Astanalyq önertapqyş Evgenii Şerbatovtyŋ «Mangust» trekerıne AQŞ-tan kölemdı tapsyrys tüstı
Byltyr elordalyq önertapqyş Evgenii Şerbatov «Mangust» atty treker oilap tapqan-dy. Jaŋa qūrylǧy balalardyŋ qauıpsızdıgın baqylauǧa arnalǧan. Jaqynda injener öz önertabysyna AQŞ-tan kölemdı tapsyrys aldy. Būl jaŋalyqty Tehnologiialyq damu jönındegı Ūlttyq agenttık habarlady.
Atalmyş mekemenıŋ derekterıne süiensek, Evgenii Şerbatovtyŋ «Mangust» trekerı «Technation» baiqauynda top jarǧan soŋ, tek qazaqstandyqtardyŋ ǧana emes, şeteldıkterdıŋ de tarapynan ülken qyzyǧuşylyqqa ie bola bastaǧan.
«Bügınde San-Fransiskodaǧy Autist balalar ūiymynan köp tapsyrys alyndy. Sondai-aq, Qazaqstanda «Qazpoşta» aksionerlık qoǧamy sälemdemelerdı qadaǧalau üşın osy qūrylǧyǧa tapsyrys berdı. Otandyq GPS-qauıpsızdık jüiesı – halyqaralyq naryqtaǧy bıregei önım», – deidı vedomstvo ökılderı.
Airyqşa jobanyŋ qūny 18,8 million teŋge eken. Onyŋ 90 paiyzyn, iaǧni, 17,7 million teŋgesın Tehnologiialyq damu jönındegı ūlttyq agenttık qarjylandyrǧan.
Bır ıstıŋ tuyndauyna bır ıs türtkı bolmai ma?! Joǧarydaǧy apparatty jasau ideiasy da joba avtory Evgenii Şerbatovqa balasynan köz jazyp qalǧan soŋ kelıptı. Paidaly ärı tiımdı qūrylǧy bolǧandyqtan, būqaralyq satylymǧa şyǧyp ülgermese de, oǧan 670-tei adam qyzyǧyp, tapsyrys berıptı.
«Mangust» trekerı adamnyŋ qaida jürgenınen 24 saǧat boiy habardar bolyp otyruǧa mümkındık beredı. Ol üşın qūrylǧyny älgı adamǧa berıp, özıŋız arnaiy mobildı qosymşa arqyly qadaǧalasaŋyz jetkılıktı. Būl önım, äsırese, kışkentai balalar üşın taptyrmas qūral ekenı dausyz. Treker myqty, su astynda da jūmys ısteidı, qolǧa ūstauǧa qolaily jäne qauıpsız.
Sonymen qatar, quat ünemdegış qasietınıŋ arqasynda qūrylǧyny 20 künde bır ret quattauǧa bolady. Apparat älemnıŋ ūialy bailanys bar kez kelgen nüktesınen signal jetkızedı. Būdan bölek, koordinattardy anyqtau däldıgımen de erekşelenedı. Sonymen qosa, qoldanuy qarapaiym bolǧandyqtan, mümkındıgı şekteulı adamdarǧa da yŋǧaily.
Balama jüielerdıŋ kemşılıkterı – ne olarda «Mangusttaǧydai» quat ünemdegış qasiet joq, ne säl soqqydan būzylyp qaluy mümkın. Al myqtylyq būl apparat üşın öte qajet. Balalar jügıredı, sekıredı, qūlap qalady. Sol kezde qūrylǧy da eş zaqymdanbauy tiıs.
Botagöz MARATQYZY
