Астана қаласындағы Райымбек атындағы №50 «Қазғарыш» мектеп-лицейінің 1 «а» сыныбындағы ер балалар арасында «Жігіт сұлтаны» сайысы ұйымдастырылды.
Жеткіншектер арасындағы сайыс «Мен қазақтың ұлымын», «Білімдар», «Өнерлінің өрісі кең», «Жігітке жеті өнер де аз» аталымдары бойынша өтті. Бұл сайысқа ата-аналар белсенділік танытқанын ерекше атап өткен жөн.
Өзара бәсекеге түскен балалар қарым-қабілетін жан-жақты байқатты. Көрігі қызған «Жігіт сұлтанында» бар өнерін ортаға салған өрендердің ешқайсысы сый-сыяпатсыз қалған жоқ. Олардың қарымына қарай «Шымыр жігіт», «Салмақты жігіт», «Сері жігіт» сынды аттар қойылып, алғысхатпен марапатталды.
«Ұстазы жақсының ұстанымы жақсы» дегендей, оқушыларға шаттық сыйлап, осындай шараға мұрындық болған сынып жетекшісі Баян Оспанова болатын.
Сайыстың соңында қазылар алқасының төрайымы, мектептің оқу-тәрбие жөніндегі директордың орынбасары Алма Төкенқызына сөз беріліп, оның соңы концерттік бағдарламаға ұласты.
Гүлмира Жолтабарова,
ата-аналар комитетінің төрайымы
