يندونەزيانىڭ جاكارتا جانە پالەمبانگ قالالارىندا ءوتىپ جاتقان ازيا ويىندارىندا قازاقستان قۇراماسى جالپى ەسەبى 64 جۇلدە ەنشىلەدى. مەدال سانى قوماقتى كورىنگەنىمەن, كوماندالىق ەسەپتە جاعدايىمىز ءماز ەمەس.
ازيادا ۇزدىك بەستىكتەن تومەن ءتۇسىپ كورمەگەن قازاقتار وندىقتىڭ وزىنەن تۇراقتى ورىن الا الماي جاتىر. «اۋىز تولتىرىپ» ايتاتىن 64 مەدالدىڭ التىدان ءبىر بولىگى عانا التىن بولىپ تۇر دەپ ايتۋعا بولادى. ناقتىلاپ ايتساق, 12 التىن, 11 كۇمىس, 41 قولا.
سوڭعى ءتورت كۇندە ەل قورجىنىنا ءتورت التىن ءتۇستى. الدىمەن 28 تامىز كۇنى الينا ءادىلحانوۆا كوركەم گيمناستيكادان جەكەلەي سىندا 66.800 ۇپاي جيناپ, توپ جاردى. ەكىنشى التىنىن العان ول بۇدان بۇرىن كوماندالىق سايىستا چەمپيون اتاندى.
اراعا ەكى كۇن سالىپ 30 تامىز كۇنى سپورتشىلارىمىز ءۇش التىندى سۇيىنشىلەدى. وليمپيادا چەمپيونى ولگا رىپاكوۆا ءۇش قارعىپ سەكىرۋدەن جەڭىمپاز بولدى. 14.26 مەترگە سەكىرگەن ولگا وسىمەن ءتورتىنشى رەت قاتارىنان ازيادا چەمپيونى اتانىپ وتىر.
كەلەسى التىن – دزيۋدوشى ديدار حامزانىڭ قانجىعاسىندا. ول 81 كگ سالماقتا باق سىناپ, فينالدا يراندىق سايد موللايدان ايلاسىن اسىردى. ەلدوس سمەتوۆتىڭ ساتسىزدىگىنەن سوڭ ەشكىم كۇتپەگەن بۇل جەڭىس ناعىز سەنساتسيا دەپ باعالاندى.
ال ون ءبىرىنشى التىندى كانوە مەن بايداركادا ەسكەك ەسۋشىلەر الدى. يليا گولەندوۆ, سەرگەي توكارنيتسكي, الەكسەي دەرگۋنوۆ جانە ەۆگەني الەكسەەۆتەن قۇرالعان قازاقستان كومانداسى 500 مەترلىك مەجەنى ءبىرىنشى بولىپ باعىندىردى.
ۇلتتىق قۇرامانى 11-ورىننان 9-ورىنعا كوتەرگەن التىندى باعلان يبراگيم الدى. ول سامبودان 52 كگ سالماقتا كۇرەسىپ, فينالدا موڭعولدى 4:0 ەسەبىمەن جەڭدى.
قالعان جۇلدەلەرگە كەلسەك, ۇپايىمىز تاعى 3 كۇمىس, 13 قولا مەدالعا ارتتى. اياقتالۋىنا ەكى كۇن قالعان بايراقتى باسەكەدە قورجىنىمىز ءالى دە قومپايا تۇسەدى دەپ ۇمىتتەنەمىز.
