Keşe Nūr-Sūltan qalasy mäslihatynyŋ hatşysy Erlan Kanalimov Qazaqstan Respublikasynyŋ Konstitusiia künıne orai, qalalyq mäslihat atynan äleumettık osal toptarǧa jatatyn, tūrmysynda qiynşylyǧy bar balalarǧa, belsendı tülekterge arnalǧan granttyq oqu sertifikattaryn tabys ettı.
Qalalyq mäslihat pen AMANAT partiiasynyŋ «Jastar ruhy» jas qanaty bırlesıp ötkızgen būl igılıktı şara aiasynda 60 talapker «Tūran-Astana» universitetınde, Tehnologiialyq kolledjde, sondai-aq «Astana Profi» qalalyq şaruaşylyq kolledjınde qalalyq mäslihattyŋ grantymen oquǧa mümkındık aldy.
– Ötken jyly el täuelsızdıgınıŋ 30 jyldyǧyna orai, qalalyq mäslihat deputattary «täuelsızdıktıŋ 30 jyldyǧyna arnalǧan 30 igılıktı ıs» degen bastamany qolǧa alǧan bolatynbyz. Osy şara aiasynda orta käsıptık jäne joǧary oqu oryndarynda qalalyq mäslihat atynan arnaiy grant bölgen edık. Elorda tarihynda tūŋǧyş ret atqarylǧan būl joba aiasynda 30 tülekke bılım grantyn bergen edık. Biyl osy igılıktı bastamany jalǧastyryp, grant alatyn tülekter sanyn köbeitıp, 60-qa jetkızdık. Būl grant tek qana tūrmys jaǧdaiy tömen tülekterge ǧana emes, äleumettık ömırde ülken belsendılık tanytqan tülekterge de berıldı, – dedı Erlan Kanalimov.
Şaraǧa «Tūran-Astana» universitetınıŋ, Tehnologiialyq kolledjınıŋ basşylary qatysyp, talapkerlerdıŋ oquyna tabys tıledı.
