تالعات راحمانبەردى: جاستاردىڭ ماماندىقتى دۇرىس تاڭداۋىنا باعىت بەرەمىز
تالعات راحمانبەردى, جاستار ساياساتى ماسەلەلەرى جونىندەگى باسقارمانىڭ باسشىسى
– بۇگىنگى تاڭدا ەلوردا جاستارىنىڭ الدىندا تۇرعان وزەكتى ماسەلە نە؟
– قازىرگى جاستار اراسىنداعى باستى ماسەلە – ماماندىقتى دۇرىس تاڭداۋ. سەبەبى, بۇگىندە باس قالا نارىعىندا تەحنيكالىق ماماندىقتارعا سۇرانىس ارتىپ وتىر. ال, جاستاردىڭ باسىم بولىگى ءالى دە بولسا گۋمانيتاريانىڭ شىلاۋىنان شىعا المايدى. وسى ورايدا ءبىز ولارعا دۇرىس باعدار بەرىپ, بۇل باعىتتاعى جۇمىستى جالعاستىرۋدامىز.
– ناقتى قانداي شارالار قولعا الىندى؟
– قالالىق جاستار ساياساتى ماسەلەلەرى جونىندەگى باسقارمانىڭ باستاماسىمەن جىل بويى ەلباسىنىڭ «قازاقستان-2050» ستراتەگياسى: قالىپتاسقان مەملەكەتتىڭ جاڭا ساياسي باعىتى» اتتى جولداۋى اياسىندا ەڭبەك نارىعىندا سۇرانىسقا يە جۇمىسشى ماماندىقتارىن ناسيحاتتاۋعا ارنالعان «مەنىڭ دۇرىس تاڭداۋىم!» اتتى اكتسيا وتكىزىلۋدە. اكتسيا توڭىرەگىندە تەحنيكا سالاسىندا, اتاپ ايتساق, ينجەنەر, فرەزەرشى, ەلەكتريك, سانتەحنيك, دانەكەرلەۋشى, اسپاز ماماندىقتارىندا جانە مەديتسينا سالاسىندا وقيتىن ءبىر توپ ستۋدەنت جاستار ۇگىت-ناسيحات جۇمىستارىنا بەلسەنە اتسالىسىپ ءجۇر. الەۋمەتتىك جەلىلەردە جۇرگىزىلەتىن جۇمىستارىمىز دا بار. سونىمەن بىرگە بيىلعى 17 ماۋسىمدا استانا قالاسىنىڭ تەمىر جول جانە اۆتوۆوكزال عيماراتتارىندا جاستاردى جەدەل جۇمىسقا ورنالاستىرۋ پۋنكتىن اشتىق.
– جاڭا جوبانىڭ ناتيجەسى قانداي?
– بۇل جۇمىستى باستاعالى بەرى باس قالادا 80 جاس مامان جۇمىسپەن قامتىلدى جانە ولاردىڭ 200-دەن استامى جۇمىسقا ورنالاسۋعا جىبەرىلدى. جالپى, ءبىز وسى جوبا نەگىزىندە سوڭعى ەكى ايدىڭ ىشىندە ەلورداعا كەلگەن جاستاردىڭ سانىن انىقتادىق. بۇل رەتتە استاناعا ءبىرىنشى كەزەكتە وڭتۇستىك قازاقستان وبلىسىنان جاستار كوپ كەلەتىنى بەلگىلى بولدى.
بۇگىندە ەلوردادا 14 066 ستۋدەنت بار. ءبىرىنشى كۋرسقا قابىلدانعانداردىڭ اراسىندا ەڭبەك نارىعىندا سۇرانىسى تومەن ماماندىقتاردى تاڭداعاندار قاتارى 16 پايىزعا ازايعان. بۇل – ءبىز ءۇشىن ۇلكەن جەتىستىك. ورتاشا ەسەپپەن العاندا 2017 جىلعا قاراي استانا قالاسىندا ەڭبەك نارىعى ءبىر قالىپقا كەلەدى.
جالپى ستۋدەنتتەردىڭ 9 مىڭى – جان-جاقتان كەلگەندەر. دەمەك, استانا – ارمانشىل جاستاردىڭ قالاسى. مەنىڭشە, مەملەكەتتىك جاستار ساياساتىنىڭ جاڭا باسىمدىقتارى مەن مىندەتتەرىن ايقىنداۋ, ەل دامۋى ءۇشىن ەڭبەك ەتۋ بارلىق جاستاردىڭ ورتاق ماقساتى بولۋى كەرەك. ويتكەنى, جيىرما ءبىرىنشى عاسىردىڭ
جاستارى – جىگەرلى ءارى جاڭاشىل. سوندىقتان, ولاردىڭ باستامالارىن جان-جاقتى قولداپ, جۇزەگە اسىرۋعا ءبىز ءارقاشان دا ءازىرمىز.
گۇلبارشىن وكەشقىزى