Астана қаласы мәслихатының кезекті сессиясына дайындалу аясында халық қалаулылары елордамыздағы «LED Solution» жауапкершілігі шектеулі серіктестігі мен «Тәкенов» жекеменшік кәсіпорнында болып, олардың тыныс-тіршілігімен танысты.
Мәслихаттың алдағы сессиясында «Елордадағы шағын және орта бизнесті қолдау және дамытудың жай-күйі мен барысы туралы» мәселе қарастырылмақшы. Осыған орай, Астана қаласы Кәсіпкерлік және өнеркәсіп басқармасы басшысының орынбасары Рыскүл Қауғабаева бас шаһардағы кәсіпкерлік нысандарын депутаттармен бірге аралады.
Оның айтуынша, бүгінгі таңда бас қалада 165 мың адам шағын және орта кәсіпкерлік саласында жұмыс істеп жүр. Яғни, экономикалық белсенді халықтың шамамен 40 пайызы шағын және орта бизнес-пен айналысуда. Олар 1 трлн 52 млрд теңгенің өнімін шығарды және қызметтерін көрсеткен. Бұл өткен жылдың сәйкес кезеңімен салыстырғанда 18,6 пайызға артық.
Жалпы, шағын және орта кәсіпкерлікті дамыту кез келген ел экономикасының негізі екені белгілі. Бұл ретте дамыған елдердің тәжірибелері көрсетіп отырғандай, шағын және орта бизнесті қалыптастыру мен дамыту экономиканы нығайту үшін қолайлы алғышарттар жасайды.
Президент Н.Назарбаев Қазақстан халқына Жолдауында: «Жапония, Германия, Бельгия, Италия сияқты елдерде шағын және орта бизнес олардың барлық кәсіпорындары санының 90 пайыздан астамын құрайды, көптеген дамыған елдерде олар жалпы ішкі өнімнің 50 пайыздан астамын береді. Сондықтан да біздің шағын және орта кәсіпкерлікті дамытудың түбірінен жаңа идеологиясын түзуіміз қажет. Бұл кәсіпкерлік ортаның бастамашылығын іске асыру үшін қолайлы жағдай туғызуымыз керек» деп айтқан болатын. Расында да, бүгінгі таңда әрбір іскер қазақстандық осы ортаға кірігіп, инновациялық экономикадағы өз орнын табуға тиіс. Осыған орай, отандастарымыздың бастамашылығына кең өріс ашу үшін елімізде барлық жағдай жасалды, кәсіпкерлер ендігі жерде осы мүмкіндіктерді ұтымды пайдаланып жүр.
Қаламызда «Бизнестің жол картасы – 2020» бағдарламасы жүзеге асырылуда. Сол бойынша 6 мыңнан астам кәсіпкер қамтылған. Елорда әкімдігі жанындағы Астана қаласын жеделдетілген индустриалды-инновациялық дамыту жөніндегі үйлестіру кеңесі бағдарламаны іске асыру барысында жалпы сомасы 38 911,5 млн теңгені құрайтын 195 жобаны мақұлдады. Оның ішінде жоғарыда аталған кәсіпорындардың да жобалары бар.
Депутаттар осыдан кейін «LED Solution» ЖШС-не ат басын тіреді. Мекеме басшысы Қаныбек Айтақов мұнда қаладағы өнеркәсіптік кәсіпорындарда, спорт орталықтарында, медициналық мекемелерде, көшені жарықтандыруда және басқа салаларда қолданылатын сапалы светодиодты өніммен қазақстандық нарықты қамтамасыз ету бойынша жоба енгізілгенін айтты. Соның нәтижесінде осы мекемеде 20-дан астам жұмыс орыны ашылған. Кәсіпорын жылына 60 мың дана светодиод шығарады екен.
Бұдан кейін қалалық мәслихаттың депутаттары елордадағы «АстанаЭкоСтандарт» және «СтальЦинк» жауапкершілігі шектеулі серіктестіктерінде болды. Бұл кәсіпорындар да ауқымды жұмыстар атқаруда. 2011 жылы қолжетімді бағамен сапалы азық-түлік өнімдерін өсіру үшін «АстанаЭкоСтандарт» ЖШС жеміс-көкөніс өнімін өндіру және өңдеу» жобасы іске қосылған болатын. Міне, содан бері аталмыш кәсіпорын қала тұрғындарын жылдың төрт мезгілінде де көкөніспен қамтамасыз ету мақсатында аянбай еңбек етіп келеді. Елорданың азық-түлік қауіпсіздігін қамтамасыз етуге бағытталған бұл жоба іске қосылғалы бері жаңа жұмыс орындары көптеп ашылуда. Соның нәтижесінде қаладағы жұмыссыз азаматтардың еңбекке орналасып, «екі қолға – бір жұмыс» табуларына мүмкіндік туды.
Ал, «СтальЦинк» ЖШС шығаратын металдық өнім құрылыста, өнеркәсіпте, машина және вагон құрастыруда, жиһаз құрылысында кеңінен қолданылады. Аталған жоба 2011 жылы іске асырылған болатын. Содан бері мұнда 46 жұмыс орны ашылыпты. Бүгінгі күні жобалық қуаттылыққа шығу кестесіне сәйкес, кәсіпорындағылар тегіс жұмыспен қамтылған. Осылайша, біз қала әкімдігінің елордада кәсіпкерлікті тұрақты және серпінді дамыту үшін қолайлы жағдайлар жасап жатқандығына куә болдық.
Нысандарды аралауға Астана қаласы мәслихатының хатшысы С.Есілов, мәслихат депутаттарымен бірге елордалық бұқаралық ақпарат құралдарының өкілдері қатысты.
Кездесу барысында ұжымдарда келелі мәселелер кеңінен сөз болды. Олар алдағы уақытта өтетін дөңгелек үстелде және қалалық мәслихаттың сессиясында талқыланатын болады.
