قازىر ەلوردادا قالا اكىمدىگىنىڭ قولداۋىمەن بالالار مەن جاسوسپىرىمدەردىڭ ءتۇرلى سپورت ۇيىرمەلەرىنە تەگىن قاتىسۋىنا كوپ مۇمكىندىكتەر جاسالۋدا. سولاردىڭ ءبىرى – بيىل مامىر ايىندا بايقوڭىر اۋدانىنداعى «ءوندىرىس» تۇرعىن الابىندا № 7 بالالار مەن جاسوسپىرىمدەر سپورت مەكتەبىنىڭ فيليالى رەتىندە اشىلعان دەنە شىنىقتىرۋ-ساۋىقتىرۋ كەشەنى. 350 بالانى سپورتتىڭ ءتۇر-تۇرىنە تەگىن ۇيرەتۋگە قاۋقارلى كەشەنگە قازىرگى تاڭدا ازىرگە 100 بالا عانا قاتىناپ ءجۇر.
كەشەن باسشىسى الماز شايحيننىڭ ايتۋىنشا, ءتۇرلى الەۋمەتتىك جاعدايداعى تۇرعىندار ءۇشىن وسىنداي تەگىن سپورت ۇيىرمەلەرى بالالاردىڭ سپورتقا جاقىن بولىپ قانا قويماي, قالالىقتان باستاپ, رەسپۋبليكالىق, ءتىپتى الەمدىك دودالاردا قابىلەتىن تانىتۋىنا زور مۇمكىندىك بەرەدى. الايدا كەشەن عيماراتى قالا شەتىندە ورنالاسىپ, ءارى جاڭادان اشىلعاندىقتان ونى ازىرگە كوبى بىلمەي, سودان ۇيىرمەلەرگە قاتىساتىن بالالار سانى دا كەمشىندەۋ بولىپ تۇر.
– زاماناۋي جابدىقتالعان سۋ جاڭا عيماراتتا سپورتتىڭ كۇرەس, كەكۋشينكاي-كاراتە, بوكس, كيكبوكسينگ, گرەپلينگ, دجيۋ-دجيتسۋ, سامبو, تاەكۆوندو دەگەن جەكپە-جەك كۇرەسكە باعىتتالعان 8 تۇرىنە 1-11 سىنىپ ارالىعىنداعى بارلىق مەكتەپ وقۋشىلارى كەلىپ, اقىسىز تۇردە جاتتىعۋىنا بولادى. بولاشاقتا سپورت ۇيىرمەلەرىنىڭ سانىن الدە دە كوبەيتۋ كوزدەلىپ وتىر. جاتتىقتىرۋشى ۇستازداردىڭ ءبارىنىڭ ءوز سالاسى بويىنشا بەلگىلى ءبىر دەڭگەيدە جەتكەن دارەجەلەرى بار. بالالار تاڭداعان سپورت ءتۇرى بويىنشا اپتاسىنا ءۇش رەت, 1,5 ساعاتتان جاتتىعا الادى. دەنە شىنىقتىرۋ جانە ساۋىقتىرۋ كەشەنىندە ءتۇرلى باعىتتا سپورتپەن شۇعىلداناتىن بالالاردىڭ بولاشاقتا رەسپۋبليكالىق جانە حالىقارالىق جارىستارعا قاتىسىپ, باق سىناۋعا مۇمكىندىگى زور. ەڭ مىقتىلارى استانا قالاسىنىڭ قۇراما سپورت كومانداسىنا, ءتىپتى ۇلتتىق قۇراماعا دا وتە الادى. مۇندا جاتتىعۋلار وتكىزىلىپ قويماي, جوعارىدا ايتىلعان سپورت تۇرلەرىنەن جارىستار مەن تۋرنيرلەر دە ءجيى ۇيىمداستىرىلادى, – دەيدى كەشەن باسشىسى.
استانا قالاسى جانە بايقوڭىر اۋدانى اكىمدىگىنىڭ قولداۋىمەن جانە «شەت ايماقسىز استانا» تۇجىرىمداماسىنىڭ نەگىزىندە سالىنعان كەشەن عيماراتى 2664 شارشى مەتر اۋماقتى الىپ جاتىر. كەشەندە 3 زال بار, ءبىرىنشىسى – 215 شارشى مەترلىك كۇرەس زالى, ەكىنشىسى اۋماعى – 595 شارشى مەتر امبەباپ زال, ءۇشىنشىسى – 93,2 شارشى مەتردى قۇرايتىن جاتتىعۋ زالى. سونىمەن قاتار بالالاردىڭ كيىمىن اۋىستىراتىن, دۋش قابىلدايتىن ورىندارى بار.
– بۇل عيماراتتا سونداي-اق مامانداندىرىلعان حالىققا قىزمەت كورسەتۋ ورتالىعى, بايقوڭىر اۋدانىنا قاراستى كىتاپحانا دا قاتار وتىر. مۇنىڭ دا بىزگە تيىمدىلىگى زور. سەبەبى بالالارىن ۇيىرمەلەرگە الىستان اكەپ قاتىستىراتىن اتا-انالار ءبىر جارىم ساعاتىن بوسقا كۇتىپ, تەككە وتكىزبەۋ ءۇشىن وسى حقكو-دا شارۋالارىن تىندىرىپ نەمەسە كىتاپحاناعا باس سۇعىپ, بىلىممەن سۋسىنداي الادى. اتا-انالار ۇيىرمەدەگى بالاسىنىڭ جاتتىعۋى بىتكەنگە دەيىن وزىمەن بىرگە ەرتىپ اكەلگەن كىشىلەرىن عيماراتتىڭ سىرتىنداعى ويىن الاڭى مەن ىشىندەگى ويىن زالىنا جىبەرە الادى.
سونداي-اق مۇندا قالا تۇرعىندارى بوس ۋاقىتىندا كەلىپ, شاحمات, توعىزقۇمالاق ويىندارىن ارنايى بولمەدە ويناي الادى. ەگدە جاستاعىلار ءۇشىن ارنايى كلۋب جۇمىس ىستەيدى. ودان بولەك, ۋچاسكەلىك پوليتسيا بولىمشەسىنىڭ دە وسى كەشەن عيماراتىندا ورنالاسۋى قوعامدىق ءتارتىپ پەن قاۋىپسىزدىكتى قامتاماسىز ەتۋدە بىزگە كومەگى تيەدى. ال سپورت جارىستارى وتەتىن كەزدە بالالاردىڭ قارنى اشىپ قالماۋى ءۇشىن عيماراتتاعى بۋفەت اشىلىپ, №7 سپورت ورتالىعىنان اسپازدار كەلىپ, جۇمىس ىستەيدى. سپورتتىق نىسان اۋماعىندا 86 ورىندىق اۆتوتۇراق بار. كەشەننىڭ وسىنداي ارتىقشىلىقتارى كوپ, – دەيدى الماز شايحين.
ەلوردانىڭ شەت ايماعىنداعى ءوندىرىس كوشەسى, 14ا مەكەنجايىندا ورنالاسقان سپورت نىسانىنا قازىرگى تاڭدا №24, 30 اۆتوبۋستار عانا قاتىنايدى. الايدا بۇل قوعامدىق كولىكتەردىڭ ارقايسىسىنىڭ ءجۇرۋ جيىلىگى 30 مينۋتتى قۇرايدى. سوندىقتان الماز شايحين وسىندا قاتىنايتىن اۆتوبۋستار سانى كوبەيتىلسە, بولماسا قوعامدىق كولىكتى ۇزاق كۇتەتىن بالالار توڭىپ قالماۋ ءۇشىن كەشەن ماڭايىنا جىلىتىلعان ايالدامالار سالىنسا دەپ اكىمدىككە ءوتىنىش تىلەگىن جەتكىزدى.
بايقوڭىر اۋدانى اكىمدىگى تۇرعىن الاپتارداعى حالىقتىڭ جايلى ءومىر ءسۇرۋى ءۇشىن جاعداي جاساپ, الەۋمەتتىك-مادەني ينفراقۇرىلىمدى دامىتۋدا قالا اكىمدىگىمەن بىرگە وسىنداي جۇمىستاردى جوسپارلى تۇردە جۇزەگە اسىرۋدى جالعاستىرا بەرمەك. ەندى اتالعان سپورت كەشەنىنە قاتىستى جوعارىدا ايتىلعان ماسەلەلەردى شەشۋدى دە قولعا الادى دەگەن سەنىمدەمىز.
