ЕУРОПА КИНОСЫ ЕЛОРДАДА
Астанада «Еуропа күні» аясында Еуропа мемлекеттерінің 15 үздік киносын елордалық көрермендер тамашалауда.
Бүгінгі таңда Еуропа киносы әлемдегі озық өнердің үлгілері қатарынан саналады. Аузымен құс тістеген талантты тұлғалары да жетерлік. Адам психологиясына терең бойлай білетін дүниелерді ерекше айтуға болады. Мәселен, үздіктер қатарындағы «Оскар-2016» жүлдесінің лауреаты атанған «Эми» фильмі, «Үздік режиссура» үшін 2015 жылы Варшава кинофестивалінде жеңімпаз болған Эстония мен Грузияның бірлесіп түсірген «Мандарины» әскери драмасы секілді салмағы ауыр кинолардың көркемдік әлемі қызықтырмай қоймайды.
Елордадағы айтулы өнер фестивалі «Мысықтардың басы айналмайды» атты Португалиялық кинокомедиясымен ашылды. Бұл фильм 2014 жылы Португалияның ұлттық кинопрокатында көш бастап, көптеген халықаралық фестивальдерге ұсынылған.
Қазақстандағы Еуроодақ өкілдігінің басшысы Траян Хистеаның айтуынша, Еуропаның киносы біздің елімізде мол сұранысқа ие екен. Сондықтан игі шараға Еуропа елдерінің тек үздік туындылары таңдалған.
– Жалпы, фестиваль аясында Қазақстанның үлкен экранына шығарамыз деген кинолар іріктелді. Басты талап, кино – Еуроодақ құрамындағы елдердің көрермендеріне танымал, рейтингісі жоғары, сюжеті сапалы болу керек. Фестивальге әртүрлі жанрды, түрлі аудиторияға арналған кинолар алынды, – дейді елші.
Шара шымылдығы бүгін Чехия елі түсірген «Жолы болғыш бейбақ» киносымен жабылады.
Азамат ЕСЕНЖОЛ