«Qater joq deme, aiaq astynda» degen ras eken. Ötken jeksenbıde №52 qalalyq avtobusqa Astanalyq bazardan otyrdym. Avtobus Ministrlıkter üiıne jaqyndai bergende «tars» etken qatty dybysqa selt ete qaldyq.
Äp-sätte salon ışınde janar maidyŋ iısı alyp ketkende jolauşylar kölıktı toqtatuyn talap ettı.
Jürgızuşı kılt toqtamai, elu metrdei jürıp jyldamdyǧyn bäseŋdetıp baryp otyn öşırdı. Bilet beretın bala aldyŋǧy esıkten jügırıp şyqty da, qaita kırdı. Aŋtarylǧan jūrtqa eşkım eşteŋe demedı. Tıptı, syrtqa ūmtylǧan halyqty toqtatyp, äldene sebeppen esıktı aşpai bıraz tūrdy. Jolauşylardyŋ narazylyǧynan keiın ǧana esık aşylyp, jūrt syrtqa lap berdı. Mässaǧan, mai qūiylǧan bak tesılgen siiaqty, avtobustyŋ astynan benzin saryldap aǧyp jatyr. Qūdai saqtady. Qas-qaǧym sätte otqa oranatyn jait osyndaida emes pe?! Alaida, tönıp tūrǧan qaterdı baǧamdai almai, esıktı jyldam aşyp, jolauşylardyŋ syrtqa şyǧuyn qamtamasyz etpegen kölık jürgızuşısı men kontrolerdıŋ äreketın qalai baǧalauǧa bolady?! Bastan qūlaq sadaǧa dep, orta jolda qalǧan jolauşylardyŋ bilet pūlyn qaitaru turaly nesıne aitaiyn. Tehnika bolǧan soŋ synbai tūrmaidy dese de, tötenşe jaǧdaida ne ısteu kerek? Odan jürgızuşı men bilet satuşynyŋ habardar ekenıne kümänım bar. Öitkenı, jalma-jan tiıstı oryndarǧa habarlamaq bolǧandarǧa beijai qarap otyrǧan kölık ielerınıŋ äreketı sonyŋ dälelı. Tärtıp demekşı, jolda jüru erejelerımen bırge jolauşylar kölıgınıŋ aialdamalarda kıdıretın uaqyty, keptelıs bolmasa, baǧyttyŋ ekı şetıne jetu saǧaty belgılengen emes pe? Onda, äsırese, demalys künderı, kölıgın tasbaqa aiaŋmen aidap, jaqyn jerge jetkızıp bolmaityn kölık jürgızuşılerıne ne deuge bolady? Ony da eskerıp jatqan jan bar ma eken?!
Aigül UAISOVA
