ҚАНША ҚАРЖЫ ЗАҢДАСТЫРЫЛДЫ?
Астана қаласы бойынша мүлік пен қаржыны жария ету науқаны басталғалы 38 миллиард теңгенің 8 мың нысаны заңдастырылды.
Елімізде мүлікті заңдастыру науқаны қызу жүргізілуде. Жыл аяғына дейін созылатын шараға елорда тұрғындары да белсенділікпен қатысып, көлеңкедегі қаржысы мен мүлкін тізімдетіп жатыр.
Бұл ретте, әсіресе, Алматы ауданы тұрғындарының беталысы айрықша. Бүгінге дейін аталмыш аудан тұрғындарынан жергілікті атқарушы органдар жанындағы Мүлікті заңдастыру жөніндегі комиссияға жалпы сомасы 60 млрд теңгеге бағаланатын барлығы 4 мыңнан астам өтініш келіп түсіп отыр. Бұл өтініштердің 3 840-ы тұрғын үйлер болса, 5 814-і – басқа мақсаттағы нысандар. Қалғаны – коммерциялық сауда орындары. 5 заңды тұлғаның қатысу үлесі 457,9 мың теңгені құрайды.
Астана қаласы Қаржы басқармасының мәліметінше, одан кейінгі орында Есіл ауданы тұр.
Бұл ауданнан 32,4 млрд теңгенің 1534 өтініші келіп түскен. Сарыарқа ауданының үлесі – 19 млрд теңге, яғни келіп түскен өтініштердің жалпы саны 3 217-ні құраған. Жалпы, Астана қаласы бойынша 110,7 млрд теңгенің 9 мыңға жуық өтініші келіп тіркелген.
Арнайы комиссияның шешімімен бүгінде бұл өтініштердің 3 629-ы қанағаттандырылып, 38 млрд теңгенің 8 мың нысаны заңдастырылған. Сонымен қатар, 5 заңды тұлғаның қатысу үлесі 457, 9 млн теңгені құрады. 8 110 мың теңгенің құнды қағаздары жария етілді.
Жалпы, жария ету науқаны басталғалы бері елімізде 3 213 056,9 теңгенің мүлкі мен ақшасы заңдастырылған. Оның 2 219 895,7 теңгесі – қолма-қол ақша. Қалғаны – жылжымайтын мүлік, заңды тұлғалардың жарғылық капиталындағы қатысу үлесі және құнды қағаздар.
Бүркіт НҰРАСЫЛ