Мүмкіндігі шектеулі жандарға арналған бос жұмыс орындарының кезекті жәрмеңкесі өтті.
Мүгедектерді жұмыспен қамтудың белсенді шарасында әдеттегі дәстүр бойынша, әлеуметтік қорғау мәселелері, сонымен қатар еңбек нарығындағы ахуал туралы ақпараттар берілді.
«Біз осымен үшінші жыл қатарынан мүмкіндігі шектеулі жандар үшін бос жұмыс орындары жәрмеңкесін өткізудеміз. Бір қуанарлығы, бұл игі іске мекеме мен кәсіпорындардың қызығушылығы күннен-күнге артып келеді. Мәселен, мына шараға 30 жұмыс беруші қатысуда», – деді Астана қаласы әкімдігінің жұмыспен қамту орталығының директоры Олжас Омар.
Оның айтуынша, мұндай жәрмеңкелер мүмкіншілігі шектеулі адамдарға бір мезетте бірнеше жұмыс беруші ұйыммен байланысуға мүмкіндік береді. Ал жұмыс ұсынып отырғандардың басым бөлігі – шағын және орта бизнес саласының ұйымдары. Олар өздеріне қажетті әлеуметтік қызметкер, есепші, бағдарламашы, күзетші, тігінші, әкімгер, сауда және қызмет көрсету, полиграфия мамандарын жәрмеңкеге келушілердің қатарынан тапты. Жұмыс іздеушілердің 60 пайызы – әйелдер. Өткен жылы біз осындай жолмен шамамен 90 адамды жұмысқа орналастырдық. Бір жақсысы, жұмыспен қамту орталығы жұмыс берушілер жәрмеңкесі арқылы еңбекпен қамтылған жандарды үнемі назарда ұстап отырады. Халықтың нысаналы топтағы тұлғалары Жұмыспен қамту орталығының мамандарынан «Жұмыспен қамту 2020 жол картасы» бағдарламасы шеңберінде өздерін қызықтырған сұрақтардың жауабын алды. Сонымен қатар, осы шара барысында «Қасиет» психология орталығы мүгедектерге «Өзін-өзі дамыту» тақырыбында семинар-тренинг өткізді.
Айгүл УАЙСОВА
