استانا قالاسى ءماسليحاتىنىڭ قۇرىلىس, ەكولوگيا, كولىك, ساۋدا جانە تۇرعىن ءۇي-كوممۋنالدىق شارۋاشىلىق جونىندەگى تۇراقتى كوميسسيا وتىرىسىندا شىعىس يلينكا تۇرعىن الابىنىڭ تۇيتكىلدەرى تالقىلاندى. اتالمىش ەلدى مەكەن تۇرعىندارى قالالىق ءماسليحات حاتشىسى جانات نۇرپەيىسوۆتىڭ اتىنا ءوتىنىش تۇسىرگەن سوڭ بۇل ماسەلە كۇن تارتىبىنە شىعارىلدى.
دەپۋتاتتاردى وتىن-ەنەرگەتيكا كەشەنى جانە كوممۋنالدىق شارۋاشىلىق باسقارماسىنىڭ باسشىسى ەربول تولەۋوۆ جاعدايمەن تانىستىردى. ونىڭ ايتۋىنشا, تۇرعىن الاپتىڭ ينفراقۇرىلىمى بويىنشا جۇمىستار 2011 جىلى باستالعان. جوبانىڭ جالپى كۇنى – 17 ملرد تەڭگە. سونىڭ 9,7 ملرد تەڭگەسى يگەرىلگەن. قۇرىلىس جۇمىستارى «قۇلاگەر» كومپانياسىنا تاپسىرىلدى.
«قازىر ەلدى مەكەننىڭ 5,1 شاقىرىمدى قۇرايتىن سۋ جۇيەسىن, 10,6 شاقىرىمدىق كارىز جۇيەسىن جانە 48 شاقىرىمدىق ەلەكتر جەلىلەردى, جەتى ترانسفورماتورلىق قوسالقى ستانسانى, 42,2 شاقىرىمدى قۇرايتىن جول سالۋ قالدى» دەدى باسقارما باسشىسى.
وتكەن جىلى جوباعا تۇزەتۋ ەنگىزىلگەن. قازىرگى كەزدە قۇرىلىستى سوزىپ جىبەرىپ, ساپاعا دا ءمان بەرمەگەن كومپانياعا قاتىستى سوت ءجۇرىپ جاتىر. 5 ناۋرىز كۇنى سوتتىڭ ءۇشىنشى وتىرىسى وتەدى. «قۇلاگەردى» سوتقا بەرگەن وتىن-ەنەرگەتيكا كەشەنى جانە كوممۋنالدىق شارۋاشىلىق باسقارماسى كومپانيامەن كەلىسىمشارتتى ءۇزۋدى, 1 ملرد 200 ملن تەڭگە كولەمىندەگى دەبيتورلىق قارىزدى قايتارۋدى, جۇمىسىنا ءجۇردىم-باردىم قاراعانى ءۇشىن شارا قولدانۋدى تالاپ ەتىپ وتىر.
ەسىل اۋدانىنىڭ اكىمى تولەگەن زاكاريانوۆتىڭ پىكىرىنشە, شىعىس يلينكاداعى قۇرىلىس جۇمىستارى وتە كۇردەلى ماسەلەگە اينالدى. ول بۇل ماسەلەمەن كوممۋنالدىق شارۋاشىلىق باسقارماسىنىڭ باسشىسى كەزىنەن تانىس. «تۇرعىن الاپ ءاۋ باستان دۇرىس جەرگە سالىنباعان. جوبانىڭ وزىندە كوپ قاتەلىكتەر ورىن العان. جارىقتاندىرۋ ۇمىت قالعان. جوباعا قانشاما رەت تۇزەتۋ ەنگىزىلدى. قۇرىلىس جۇمىستارىنىڭ ءوزى باقىلاۋسىز جۇرگىزىلگەن. ينفراقۇرىلىم سالىنباي, تۇرعىندارعا جەر بەرىلدى. اقىرى قازىرگى پروبلەمالارعا تاپ بولدىق. مەردىگەرمەن كەلىسىمشارتتى ءۇزۋ كەرەك. قازىر تۇرعىندارمەن ايىنا ەكى رەت كەزدەسەمىز» دەدى ول.
شىعىس يلينكا تۇرعىندارى قاراشاش تاشەنوۆا مەن ميحايل پاشكەۆيچ ينفراقۇرىلىم قۇرىلىسىنداعى شيكىلىكتەردى اتادى. ولاردىڭ ءسوزىنشە, ەكى جىل قاتارىنان قۇرىلىس جۇمىستارى مۇلدە جۇرگىزىلمەگەن. وتكەن جىلى اتالمىش تۇرعىن الابى كىرەتىن №11 سايلاۋ وكرۋگىنىڭ دەپۋتاتى ميراس شەكەنوۆتىڭ ارالاسۋىمەن قۇرىلىس جاندانعان. دەپۋتاتتىڭ ءوزى دە جاعدايدى باياندادى. وتىرىس قورىتىندىسىندا دەپۋتاتتار سوت ناتيجەسىن كۇتۋدى, شەتكى ايماقتار بويىنشا كوميسسيا قۇرۋدى ۇسىندى.
