتار, قاراپايىم تۇرعىندار ءۇشىن قىزمەت كورسەتىپ كەلەدى.
الماس حايدار:
– قايىرلى كۇن, سامات امانگەلدىۇلى؟! قالالىق تۋريزم, دەنە تاربيەسى جانە سپورت باسقارماسى قىزمەتكەرلەرىنىڭ الدىنداعى باستى مىندەت نە دەپ ەسەپتەيسىز؟
– باستىسى, ەلوردالىق تۋريزم جانە سپورتتى دامىتۋ, حالىقارالىق دارەجەدەگى سپورتشىلاردى دايىنداۋ, سالاماتتى ءومىر سالتىن قالىپتاستىرۋ جانە ت.ب.
نەگىزگى ماقساتىمىز – ەلوردالىق سپورتشىلاردىڭ جوعارى جەتىستىكتەرگە قول جەتكىزۋىنە جاعداي تۋعىزىپ, مۇمكىندىك جاساۋ. بۇل ورايدا اتقارىلعان شارالار مەن اتاپ وتۋگە تۇرارلىق تابىستارىمىز بارشىلىق. ءبىز بۇقارالىق سپورت شارالارىنا بارىنشا نازار اۋدارىپ وتىرمىز. ونىڭ بىرنەشە سەبەبى بار. بىرىنشىدەن, استاناعا ءار جاقتان كەلىپ قونىستانىپ جاتقان ءارتۇرلى, ءار قىرلى دارىندى سپورتشىلاردى تانىپ, قاتارىمىزعا تارتۋ. ەكىنشىدەن, جەكەلەگەن ەڭبەك ۇجىمدارىندا, اسىرەسە, جاسوسپىرىمدەر اراسىندا دەنە شىنىقتىرۋ مادەنيەتىن قالىپتاستىرۋعا نيەتتىمىز. ءۇشىنشىدەن, ەلباسى اتاپ كورسەتكەن «استانا حالقىنىڭ دەنساۋلىعى شىمىر بولۋى كەرەك» دەگەن تالابى تەك دارىگەرگە قويىلعان مىندەتتەمە ەمەس. دەنساۋلىقتى شىنىقتىرۋعا ءار ادامنىڭ وزىنەن باستاپ, قوعامدا جان-جاقتى مۇمكىندىكتەر جاساۋعا ءتيىسپىز. مىنە, وسىنداي شارالاردىڭ ارقاسىندا بولاشاقتا استانا قالاسىنىڭ ناعىز سايىسكەر, سايدىڭ تاسىنداي ىرىكتەلگەن سپورتشىلارى ءوسىپ قالىپتاسادى.
جانات:
– سامات امانگەلدىۇلى, قازىرگى جاستار سپورتقا قانشالىقتى جاقىن؟
– استانادا سپورتپەن جۇيەلى تۇردە اينالىساتىنداردىڭ دەنى – ون سەگىز جاسقا دەيىنگى بالالار. ولار جالپى حالىقتىڭ جارتىسىن, ناقتىراق ايتساق, 56,6 پايىزىن قۇرايدى. بۇگىنگى تاڭدا قالادا 100-دەن اسا سپورت تۇرىمەن اينالىسۋعا مۇمكىندىك بار. تەك, اركىم ونى ءوز قالاۋىمەن تاڭداي الادى.
قۇرالاي:
– ەلىمىزدىڭ باس قالاسى – استانادا پاراوليمپيادالىق ويىندارعا سپورتشى دايىنداۋ قانشالىقتى دەڭگەيدە قولعا الىنعان؟
– استانا قالاسىندا ءمۇمكىدىگى شەكتەۋلى جاندار ءۇشىن قازاقستاندا العاشقى بوپ اشىلعان «قايسار» سپورت كلۋبى جۇمىس ىستەيدى. وندا 13 سپورت تۇرىنەن 320 ادام جاتتىعادى.
قانات بالعابايۇلى:
– بالالار مەن جاسءوسپىرىمدەر سپورت مەكتەپتەرىنىڭ سۋدا ءجۇزۋ ۇيىرمەسىنە قاي جاستان باستاپ بەرۋگە بولادى؟
– جالپى, سپورت مەكتەپتەرىنىڭ بالالار جەتى جاستان باستاپ قابىلدانادى. ەلوردامىزدا جاڭا مەكتەپتەردىڭ پايدالانۋعا بەرىلۋىنە بايلانىستى سپورت زالدارى مەن الاڭدار دا كوبەيىپ وتىر. ماسەلەن, قالامىزدىڭ سارىارقا, الماتى جانە ەسىل اۋداندارىندا قىسى-جازى سپورتپەن اينالىسۋعا بولاتىن سپورت الاڭدارى بار. ولار تۇرعىنداردىڭ يگىلىگىنە دە پايدالانىلادى.
رىسپەك ورالوۆ:
– بيىل الماتى قالاسىنداعى قازاق ۇلتتىق ۋنيۆەرسيتەتىن تۋريزم ماماندىعى بويىنشا ۇزدىك ديپلوممەن ءبىتىردىم. سىزدەردە جۇمىسقا ورنالاسا الامىن با؟
– 2013 جىلعى 13 ناۋرىزدا قابىلدانعان «قازاقستان رەسپۋبليكاسىنىڭ مەملەكەتتىك قىزمەت تۋرالى» زاڭىندا كورسەتىلگەن تالاپتارعا سايكەس, مەملەكەتتىك قىزمەتكە ۇمىتكەرلەر كونكۋرستىق نەگىزدە قابىلدانادى. الايدا, قازىرگى كەزدە ءبىزدىڭ باسقارمادا شتات تولىق, بوس ورىن جوق.
ايبەك:
– سالەمەتسىز بە؟! استانالىقتاردىڭ باسىم بولىگى سالاۋاتتى ءومىر سالتىن ۇستانادى دەگەندى ەستىدىم. ەلوردا تۇرعىندارى سپورتتىڭ قانداي تۇرىمەن كوبىرەك اينالىسادى؟
– ءيا, الەۋمەتتانۋشىلاردىڭ سوڭعى زەرتتەۋلەرى بويىنشا استانا قالاسىنىڭ ءاربىر ءتورتىنشى تۇرعىنى سپورتپەن اينالىسادى. كوپشىلىگى جۇزۋگە بارسا, ءاربىر بەسىنشى ەلوردالىق بوكس, كۇرەس سەكىلدى جەكپە-جەك تۇرلەرىن تاڭدايدى ەكەن. ال, سپورتتىڭ ەڭ بۇقارالىق تۇرىنە اينالعان فۋتبولعا دەگەن ىنتا-ىقىلاس الابوتەن. ودان ءارى حوككەي, مانەرلەپ سىرعاناۋ, كوركەم گيمناستيكا, سپورتتىق بيمەن شۇعىلدانۋشىلار قاتارى دا جىل وتكەن سايىن ارتىپ كەلەدى. جالپى, بۇل رەتتە ەلوردا باسشىلىعى قالالىقتار دەنە تاربيەسىمەن شۇعىلدانۋدى اينىماس ادەتكە اينالدىرۋى ءۇشىن بارىنشا قولايلى جاعداي تۋعىزىپ وتىر. سونداي-اق, قازىر كەشكى سامالمەن قىدىرىستاپ جۇرگەندەردى كۇندە كەزدەستىرەتىن بولدىق. مۇنىڭ ءبارى استانالىقتاردىڭ اۋىرماۋدىڭ جولىن ىزدەپ, سپورتقا دەن قويا باستاعانىن اڭعارتادى.
زۋحرا:
– مەن توعىز جاسىمنان بيلەيمىن. قازىر ون جەتىدەمىن. جەكە بي ۇيىرمەسىن اشقىم كەلەدى. بۇل مۇمكىن بە؟
– سپورتتىق بي بويىنشا سەكتسيا اشۋ ءۇشىن سپورتتىق ورتا كاسىبي نەمەسە جوعارى ءبىلىمىڭىز بولۋى ءتيىس. سودان كەيىن عانا قالعان قۇجاتتاردى راسىمدەۋىڭىزگە بولادى.
دايىنداعان: گۇلبارشىن وكەشقىزى
