Астана қаласының Көктал тұрғын алабында мүмкіндігі шектеулі 375 балаға арналған коррекциялық мектеп-интернат салынады. Бұл туралы astana.kz сайтына қалалық Құрылыс басқармасынан хабарлады.
Мектеп-интернаттың құрылыс жұмыстары наурыз айында басталған. Қазіргі уақытта діңгектер қағылып, құрылыс-монтаждау жұмыстары жүргізіліп жатыр. Жаңа ғимарат 2015 жылғы желтоқсанда пайдалануға берілмек.
Жоспар бойынша ғимарат түрлі мақсаттағы 8 блоктан тұрады. Көру және есту қабілеті нашар, тірек-қимыл аппараты бұзылған және кемшіліктері бар балаларға арналған әрқайсысы 125 орындық үш жеке блок болады. Екі ғимарат оқу-әкімшілік блокқа арналады. 40-қа жуық оқу сыныбы, зертханалар, акт залы, қызығушылықтар бойынша үйірмелерге арналған кабинеттер ашылады. Мектептің келесі блоктарында спорт залы мен бассейн, оқу-өндірістік шеберханалар, балалар шығармашылығына арналған бөлмелер болады. Тұрмыстық жайлар мен қонақ бөлмелерге жеке блок бөлінген. Алдағы уақытта салынатын мектепті асхана мен медициналық блок біріктірмек.
