Астана қаласы әкімінің орынбасары Андрей Лукиннің төрағалығымен әлеуметтiк әрiптестiк пен әлеуметтiк және еңбек қатынастарын реттеу жөнiндегi қалалық үшжақты комиссиясының кезектi отырысы өтті.\
Бұл жолы күн тәртібі кәсіподақтар мәселесі мен еңбек қауіпсіздігі төңірегінде өрбіді. Онда комиссия мүшелері «Кәсiптiк одақтар туралы» Қазақстан Республикасы Заңының талаптарына сай өзін-өзі тарату рәсімдерін түсіндіру жөнінде әңгіме қозғады. Сонымен қатар, заңдылықты сақтай отырып, жұмысын жалғастыра алмай отырған кәсіптік одақ ұйымдары әрі қарай қалай қарекет етуі жайына кеңінен тоқталып, құқықтарын түсіндірді.
Жиында Қазақстан Республикасы жаңа Еңбек кодексі шеңберінде қаланың кәсіпорындарында ұжымдық шартты жасасу туралы, еңбек заңнамасын сақтау, оның ішінде жалақы бойынша берешекті өтеу бойынша жұмысты күшейту туралы мәселелер де қаралды.
Сондай-ақ, еңбек күнін мерекелеуге арналған қалалық форумды өткізу жөніндегі жоспар-тапсырма мен 2017-2019 жылдарға арналған еңбекті қорғау және еңбек қауіпсіздігін қамтамасыз ету бойынша «Қауіпсіз еңбек» бағдарламасының жобалары талқыланды.
Отырыс қорытындысында тараптардың келісімі бойынша нақты шешімдер қабылданды.
