Қазақ тілін меңгеруге бағытталған тегін курстар қарашаға дейін жалғасады. Мемлекеттік тілді кез келген адам оқып, үйренуіне болады деп хабарлайды елорда әкімдігінің ресми сайты.
Оқудың бірінші кезеңі сәуірде басталған болатын. Қазіргі таңда 750 адам курсты тәмамдады. Ұлттық тіл орталығының директоры Айжан Сұмғатова оқушылар деңгейіне қарай топқа бөлінгенін айтты. «Барлығы 6 деңгей қарастырылған. А1 және А2 – базалық деңгей, Б1 және Б2 – орташа, С1 және С2 – жетік меңгергендерге арналған. Деңгей тест арқылы анықталады. Сосын қалауына қарай арнайы топқа жазылу басталады. Сәуірден шілдеге дейін бізде 51 топ оқып кетті» дейді орталық басшысы.
Әр топ 10-13 адамнан құралған. Оқушыларға 12 ұстаз білім береді. Курстың жалпы бағдарламасы 8 айға лайықталған. Сынақты сәтті тапсырғаннан кейін сертификат беріледі. Әрі қарай оқуды жалғастырғысы келгендер келесі курсқа қатыса алады. Қазақ тілін үйренгісі келетіндер мына телефон бойынша хабарласуына болады: 8 747 526 28 55, 8 701 390 02 25.
