ەرتەڭ ەلوردالىق بازارلاردا جانە ساۋدا ورتالىقتارىندا «ءار تۇتىنۋشىعا – قاۋىپسىز ونىمدەر» اكتسياسى وتەدى. ول جونىندە استانا قالاسى تۇتىنۋشىلاردىڭ قۇقىقتارىن قورعاۋ دەپارتامەنتى باسشىسىنىڭ ورىنباسارى ميرامعالي مولداشەۆ ايتىپ بەرگەن ەدى.
– اكتسيا قاي جەرلەردە جانە قانداي ماقساتتا وتكىزىلەدى؟
– اكتسيانى 16, 23 جانە 30 مامىر كۇندەرى «شاپاعات», «شارىن», «ارتەم» بازارلارىندا جانە «اسەم» ساۋدا ورتالىعىندا وتكىزۋدى جوسپارلاپ وتىرمىز. ياعني, وسى ايدىڭ ءار اپتاسىنىڭ ءبىر كۇنىن ونىمدەردىڭ ساپاسىن تەكسەرۋگە ارناماقپىز.
نەگىزىنەن جىل سايىن وسىنداي شارانى وتكىزۋدى داستۇرگە اينالدىرعانبىز. اسىرەسە, جەمىستەر مەن كوكونىستەر ءپىسىپ, ساۋدا ورىندارى سورەلەرىنە تۇسكەندە.
تۇتىنۋشىلار ءوز قۇقىقتارىن ءبىلۋى ءتيىس. اكتسيانىڭ ماقساتى دا سول – بازارشىلاعان حالىقتىڭ قۇقىقتىق ساۋاتتىلىعىن ارتتىرۋ, ازىق-تۇلىك ونىمدەرى بويىنشا ولاردى جان-جاقتى اقپاراتتاندىرۋ. دەپارتامەنت ماماندارى تۇتىنۋشىلاردىڭ سۇراقتارىنا دا جاۋاپ بەرەدى.
– ازىق-تۇلىك ونىمدەرىنىڭ ساپاسىن قالاي انىقتايسىزدار؟
– بازارلار مەن «اسەم» ساۋدا ورتالىعىندا سانيتارلىق-ەپيدەميولوگيالىق ساراپتاما ورتالىعىنىڭ زەرتحاناسى جۇمىس ىستەيدى. بۇل – تۇتىنۋشىلارعا ساتىپ الىنعان ازىق-تۇلىكتىڭ ساپاسىن تەگىن تەكسەرۋگە, ونىڭ قۇرامىنداعى نيتراتتاردىڭ مولشەرىن, دەنساۋلىققا زياندى زاتتاردىڭ بولۋ-بولماۋىن انىقتاۋعا مۇمكىندىك بەرەدى. سونىمەن قاتار, زەرتحانالىق ساراپتاما ارقىلى حالىق وزدەرى ساتىپ العان ازىق-تۇلىكتىڭ تابيعي نەمەسە جاساندى ەكەنىن انىقتاي الادى.
– تەكسەرىلگەن ونىمدەر ساپاعا ساي بولماسا, قانداي شارالاردى قولدانا الاسىزدار؟
– ساپاسىز تاۋاردى ساتىپ الۋشىلار ونى قايتارا الادى. ءوز كەزەگىندە, دەپارتامەنت قىزمەتكەرلەرى قازاقستان رەسپۋبليكاسى تۇتىنۋشىلاردىڭ قۇقىقتارىن قورعاۋ اگەنتتىگىنە حات جولداپ, كاسىپكەردىڭ قىزمەتىن توقتاتۋ تۋرالى ماسەلەنى كوتەرەدى.
شاعىن جانە ورتا كاسىپكەرلىك سۋبەكتىلەردى تەكسەرۋگە تىيىم سالىنعانىن بىلەسىزدەر. ال, وسىنداي اكتسيالار قالادا ساتىلاتىن ازىق-تۇلىكتىڭ ساپاسىن انىقتاۋعا جاقسى مۇمكىندىك بەرەدى. ءوز قۇقىقتارىن قورعاۋعا كەلگەندە تۇتىنۋشىلار دا بەلسەندىرەك بولسا دەيمىز.
امانعالي شميتۇلى
