АСТАНАНЫҢ АЙШЫҚТЫ ТҰСАУКЕСЕРІ
Кеше Париж қаласында өткен Халықаралық Көрмелер Бюросының 153-ші сессиясында Астананың жеңімпаз қала ретіндегі алғашқы тұсаукесері өтті. Бұл туралы «Астана ЭКСПО-2017» Ұлттық компаниясы» АҚ-ның баспасөз қызметі хабарлады.
Қазақстандық тарап ЭКСПО көрмесін өткізуге қол жеткізгеннен кейін жасалған жұмысы және Тіркелім құжаттамасын даярлау барысы жөнінде есеп берді. Отандық делегация құрамында ҚР Сыртқы істер министрінің бірінші орынбасары, «ЭКСПО-2017» Халықаралық мамандандырылған көрмесінің Комиссары Рәпіл
Жошыбаев, «Астана ЭКСПО-2017» ҰК» АҚ-ның Басқарма төрағасы Талғат Ермегияев болды.
Бұл – Астананың жеңімпаз қала ретіндегі бірінші тұсаукесері. Онда Мемлекеттік комиссия және Ұлттық компанияның құрылуы мен олардың міндеттері туралы, жобаны қаржыландыру мәселесі, халықаралық қатысушы елдермен жұмыс жүргізу бойынша іс-шаралар кешені, көрмені өткізгеннен кейінгі ЭКСПО нысандарын пайдалану жоспары сынды ақпарат берілген. Өз сөзінде Р.Жошыбаев ХКБ-ға мүше елдер өкілдеріне былтыр қараша айында елімізге дауыс беріп, барынша қолдау көрсеткені үшін алғыс айтты. Бельгияға әділ бақталастық үшін ризашылығын білдірді. Сондай-ақ ол: «Қазақстан өз тарапынан 2017 жылы ЭКСПО көрмесін сәтті өткізуге барлық мүмкіндіктер жасайды. Біз ЭКСПО көрмесіне қатысушы елдерге және көрмені тамашалауға келуші адамдарға барынша жақсы жағдай жасауға тырысамыз. ЭКСПО-ны мемлекетіміз халықаралық көрмелер тарихында өз атын алтын әріппен қалдыратындай дәрежеде өткізуге ниеттіміз», – деп атап өтті.