Электронды әкімдік уақытыңызды үнемдейді
Бұрын көпшілік бір жапырақ анықтама қағаз үшін ұзақ-сонар кезекке тұрып, бар уақытын зая кетіретін.
Ал қазір электронды әкімдік іске қосылғалы астаналықтар біраз мемлекеттік қызметтер түріне үйден шықпай-ақ, қол жеткізетін болды.
Жұртшылыққа электронды қызмет көрсетудің жүйесі екі қауіпсіздік сатысынан тұрады. Оның бірі – веб-порталға (www.e.astana.kz) қосылу каналының қорғалуы болса, екіншісі – идентификациялық номер (ЖИН) арқылы берілетін тапсырысты қосымша растауға арналған арнайы электронды сандық қолтаңбалар (ЭСҚ). Электронды сандық қолтаңбаны қазірден бастап электронды үкіметтің e.gov.kz сайтынан, сондай-ақ, қаладағы халыққа қызмет көрсету орталықтарынан алуға болады.
«Веб-порталды құрудағы басты мақсат – тұрғындарға аса қажетті, сұранысы жоғары мемлекеттік қызметтердің қолжетімділігін арттыру және тұрғындардың уақытын үнемдеу. Қызмет көрсетудің жеделдігі сондай, азаматтар кез келген уақытта интернет арқылы қажетті анықтама қағаздарына тапсырыс беріп, қажетті мәліметтерін жылдам ала алады», – дейді Астана қаласы әкімдігінің Мемлекеттік қызметтер көрсету сапасының сақталуын бақылау жөніндегі бөлімінің жетекшісі Руслан Бешеев.
Бүгінде электронды әкімдік арқылы мемлекеттік тұрғын үй қорынан тұрғын үйге немесе жеке тұрғын үй қорынан жергілікті орган жалдаған тұрғын үйге мұқтаж азаматтарды есепке алу және кезекке қою, 18 жасқа дейiнгi балалары бар отбасыларға мемлекеттiк жәрдемақылар тағайындау, балабақшаға балаларды кезекке қою немесе мектепке дейінгі балалар ұйымдарына жолдама беру үшін мектеп жасына дейінгі (7 жасқа дейінгі) балаларды тіркеу, Семей ядролық сынақ полигонында ядролық сынақтардың салдарынан зардап шеккен азаматтарды тiркеу және есепке алу сынды бас-аяғы 19 мемлекеттік қызмет түрін алуға болады. Биыл электрондық мемлекеттік қызметтер тізіліміне Табиғи ресурстар және табиғатты пайдалануды реттеу басқармасының II, III, IV санаттағы кәсіпорындарға қоршаған орта эмиссияларына рұқсат беру және әкетілетін және әкелінетін мәдени құндылықтардың болуы туралы сертификат беру қызметтері қосылмақ.
Бүгінде электронды әкімдік қызметін пайдаланушылар қатары күннен күнге көбейіп келе жатқан көрінеді. Электронды портал қызметін күніне орта есеппен 50-60 адам пайдаланып, шамамен 120 мемлекеттік қызмет түрін алады екен.
Электронды әкімдік арқылы көпшіліктің ең көп пайдаланатын қызметі балаларды балабақшаға есепке қою екен. Биыл сегіз айдың ішінде осы арқылы 12 440 балдырған мектепке дейінгі мекемеге кезекке қойылған. Жалпы электронды қызмет түрлері тұрғындарға өте қолайлы. Әсіресе, уақыты үнемі жетпей жүретін астаналықтар үшін тиімді. Е-әкімдік қызметін пайдалану күрделі де емес. Веб-порталға электронды сандық қолтаңба арқылы тіркелсеңіз жеткілікті. Осылайша, басты бетті ашып, ондағы өзіңізге қажетті қызмет түрін таңдайсыз. Медициналық препараттарды іздеу, тұрғын үйге, балабақшаға тіркелу қызметтерінің бәрі қаз-қатар тізіліп тұр. Коммуникациялық төлемдердің түбіртегін де осы беттен тауып аласыз.
Ал егер электронды порталдың қызметінің сапасына байланыс-ты немесе қандай да бір қызмет түрін ала алмай жатсаңыз, онда 55-66-55 телефонына қоңырау шалуыңызға болады. Бүгінде электронды әкімдік порталына жаңа бағдарламалар енгізіле басталыпты. Осыған байланысты ара-кідік техникалық ақаулар кездесуі мүмкін, бірақ, бұл уақытша жағдай дейді мамандар.
Мемлекеттік мекемелердің қызметін автоматтандыруға және қызметкерлер жұмысының ашықтығын арттыруға мүмкіндік беретін жобаны Астанада айына 4 мыңға жуық адам пайдаланады екен.
Қымбат ТОҚТАМҰРАТ