Фариза феномені
Ұлттық академиялық кітапханада Қазақстанның халық жазушысы, Мемлекеттік сыйлықтың лауреаты Фариза Оңғарсынова туралы «Білмейсіңдер, мені әлі білмейсіңдер» атты естелік кітаптың таныстырылымы болды. Әдеби шараға елордадағы зиялы қауым мен Атырау мен Маңғыстаудан келген делегация өкілдері қатысты.
Бұл жинақ «Фариза Оңғарсынова» атындағы қайырымдылық қордың қолдауымен жарық көрді. Кітапты құрастырған – журналист Гүлсім Оразалықызы. Айтулы еңбекке Әбділда Тәжібаев, Әбіш Кекілбаев, Серік Қирабаев секілді әдебиет алыптарынан бастап, өмірде ардақты ақынмен жақын сыйласқан, шығармашылығын қадір тұтқан замандастары мен қаламдастарының естеліктері топтасқан.
Басқосуды Мәжіліс депутаты, белгілі қаламгер Сауытбек Абдрахманов жүргізіп, арғы-бергі дәуірде ғұмыр кешкен жақсылардан тартып, солардың өнегелі жолын жалғаған асыл ақын туралы ақтарылып сөйледі.
«Өткен ғасыр ортасында халық «қарағайға қарсы біткен бұтақтай» тұлғалардың төңірегінде топтасып, соларды құрметтеу арқылы өз мінезін көрсеткісі келді. Билікке иілмеген сайын Баукеңді жұрт жақсы көрді. Сол жылдарда осындай фенемон құбылысты әйел баласынан жасаған адам – Фариза Оңғарсынова. Біз Фаризаны қазақ әдебиетінің жарық жұлдызы, жырымыздың топтан озған жүйрігі деп қана бағалаймыз. Оның феноменін ұғу үшін бабаларымыздың қыз баланы қонақ деп қадірлейтін ерекше қасиетін түсіну қажет. Оңғарсынова арқылы қазақ қоғамында қыз бала қадірлірек бола түсті. Әйел адамның абыройы артты. Өйткені Фаризаның ықпалы әдебиет пен мәдениеттің маңайынан асып, құбылысқа айналды» деп парасатты ой қозғады. Одан кейін сөз кезегі тиген белгілі қоғам қайраткерлері Өмірбек Байгелді мен Оралбай Әбдікәрімов талантты тұлғаның адами болмысы жайында әсерлі естелік айтты. Жарық дүниеде аяулы кісімен жақын бауыры болып араласқан, бүгінгі Мәжіліс депутаты Бақтықожа Ізмұхамбетов Фариза есімін дін жолын берік ұстаған атасы қойғандығын әңгімеледі. Ал белгілі қайраткер Равил Шырдабаев: «Ол ерекше адам болды. Қайраткерлік қыры да бөлек. Тәуелсіздік алғаннан кейін екі әйел ғана жазушы халық қалаулысы атанды. Соның бірі – Фариза. Біздің өңірдің табиғатын оның шығармаларынан білуге болады. Мәселен, одан Каспийдің ерке толқынын, Нарын құмының гүлін немесе жусан мен адыраспанның иісін сезінесіз» дей келіп, Атырау облысының әкімі болып тұрғанда Жұмакен мен Фаризаға еңселі ескерткіш тұрғызған Б.Ізмұхамбетовке ризашылығын білдірді.
Сондай-ақ, шара барысында Бірғаным Әйтімова, Оразкүл Асанғазы ақынның қайраткерлік қырларына тоқталды. Көрнекті тұлға Қаратай Тұрысовтың зайыбы Әскергүл апа дарынды жанның қайсар мінезін дәріптеді. Халқымыздың тағы бір қайраткер қызы Зәуре Қадырова оның сырқаттанып жүргендегі соңғы сәттерінен сыр шертті. Белгілі сатирик Көпен Әмірбек Фариза апамызбен Түркіменстанға барған сапарындағы бір оқиғаны айтып, жиналғандарды ду күлдірді.
Қысқасы, ойымызды Сауытбек ағаның «бұл кітап тұтастай дерлік адам Фаризаны ашуға арналған» деген сөзімен түйіндесек болады.