ەلوردادا «جانۇيا جىلۋى» قايىرىمدىلىق ءىس-شاراسى ءوتتى. بۇگىندە «جانۇيا» وتباسى ينستيتۋتىن قولداۋ ورتالىعىنا ەكى جىل تولىپ وتىر. ورتالىق قيىن جاعدايعا تاپ بولعان ازاماتتارعا پسيحولوگيالىق, الەۋمەتتىك جانە قۇقىقتىق تۇرعىدا قولداۋ كورسەتەدى. بۇل جەردە دەنساۋلىق ساقتاۋ, ءبىلىم بەرۋ, جۇمىسقا ورنالاستىرۋ, كاسىپكەرلىك, الەۋمەتتىك كومەك كورسەتۋ جانە تۇرعىن ءۇي باعدارلامالارى ماسەلەلەرى بويىنشا كەڭەس الۋعا مول مۇمكىندىك قاراستىرىلعان.
ەكى جىل بۇرىن, ياعني 2019 جىلدىڭ تامىزىندا ەل پرەزيدەنتىنىڭ تاپسىرماسى بويىنشا نۇر-سۇلتاندا قاناتقاقتى رەجيمدە «جانۇيا» وتباسى ينستيتۋتىن قولدايتىن العاشقى ورتالىق اشىلدى. جوبا قالا تۇرعىندارىنىڭ ءال-اۋقاتى مەن ءومىر ءسۇرۋ دەڭگەيىن ارتتىرۋ ماقساتىندا «حالىق ۇنىنە قۇلاق اساتىن مەملەكەت» تۇجىرىمداماسى اياسىندا جۇزەگە استى. مەرەكە قارساڭىندا نۇر-سۇلتان قالاسى اكىمدىگىنە قاراستى مەملەكەتتىك اكادەميالىق فيلارمونيا جۇلدىزدارى سۆەتا ايتباەۆا, التىناي جوراباەۆا, ارايلىم راحىمقىزى, التىنشاش مۇقاتاەۆا جانە قۋىرشاق تەاترىنىڭ ونەر ۇجىمى «جانۇيا» وتباسى ينستيتۋتىن قولداۋ ورتالىعىمەن بىرلەسىپ, ەرەكشە جاندارعا ارنالعان قايىرىمدىلىق كەش وتكىزدى.
ورتالىق بازاسىندا 10 مەملەكەتتىك ورگان مەن كۆازيمەملەكەتتىك ۇيىمداردىڭ قىزمەتى ۇيىمداستىرىلعان. «ءبىر تەرەزە» قاعيداتى بويىنشا مۇندا 70 قىزمەت بىرىكتىرىلگەن. قالا تۇرعىندارى جۇمىسقا ورنالاسۋ, ااك جانە باسقا دا الەۋمەتتىك جاردەماقىلار تاعايىنداۋ, ەتسق تاعايىنداۋ, الەۋمەتتىك قىزمەتتەر پورتالىندا وتىنىشتەردى تىركەۋ ماسەلەلەرى بويىنشا ءجيى جۇگىنەدى.
ورتالىق اشىلعالى بەرى ەكى جىل ىشىندە 75,5 مىڭ ادامعا كومەك كورسەتكەن. جىل باسىنان بەرى ورتالىققا 35 مىڭ ادام جۇگىنسە, 31 مىڭ ماسەلە قارالىپ, ونىڭ 18 مىڭى وڭ شەشىمىن تاپتى. سونىمەن قاتار قالعان 17 مىڭى بويىنشا جۇيەلى قادامدىق كونسۋلتاتسيا جۇرگىزىلدى.
«جانۇيا» ورتالىعى جۇمىسىنىڭ باستى ماقساتى – ومىرلىك قيىن جاعدايدا جۇرگەن ءاربىر وتباسىعا جان-جاقتى كومەك كورسەتۋ, وتباسى ينستيتۋتىن دامىتۋ جانە نىعايتۋ. جوبا العاشقى جىلى-اق جاقسى ناتيجە كورسەتىپ, قالا تۇرعىندارىنىڭ قولداۋىنا يە بولدى. 2020 جىلدىڭ مامىر ايىنان باستاپ ورتالىق كوممۋنالدىق مەملەكەتتىك مەكەمە رەتىندە جۇمىس ىستەي باستادى. ەلىمىزدىڭ باسقا وبلىستارىنىڭ جەرگىلىكتى اتقارۋشى ورگاندارىنىڭ وكىلدەرى جۇمىسىمەن تانىسىپ, وڭىرلەردە وسىنداي ورتالىقتار اشۋعا شەشىم قابىلدادى.
مەكەمە پسيحولوگتارى وتباسىلىق قۇندىلىقتاردى نىعايتۋ, پسيحولوگيالىق ماسەلەلەردى شەشۋ جانە كومەككە مۇقتاج جاندارعا ءومىردىڭ ماڭىزدىلىعىن ءتۇسىندىرۋ ءۇشىن وفلاين جانە ونلاين ءىس-شارالار وتكىزەدى. ولار سونداي-اق الەۋمەتتىك وسال جانە ەرەكشە قاجەتتىلىكتەرى بار بالالاردى تاربيەلەپ وتىرعان وتباسىلارعا, اۋداننىڭ وتباسىلاردى الەۋمەتتىك قولداۋ بولىمدەرىنىڭ ماماندارىمەن بىرگە بارادى. بيىل قاڭتار-تامىز ايلارىندا ورتالىق ەلوردانىڭ 233 تۇرعىنىنا پسيحولوگيالىق كومەك كورسەتتى.
سونداي-اق «جانۇيا» ورتالىعىندا زاڭگەرلىك, قۇقىقتىق كەڭەستەر, قولدانىستاعى زاڭنامانى ءتۇسىندىرۋ, كونستيتۋتسيالىق قۇقىقتاردى قورعاۋ بويىنشا وتىنىشتەردى جانە ازاماتتىق قۇقىقتاردى قورعاۋ اياسىندا ءتۇرلى مەملەكەتتىك جانە وزگە دە ۇيىمدارعا وتىنىشتەردى رەسىمدەۋگە كومەك كورسەتىلەدى. بۇدان باسقا, ورتالىقتا كونسۋلتانتتاردىڭ كومەگىمەن ەلەكتروندىق ۇكىمەت پورتالى ارقىلى قىزمەتتەردى الۋ ءۇشىن جەكە پايدالانۋىندا كومپيۋتەرلىك تەحنيكاسى جوق ادامدارعا وزىنە-ءوزى قىزمەت كورسەتۋ سەكتورى ۇيىمداستىرىلعان. كۇن سايىن مۇندا 300-دەن 500 ادامعا دەيىن ازامات جۇگىنەدى.
قازىرگى ۋاقىتتا ورتالىقتا كەلۋشىلەردى تىركەۋ جانە قالا تۇرعىندارىنىڭ الەۋمەتتىك جاعدايىن انىقتاۋ, سونداي-اق مەملەكەتتىك ورگانداردىڭ ءبىر-بىرىمەن تىعىز جۇمىس ىستەۋى ماقساتىندا «وتباسى ءپروفيلى» اقپاراتتىق جۇيەسى ەنگىزىلۋدە. مەكەمەدە جۇيەلى تۇردە اۋدان اكىمدەرى, قالا باسقارمالارىنىڭ جانە باسقا دا مەملەكەتتىك مەكەمەلەردىڭ باسشىلارى ازاماتتاردى قابىلدايدى.
مۇندا «كاسىپكەر انا» جەكە بيزنەستى دامىتۋ بويىنشا قولداۋ ورتالىعى جۇمىس ىستەيدى: ماماندار ءوز ءىسىن اشۋعا كومەك كورسەتەدى, كاسىپكەرلەر موتيۆاتسيالىق بيزنەس-ترەنينگتەر وتكىزەدى. ورتالىقتا ءاربىر قالا تۇرعىنىنا, ومىرلىك قيىن جاعدايدا جۇرگەن وتباسىعا كومەك كورسەتىلەدى. قوعامدىق ۇيىمدارمەن بىرگە مۇنداي وتباسىلارعا ازىق-تۇلىك سەبەتتەرى, بالالار كيىمدەرى تابىستالىپ, قايىرىمدىلىق كومەك كورسەتىلەدى.
نايما نۇرالىقىزى
