Ūlttyq akademiialyq kıtaphanada qoǧam qairatkerı, pedagogika ǧylymdarynyŋ doktory, professor Jūmaǧali Nauryzbaidyŋ «Ǧūmyr-dastan» atty kıtabynyŋ tanystyrylymy öttı. Kıtap avtory byltyr dünieden ozǧan edı. Onyŋ artynda qalǧan mūrasyn, estelıkterdı jary men balalary jinaqtap, bır jinaqqa toptastyrdy.
Jūmaǧali Jökeiūly eŋbek jolyn tehnikum oqytuşysy bolyp bastap, Jezqazǧan oblysynda jauapty qyzmetterdı atqardy. Oblys äkımınıŋ orynbasary qyzmetıne deiın köterıldı. Qazaqstan KP Ortalyq komitetınde nūsqauşy, sektor meŋgeruşısı boldy. Prezident apparaty men Ministrler kabinetınde eŋbektendı. Odan keiın Parlament Mäjılısınıŋ deputaty, Ö.Baiqoŋyrov atyndaǧy Jezqazǧan universitetınıŋ rektory boldy. Soŋǧy jūmys orny – Y.Altynsarin atyndaǧy Ūlttyq bılım akademiiasy.
Kıtaptyŋ tanystyrylymynda avtormen qyzmettes bolǧan, onymen aralasqan elge belgılı azamattar, otbasy müşelerı estelıkterdı aitty. Alǧaşqy sözdı alǧan memleket jäne qoǧam qairatkerı Mūhambet Köpei Jūmaǧali Nauryzbaimen synyptas bolǧanyn aita kele, onyŋ bolmysyna, adami kelbetıne toqtaldy. Qabıletı erte baiqalyp, oblystan respublikaǧa aldyrylǧanyn aitty.
Osy kıtapqa estelıgı engen belgılı qalamger, Memlekettık syilyqtyŋ laureaty, Parlament Mäjılısınıŋ deputaty Sauytbek Abdrahmanov Ortalyq komitette bırge qyzmet ıstegen künderdı eske aldy.
– Jezqazǧandaǧy bır jiynda Jūmekeŋnıŋ söilegen sözı joǧary basşylyqqa ūnap, ol bırden oblystyq komitetten Almatyǧa, Ortalyq komitetke şaqyryldy. Jūmaǧalimen tarihtyŋ bır talmau tūsynda tabysyp, eŋ şeşuşı şaqtarda qatar jürdık. Onyŋ odan keiıngı eŋbegı – ūlttyq pedagogika, ūlttyq psihologiia. Ūlttyq mekteptıŋ qadır-qasietın, ornyn, missiiasyn äbden qazyp jazdy. Bız «Egemende» otyrǧanda «Ūlttyq mekteptıŋ ūly mūraty» degen maqala jazdy. Keiın bız būl taqyrypty gazettıŋ aidaryna şyǧardyq, – dedı S.Abdrahmanov.
«Ǧūmyr-dastan» kıtabynyŋ alǧysözın akademik Ǧarifolla Esım jazdy. Tanystyrylymda «Jūmaǧali arqyly Jezqazǧandy, Jezqazǧan arqyly Jūmaǧalidı tanydym» degen ol Ūlytau saparlary turaly tolǧandy. Mädeniet qairatkerı Qaiyrbek Säduaqasov Jūmaǧali Nauryzbaidyŋ ıskerlıgı turaly äŋgımeledı. Ǧalymnyŋ jary Janat Äbdıǧūlqyzy elu jyldan astam «şäi» despei ǧūmyr keşkenın aityp, kıtaptyŋ şyǧuyna atsalysqan adamdarǧa alǧysyn jetkızdı.
Jūmaǧali Nauryzbai tamaşa aqyn da edı. Aqyndyǧy moiyndalyp, Jazuşylar odaǧyna qabyldandy. «Käusar» baspasynan şyqqan kıtapqa onyŋ öleŋderımen qatar körnektı aqyndar Käkımbek Salyqov, Temırhan Medetbek, Ǧalym Jailybai, Sailauhan Näkenov, ädebiettanuşy ǧalym Serık Negimov jazǧan resenziialar engızıldı. Sonymen qatar Jūmaǧali Nauryzbaidyŋ maqalalary, sūhbattary, ol turaly materialdar kırdı.
