Sailauşylar müddesın qoldau – mındetımız
Astana qalasy mäslihaty qūramyndaǧy 25 deputattyŋ bırı retınde, qoldanystaǧy zaŋnamalar şeŋberınde elordany damytu josparlaryn, ekonomikalyq jäne äleumettık baǧdarlamalaryn, jergılıktı biudjettı jäne olardyŋ atqaryluy turaly esepterın talqylap şeşu negızgı mındetımız ekenın aitqym keledı.
Sondai-aq, tūrǧyndarmen tūraqty türde kezdesuler ötkızıp, olardy mazalap jürgen saualdardyŋ şeşımın tabuǧa atsalysamyz. Sailau okrugymdaǧy PİK basşylarymen bailanys būl jūmysty jeŋıldetedı. Aulany abattandyru, köşelerdı kögaldandyru, balalar men sport alaŋdaryn jasau, eskı üilerdı syru mäselesı men sol üilerdıŋ ielerınıŋ qūqyqtaryn qorǧau siiaqty mäseleler öz kezegımen şeşılıp jatady. Tūrǧyndardan kelıp tüsken aryz-şaǧymdardy qarap, ony tiıstı atqaruşy organdarǧa jıberıp, onyŋ oryndaluyn qadaǧalap otyramyz. Degenmen, oŋ nätijege qolymyz jetpei jürgen jait ta joq emes. Jaqynda, «Astana qalasynyŋ äleumettık maŋyzy bar baǧyttardyŋ tızbesın bekıtu jönındegı şeşımıne özgerıster men tolyqtyrular engızuın mäslihat otyrysynda talqyladyq. Būl men üşın de maŋyzdy edı. Sebebı, qoǧamdyq kölıkterdıŋ baǧyty Astana medisinalyq akademiiasynyŋ oqu korpustary arasynan qiystau ötıp, studentterımız qystyŋ suyǧy aq qar kök mūzda ekı ortada jaiau qatynap jür. Būl aldaǧy uaqytta şeşımın tabady dep oilaimyn. Qala mäslihatynyŋ resmi ökılı ärı elordanyŋ basty bılım ordalarynyŋ basşysy retınde studentterdıŋ käsıptık-bılıktılıgın daiarlau, bolaşaq därıgerlerdı kemel tūlǧa etıp qalyptastyryp, jaŋa saiasi äleumettık jaǧdaida elı üşın aianbaityn azamattardy tärbieleu tıkelei mındetımız.
Būl üşın aldymen studentterdıŋ jaqsy bılım aluymen qatar, äleumettık jaǧdaiyna da män beru kerek. Astana medisinalyq universitetınde bılım alyp jatqan balalar üiınde tärbielengenderge, qamqorşysy joq jastarǧa materialdyq kömek qarastyrylǧan. Azyq-tülık aluǧa, kiım-keşek taǧy basqa qajettılıkterıne qarajat bölıngen. Olardyŋ universitet ashanasynda tegın tamaqtanuyna jäne qoǧamdyq kölıkte jüru jolaqysyn da tölep otyrmyz. Mūndai balalar jataqhanada tegın tūrady. Osy sanattaǧy studentterdıŋ jazǧy demalysyn ūiymdastyru bızdıŋ mındetımızge kıredı. Mūndai jeŋıldıkterdı barlyq oqu oryndarynyŋ basşylary qaperıne alsa jön bolar edı.
Deputat jūmysynyŋ nätijesın qalai baǧalauǧa bolady? Sailau okrugynda üş orta mekteppen bırge, Qazaq Ūlttyq öner universitetı, politehnikalyq kolledj bar. Demek, sailauşylardyŋ basym köpşılıgı – jastar. Öskeleŋ ūrpaqtyŋ tärbiesı de bızdıŋ jauapty salamyz dep aituǧa bolady. Osy rette, ösken ūiasy men qalasyn süiıp, tuǧan elınıŋ tarihyn bılıp, ömır sürıp jatqan qoǧamynyŋ alǧa ozuyna at salysatyn azamattardy qalai qalyptastyramyz? Jalaŋ sözderdıŋ uaqyty artta qaldy. Naqty qamqorlyǧymyzdy sezınıp, özderı sol ortanyŋ bır bölşegı ekenın bar bolmysymen ūǧynǧanda ǧana keleşektıŋ kemel ūrpaqtaryna senımdı bola alamyz.
Şynyn aitu kerek, qala tūrǧyndary öte belsendı, olar özderınıŋ azamattyq közqarasyn aşyq aityp, öz müddelerın talap ete alady. Elorda da ötıp jatqan türlı saiasi şaralarǧa belsendı aralasuy olardyŋ azamattyq ūstanymynyŋ ūştaluyna jaqsy yqpalyn tigızıp jatyr. Kez kelgen ıstı bırlese atqaryp, ortaq müddege jūmylatyn osyndai sailauşylarymyz bızdıŋ qyzmetımızden bılıktılıktı talap etedı.
Mäjit Şaidarov,
Astana qalasy mäslihatynyŋ deputaty