«Qazaq Epos» قوعامدىق قورىنىڭ رەسپۋبليكالىق جوباسى «تۇلپار ءمىنىپ, تۋ العان!» بايقاۋىنىڭ قالالىق كەزەڭى قورىتىندىلاندى.
بايقاۋ جاس ۇرپاقتى حالىق اۋىز ادەبيەتىمەن سۋسىنداتۋعا ولاردىڭ وي ۇشقىرلىعى مەن ءتىل بايلىعىنىڭ, سانا-سەزىمىنىڭ دامۋىنا كوپ اسەرىن تيگىزەدى. اتا-بابالارىمىز قالدىرعان اسىل مۇرالار بالالاردىڭ ونەر-بىلىمگە قۇلشىنىسىن ارتتىرىپ, سالت-ءداستۇر مەن ادەت-عۇرپىن قۇرمەتتەۋگە تاربيەلەيدى.
«Qazaq epos» قوعامدىق قورىمەن «استانا دارىنى» ورتالىعى بىرلەسە وتىرىپ, ەلباسى ن.ءا.نازارباەۆتىڭ «بولاشاققا باعدار: رۋحاني جاڭعىرۋ», «ۇلى دالانىڭ جەتى قىرى» جانە قازاقستان رەسپۋبليكاسىنىڭ پرەزيدەنتى ق.ك.توقاەۆتىڭ «تاۋەلسىزدىك بارىنەن قىمبات» ماقالالارىندا جۇكتەلگەن مىندەتتەردى جۇزەگە اسىرۋ ماقساتىندا نۇر-سۇلتان قالاسى ءبىلىم بەرۋ مەكەمەلەرىنىڭ 6-10 سىنىپ وقۋشىلارى اراسىندا «تۇلپار ءمىنىپ, تۋ العان!» بايقاۋىنىڭ قالالىق كەزەڭىن وتكىزدى. بايقاۋدىڭ ماقساتى – مەكتەپ وقۋشىلارى اراسىندا كىتاپ وقۋدى جانە قازاق حالقىنىڭ باتىرلىق ەپوستارىن ناسيحاتتاۋ, وسكەلەڭ ۇرپاقتىڭ زياتكەرلىك قابىلەتىن دامىتۋ, پاتريوتيزمگە تاربيەلەۋ, قازاق ءتىلى مەن ادەبيەتى ءپانى مۇعالىمدەرىنىڭ بەدەلىن كوتەرۋ.
بايقاۋدىڭ تالاپتارىنا ساي وقۋشىلار «ەر ەدىگە» جىرىن تولىق جاتقا وقىدى, ۇلىق ۇلىس (التىن وردا) مەملەكەتىنىڭ نەگىزگى تاريحي وقيعالارىنا قاتىستى سۇراقتارعا جاۋاپ بەردى, جىردا كەزدەسەتىن كونەرگەن سوزدەردىڭ ءمان-ماعىناسىن ءتۇسىندىردى جانە قازاق ادەبيەتى ءپانىنىڭ وقۋ باعدارلاماسى نەگىزىندە ازىرلەنگەن سۇراقتاردى تالقىلادى. 11-12 قاراشا كۇنى وتكەن «تۇلپار ءمىنىپ, تۋ العان!» بايقاۋىنىڭ اۋداندىق كەزەڭىنە 62 مەكتەپتەن 101 وقۋشى قاتىستى. اۋداندىق كەزەڭنىڭ قورىتىندىسى بويىنشا ۇزدىك دەپ تانىلعان 12 وقۋشى (№86 مل, №38 مل, №72 مل, №54 مل, №16 وم, №55 وم, №81 مامانداندىرىلعان گيمنازياسى, بيل (ەر) №77 مگ, №40 مل (2) جانە №7 مگ وقۋشىلارى) قالالىق كەزەڭدە ونەر كورسەتتى.
قالالىق كەزەڭدە جۇلدەگەر اتانعان وقۋشىلار:
ءى ورىن – №54 مەكتەپ-ليتسەيىنىڭ 7-سىنىپ وقۋشىسى گۇلنازىم مارات;
ءىى ورىن – №86 مەكتەپ-گيمنازياسىنىڭ 7-سىنىپ وقۋشىسى كاۋسار شىرىنباي;
№81 «Astana English» مەكتەبىنىڭ 7-سىنىپ وقۋشىسى اقگۇل ابدىراشەۆا;
ءىىى ورىن – №55 وم 7-سىنىپ وقۋشىسى مايرا سەرىكباەۆا, №40 مل, 8-سىنىپ وقۋشىسى ايىم تولەۋباەۆا.
ەلوردادا بىرنەشە كۇنگە سوزىلعان ءدۇبىرلى دودادا بابى مەن باعى وزا شاپقان گۇلنازىم مارات «تۇلپار ءمىنىپ, تۋ العان!» بايقاۋىنىڭ رەسپۋبليكالىق كەزەڭىندە نۇر-سۇلتان قالاسىنىڭ نامىسىن قورعايتىن بولادى.
