Кеше елордалық Достық үйінде Нұр-Сұлтан қаласының Қазақстан халқы ассамблеясы «Мектепке жол – бар мейірім балаға» ұранымен «Мектепке жол» республикалық қайырымдылық шарасын өткізді.
Балалар жылы аясында өткен ізгі шараның негізгі мақсаты – әлеуметтік қолдауға мұқтаж көпбалалы отбасыларға, сондай-ақ ата-ананың қамқорлығынсыз қалған балаларға жаңа оқу жылына дайындық алдында материалдық көмек көрсету. «Мектепке жол» акциясына елордалық этномәдени бірлестіктердің төрағалары мен меценаттары белсенді түрде қатысты.
Қайырымдылық акциясы барысында 100-ге жуық бала мектеп сөмкелерімен және оқу құралдарымен қамтамасыз етілді. Достық үйіне шақырылған балалар үшін кәсіби аниматорлар ойын-сауық бағдарламасын ұсынды. Мультфильм кейіпкерлерімен бірге балалар қызықты ойындарға қатысты. Олар елордалық ассамблеяның шығармашылық ұжымының концерттік бағдарламасын тамашалады. Ұйымдастырушылардың қызықты бағдарламасы балаларға жақсы көңіл күй сыйлады. Атап айтқанда, тәжік, өзбек, шешен-ингуш, поляк, орыс, түрік, украин, татар-башқұрт, еврей, әзербайжан, белорус, неміс, ұйғыр, дүнген, казак, болгар, башқұрт, грузин этномәдени орталықтарының өкілдері, сондай-ақ қайырымдылық жасаушы Сайяф Исмаилов пен қалалық ҚХА аналар кеңесінен Шапаат Нурахунова игі іске өз үлесін қосты.
