Қорғалжын – қоқиқаз отаны
Мектептегі қосымша білім беру бағдарламасына орнитологиялық бақылауды да енгізу жоспарланып отыр. Қорғалжын обсерваториясының базасындағы құстарды зерттеу орталығында еліміздегі оқушыларға экологиялық сауаттандыру жобасы іске қосылды.
Ақмола облысы аумағындағы орнитологиялық орталық өткен жылы ашылды. Оның мақсаты – жас ұрпақты туған жерді сүюге баулу, ой-өрісін кеңейту, өңірдегі жануарлар дүниесі туралы мәлімет беру. Орталық мамандары жұмысқа пайдаланатын бірқатар практикалық және әдістемелік құжаттарды жасап шығарды. Атап айтсақ, табиғат күнделігі, құстардың өміріне бақылау жасайтын күнделік балалармен жұмыс істеу барысында қолданылады.
Бұл жоба АҚШ-тың Қазақстандағы елшілігінің шағын гранттары бағдарламасы бойынша жүзеге асырылды. Қорғалжын экологиялық обсерваториясының директоры Құралай Түсіпбекова гранттық қолдаудың нәтижесінде қорықты мекендеушілерді бақылау инфрақұрылымы қалыптасып, қонақүйлердегі қызмет көрсету сапасы артқанын айтады. «Гранттық қолдаудың алты айында орнитологиялық бақылау кешені әзірленеді» дейді ол.
АҚШ елшілігінің шағын гранттар және бюджет бағдарламасының ассистенті Серік Досалиевтің айтуынша, елімізде биыл 300-ден аса әртүрлі тұжырымдамалар мақұлданған. Солардың бірі – Қорғалжын экологиялық обсерваториясы. – Біз оқушылар мен олардың ата-аналары бұл идеяны өз ортасында одан әрі дамытады деп үміттенеміз, – деді С.Досалиев.
Қорғалжын мемлекеттік қорығы директорының міндетін атқарушы Алексей Кошкин тілшілерге бірегей қорықты дамытудың маңызды жақтарын әңгімелеп берді. Ол еліміздегі құстардың 76 пайызы Қорғалжын қорығының аумағында шоғырланғанын мәлім етті. Ең бастысы, бұл қорық әлемдегі ең әдемі құс – қоқиқаздың отаны саналады.