Көктемнің жарқын мерекесі – Наурыз мейрамын «Қазақстан Халық Банкі» АҚ Астана өңірлік филиалының қызметкерлері елордалықтармен бірге қарсы алды.
Ұлыстың ұлы күнінде «Қазақстан Халық банкі» АҚ Астана өңірлік филиалы да «Қазақ елі» монументінің алдына ақшаңқан киіз үй тігіп, ата-баба салтымен бас шаһар тұрғындары мен қала қонақтарына арнап мерекелік дастархан жайды.
Халқымыздың сүйікті мейрамына айналған жыл басы – Наурыз тойы күні Тәуелсіздік даңғылының бойына орналасқан «Қазақ елі» монументі маңына ағылғандар аз болмады. Олардың арасында еңбек ардагерлері мен қариялардың қарасы көп болды. Ұлыстың ұлы күніне арналған думанда «Қазақстан Халық банкі» АҚ Астана өңірлік филиалының директоры Нұрлыбек Ержігітұлы Сейдахмет қазына қарттарымыз – ақсақалдарымыз бен Ұлы Отан соғысының ардагерлерін, жалпы мерекені тамашалауға жиналған барлық ағайынды Наурыз мейрамымен құттықтап, оларға айрықша құрмет көрсетті.
Наурыз – достықтың, ынтымақ пен ырыстың, берекенің, жаңарудың мерекесі, халықтар бірлігі мен татулығының бастауы. Сондықтан да, бұл мейрам бір ұлтқа ғана емес, жалпы жұртшылыққа ортақ болып, ұлыстардың ұйытқы болуымен шын пейілдегі жалпыхалықтың мейрамына айналып келе жатқанын тілге тиек еткен Н.Сейдахмет дастархан басына жиналған жамағатқа жақсылық, дендеріне саулық, отбастарына береке-бірлік, ынтымақ пен ырыс тіледі. Үлкендер жағы банк ұжымына шынайы алғыстарын жеткізіп, бата берді. Сөйтіп, мерейлі мерекеде киіз үйге бас сұққан әр адам қымыз бен наурыз көжеден дәм татып, дастарханға төгілген бауырсақтан, сондай-ақ, жент, ірімшік, құрт секілді басқа да ұлттық тағамның алуан түрінен ауыз тиді.
Ұлттық нақышта безендірілген киіз үйдің іші халқымыздың күнделікті тұрмысқа қажетті құрал-саймандары мен оюлы бұйымдарына толған. Қолдан өрілген қамшы мен үкілі домбыра төрден орын алған. Одан әрі қатар-қатар ілінген сауыт, ертоқым, өрнекті белдіктер көздің жауын алады.
Күн мен түннің теңеліп, жан-дүниені тірілткен, шаруаның бір малы екеу болып, арқа-басы кеңіп, аққа аузы тиген, қытымыр қыстың ызғарынан құтылып, алдағы шуақты күндерден үміттендірген Наурыз мерекесі ежелден халықтық мереке болатын. Бұл мереке әр уақытта халқымызда іргесі сөгілмеген бірліктің, еңселі ерліктің, ырыс пен бақ-берекенің мерекесі болып саналатын.
Жалпы, биылғы жыл – «Қазақстан Халық банкі» үшін ерекше жыл. Бұған дейін хабарлағанымыздай, биыл «Қазақстан Халық банкі» АҚ-ның құрылғанына 90 жыл толып отыр. Осыған орай, үстіміздегі жылдың басынан бері әр ай сайын банктің мерейтойына орайластырылған шаралар жалғасын табуда. Мәселен, қаңтар айында банктің Астана қалалық филиалы «Алау» мұз айдынында «Халық старт» акциясын ұйымдастырып, оған осындағы мектеп оқушылары, балалар үйлерінің тәрбеленушілері қатысты. Әртүрлі жарыстарда жүлдегер деп танылған балалар сый-сияпатқа ие болып, мәре-сәре күйде тарқасса, осындай игі шараның бірі ақпан айында елордамыздағы «Тілеп Қобыз» сарайында жалғасты. Бұл жолы «Халық өнері» бағдарламасы аясында банктің демеушілігімен аталмыш сарайдың «Көк түркілер» фольклорлық ансамблі көпшілікке өз өнерін ұсынды. Концертке арнайы шақырылған қонақтар қатарында банк клиенттері: ардагерлер мен зейнеткерлер, мектеп мұғалімдері мен ақ халатты абзал жандар, яғни медицина қызметкерлері болды. Көпшілікті мерейтойымен ортақтасуға шақырған «Халық банкінің» басшылығы осындай игілікті шараларды алдағы уақытта да жалғастыратынын жеткізді.
Гүлбаршын ӨКЕШҚЫЗЫ
