БАС ҚАЛАМЕН БІРГЕ ЕСЕЙГЕН «АСТАНАТЕЛЕКОМ»
Бүгінгі таңда елорда тұрғындарын телекоммуникация құралдарынсыз көзге елестету тым қиын. Себебі, қазіргі күні Астанада телефон желісі қосылмаған үй немесе ғаламторды пайдаланбайтын пенде жоқтың қасы. Атап айтқанда, «Астанателеком» ҚТО жергілікті жұртшылыққа қазіргі заман талабына сай жаңа сандық технологиялар негізінде ең керемет телекоммуникациялық қызмет түрлерін ұсынуда.
«Қазақтелеком» АҚ-ның Астана қаласындағы «Астанателеком» ҚТО филиалында орналастырылған бұл мұражайға «Телеграф», «Телефон», сондай-ақ, «Радио және теледидар» санаттары бойынша 100-ден астам көне экспонат қойылыпты. Соның бірі – бір ғасырлық тарихы бар, яғни 1910 жылы жасалған Le Marty фирмасының француз телефоны.
Әсем Астанамыз биыл 15-ке толғалы отырса, «Астанателеком» ҚТО да осы жылы өзінің 15 жылдық мерейтойын атап өтуде. Осыған орай, елордамызбен бірге өсіп, бірге қалыптасып, бірге қанат жайып келе жатқан мекеменің өткені мен бүгінін бір ой елегінен өткізіп, онда атқарылып жатқан шаруаларға аз-кем тоқталуды жөн көрдік.
Өткенсіз бүгін жоқ
«Астанателеком» ҚТО-ның ғұмыры Астана қаласы елорда мәртебесіне ие болған тұстан басталады. Өткенге көз салсақ, 1994 жылы Қазақстан Республикасы Президентінің заң күші бар «Қазақстан Республикасының астанасы туралы» № 2457 Жарлығы шықты. Соның негізінде бұрынғы облыс орталығы Ақмола қаласына астана мәртебесі берілді. Көп ұзамай, нақтырақ айтсақ, 1998 жылдың 5 ақпанында «Қазақтелеком» АҚ акционерлерінің кезектен тыс жалпы жиналысы өтті. Сол жиналыстың №2 хаттамасына сәйкес, «Астанателеком» ҚТО-ны құру туралы» шешім қабылданып, астаналық телекоммуникация орталығы Ақмола облыстық телекоммуникация дирекциясы құрамынан бөлініп шықты. Оның бірі біздің қала тұрғындарына, ал екіншісі Ақмола облысына қызмет көрсете бастады. Бұл – қала тағдырындағы аса шешуші кезең еді. Әрине, кәсіпорынның қалыптасу жылдары оңайға соққан жоқ. Қиындықтар көп болды. Көп нәрсені басынан бастауға, атап айтсақ, қалалық радиотелефон желісін, қалааралық телефон станциясы мен радио торабын біріктіруге тура келді. Мемлекеттік мекемелердегі байланыстың бір сәтке де үзілмеуі үшін монтерлер мен байланысшылар күн-түн демей дамылыссыз еңбек етті. Осылайша, 1998 жылдан бастап 2002 жылға дейінгі аралықта желіні жаңғырту бағдарламасы жүзеге асырылды.
Кадр біліктілігі бәрінен қымбат
Бас қала инфрақұрылымының ажырамас бір бөлігі болып саналатын «Астанателеком» ҚТО-ның қызметіндегі негізгі басым бағыттардың бірі – кәсіби білікті мамандар даярлау. Осы мақсатта 2008 жылы техникалық қызмет көрсету орталығының базасында мекеменің оқу полигоны ашылған болатын. Онда жұмысшыларды оқытуға, қайта оқыту мен біліктілігін арттыру ісіне ерекше көңіл бөлінеді.
Оқу полигонында техникалық блок жұмысшыларының өндірістік дайындықтан өтуіне, яғни жұмысқа жаңадан келген қызметкерлердің білмегенін үйренуі мен бұрыннан жұмыс істеп келе жатқан электромонтерлер мен электромеханиктердің, кәбілші-дәнекерлеушілердің біліктілігін арттыруға барлық жағдай жасалған. Мұндағы оқу техникалық қауіпсіздіктің халықаралық стандарттарына сәйкес жүргізіледі.
Оқу полигонында заманауи құралдармен жабдықталған оқу сыныбы мен өндірістік сабақтар жүргізуге арналған орын бар. Оқу сыныбы байланысу сұлбасы салынған ақпараттық стендпен безендірілген. Сабақ өткізілетін жерде байланыс модельдері емес, негізгі телекоммуникациялық құралдар қойылған. Бұл жерде тыңдаушылардың телекоммуникациялық қызмет саласындағы ең соңғы жаңалықтармен толық танысуына мүмкіндік мол. Кәсіпорын аумағында орналасқан оқу полигонында пәтердің макеті қойылған. Пәтердің макетіне барлық қызмет түрлері, атап айтсақ «Megaline», «iD TV» , «iD Phone», «iD Net» қосылған. Сол арқылы орталықтың байланыс саласында жұмыс істейтін техникалық мамандары телефонды пәтерде қалай жүргізуге болатынын және мыс кәбілімен қарапайым модемге қалай қосу керектігін және т.б. оқып-үйренеді. Жалпы, мұнда өткізілетін әрбір тәжірибелік және практикалық сабақтар барысында жаңадан келген тыңдаушы да, сондай-ақ тәжірибелі жұмысшы да өзіне қызықты деректер ала алады.
Кәсіби білікті әрі білімді мамандар дайындауды басты мақсат еткен қалалық телекоммуникация орталығындағылар еліміздің бас қаласымен бірге есейіп келе жатқанын, сөз жоқ, мақтан тұтады. Жалпы, мекеменің кез келген қызметкері елордалық мәртебеге сай қызмет ету керектігін бір сәтке де естен шығармайды. Қалалық телекоммуникация-лар орталығының басшылары болса олардан үнемі кәсіби біліктіліктерін арттырып отыруды, сондай-ақ қызмет көрсету барысында мәдениеттілік танытумен бірге мемлекеттік тілді еркін меңгеруді талап етеді.
«Астанателеком» ҚТО Бас директоры Ермек Болатұлы Қуанышбековтің айтуынша, қалалық телекоммуникация орталығы мұнда келуші клиенттерге де, сонымен бірге осында еңбек етіп жүрген қызметкерлерге де жұмыс істеуге барынша жайлы жағдай туғызу мақсатында, қолдан келген мүмкіндіктердің барлығын қарастыруда. Соның нәтижесі болар, бүгінде тұтынушылар «Астанателеком» ҚТО ұсынған қызмет түрлеріне дән риза.
Мінсіз қызмет – абыройлы міндет
«Астанателеком» ҚТО-ның кеңейтілген сервис орталығы 2002 жылдың 3 сәуірінде ашылған. Оны құрудағы негізгі басты мақсат, қалалық телекоммуникация орталығын телекоммуникациялық қызмет түрлерін жүргізуге дайындау, осы саладағы қызметтің жаңа түрлерін нарыққа енгізумен бірге, байланыс операторларының қызметін жақсарту болатын.
Бұл орталықта ISDN қызметі мен жаһандық интернет желісіне қол жеткізуге ерекше көңіл бөлінеді. Корпоративті клиенттермен жұмыс істеу үшін және оларға телекоммуникациялық қызметтің барлық түрлерін тиісті деңгейде ұсыну мақсатында ашылған осы орталықта, келушілерге ерекше ықыласпен әрі құрметпен жоғары сапалы қызмет көрсетіледі.
Кеңейтілген сервис орталығы негізгі екі бөлімнен тұрады. Олар: қызметтерді ілгерілету бөлімі, сату және сүйемелдеу бөлімі. Ондағы қызметкерлер заңды тұлғалармен, яғни жауапкершілігі шектеулі серіктестіктермен, акционерлік қоғамдармен және жеке кәсіпкерлермен жұмыс істейді.
Техникалық жабдықтау орталығы телекоммуникация жүйесіндегі жұмыстың үздіксіз жүргізілуін қамтамасыз етумен айналысады. Бұл қалалық телекоммуникация орталығындағы ең негізгі өндірістік учаскелердің бірі болып табылады.
Ұжымда сексенге жуық адам еңбек етеді. Олардың арасында байланысшылардың барлық буын өкілдері бар. Көп жылдан бері осы салада тынымсыз еңбек етіп келе жатқан ардагер мамандар, кейінгі толқын арасында тәжірибелерімен бөліссе, жұмысқа жаңа келген жас мамандар олардан білмегендерін сұрап, үйренуден тартынбайды.
Әрине, мұнда кездейсоқ келген адамдар жоқ. Әрбір маман өз ісіне ерекше жауапкершілікті сезінеді. Себебі, олар өзі атқаратын жұмыстың нәтижесі жалпы ортақ іске байланысты екенін жақсы түсінеді. Ал, орталықтың негізгі жұмысы елордамыздағы байланыс сапасын жақсартуға бағытталған.
«Астанателеком» ҚТО сату орталығының қызметкерлері де абоненттерге жоғары сапалы қызмет көрсетуді басты мақсат санайды. Cату орталығы үш бөлімнен тұрады: техникалық сүйемелдеу бөлімі, сату және сервистік қызмет көрсету бөлімі, қызметтерді ілгерілету тобы. Азаматтардың өтініштері мен олардың төлемдерін қабылдау осы орталықта жүргізіледі. Бұл бөлімде 50-ге жуық маман «Клиенттің айтқаны қашан да – заң» деген қарапайым ұранмен жұмыс істейді. Сондықтан да олар өздеріне жүктелген жауапкершілікті жақсы түсінеді.
Байланыс орталығында да операторлар отырады. Олар клиенттің кез келген мәселесін жылдам әрі сапалы шешуге тырысады. Өз жұмыстарына деген осындай көзқарастың арқасында қалалық телекоммуникация орталығы бөлімшелерінің қызметкерлері жоғары нәтижелерге қол жеткізуде.
Тұтынушыларды ақпараттық қолдау орталығының қызметкерлері хабарласушыларға анықтамалық-ақпараттық қызметтің сан алуан түрлерін ұсынады. Мәселен, 160 нөмірін теру арқылы клиент өзіне қажетті ақпараттарды ала алады. Атап айтсақ, тұтынушының телефон арқылы Мегалайн қызметіне қосылуы үшін немесе негізгі және қосымша телефон орнатуға өтініш беруіне, сонымен бірге көрсетілетін қызмет және тариф бойынша кеңес әрі анықтама алуына әбден болады. Жалпы, сала қызметкерлерінің іс-әрекеті мен жұмысқа деген құлшынысы, олардың клиенттерге көрсетілетін қызмет сапасын арттыруды ғана мақсат ететіндерін аңғартты. «Осы мақсатқа қол жеткізу үшін, біз телекоммуникация саласын жаңғырту және сервис-менеджмент жүйесін толық жетілдіру барысында тұрақты жұмыстар жүргізіп келеміз», – дейді «Астанателеком» ҚТО-ның бас директоры Ермек Қуанышбеков.
Мұражайға келушілер көп
Астанадағы телекоммуникация орталығында, саласының әр дәуірдегі жетістігінен сыр шертетін «Ұрпақ пен уақыттың байланысы» атты бірегей мұражай бар. «Қазақтелеком» АҚ-ның Астана қаласындағы «Астанателеком» ҚТО филиалында орналастырылған бұл мұражайға «Телеграф», «Телефон», сондай-ақ «Радио және теледидар» санаттары бойынша 100-ден астам көне экспонат қойылыпты. Соның бірі – бір ғасырлық тарихы бар, яғни 1910 жылы жасалған Le Marty фирмасының француз телефоны.
Сондай-ақ, бүгінгі таңдағы алпауыт компаниялардың үлгі ретінде шығарылған алғашқы өнімдері, атап айтсақ өткен ғасырдың 20-30 жылдары шығарылған Siemens компаниясының алғашқы телефоны да мұражай төрінен орын алған.
Осындағы ең көне жәдігердің бірі – 1905 жылы үлгі ретінде шығарылған телефон аппараты. 1955 жылғы КВН түріндегі ТВ қабылдағышы, қазіргі радионың прототипі – радиорепродуктор бүгінгі таңда баға жетпес құнды дүние. 1867 жылы Морзе ойлап тапқан құпия аппарат пен Морзенің тағы бір туындысы – телеграф та осында тұр. Оны Ресейден алдырыпты.
Бір қызығы, мұндағы көне дүниелердің барлығы да жұмыс істеп тұр. Тетігін бассаң болды, сайрай жөнеледі.
Мұрағатқа қойылған құжаттар, фото және бейне, аудио жазбалар тек Ақмола облысы аумағында ғана емес, жалпы республика аумағындағы телекоммуникация құралдарының даму тарихын көрсетеді. Орталық қызметкерлері барлық қалаларды аралап жүріп, мұнда құнды заттарды жинап әкеледі екен. Мұражайға қойылған төрт үлкен монитордың біріншісінде телефоннның алғашқы үлгілері туралы деректер айшықталса, екіншісінде телефон тарихы мен оны құрастырған өнертапқыштар туралы деректер көрсетіледі. Ал, үшіншісінде әр дәуірде бізге келген құрметті қонақтар мен тұтынушыларымыз туралы деректер берілген. Соңғы монитор телекоммуникация қызметкеріне, яғни осы салада қызмет еткен кәсіби мамандарға, ардагерлерге арналған.
Мұражай шағын болғанымен, құнды дүниелері жағынан Ресейдің Санкт-Петербург секілді ірі қаласындағы жәдігерлерден кем емес көрінеді. Мұнда адамдар өте көп келеді екен. Құрметті қонақтар тілек кітабына ізгі ниеттерін жазып, өз пікірлерін қалдырып жатады. Осылайша, аталмыш жүйеннің жетістіктеріне біз де куә болдық.
Тілек кітабына түсер келесі қолтаңбаның иесі бәлкім, сіз боларсыз, құрметті оқырман. «Жақсыны көрмек үшін» деген. Ендеше, асығыңыз…
Гүлбаршын ӨКЕШҚЫЗЫ